Gujarati News

Gujarati News

News of Sunday, 26th September 2021

પત્નીએ ફોનનું બિલ જોયું અને પતિનું પ્રેમ પ્રકરણ પકડાયું

પત્નીએ પોલીસમાં ફરિયાદ નોંધાવી : પતિનું વર્તન જોતાં તપાસ કરીને અને જેનો શક હતો તે વાત સાચી પડી પતિનું તો બહાર લફરું ચાલતું હતું

અમદાવાદ, તા.૨૬ : પતિ પત્નીનો સંબંધ સૌથી પવિત્ર એટલા માટે માનવમાં આવે છે કે આપણી સંસ્કૃતિમાં આ સંબંધને પવિત્ર અગ્નીની સાક્ષીએ જોડવામાં આવે છે. ત્યારે અગ્નીની સાક્ષીએ એકમેકના બનેલા પતિ પત્નીમાંથી કોઈ બેવફાઈ કરે તો પછી આ સંબંધની આમાન્યા જળવાતી નથી. આજકાલની ફાસ્ટ લાઈફમાં આવા ઘણા કિસ્સા જોવા મળે છે જેમાં લગ્નેત્તર સંબંધોના આનંદમાં માણસ પોતાનું કહેવાય તેવું વ્યક્તિ ગુમાવી બેસે છે. તો ઘણીવાર ઘરમાં નાની મોટી વાતે થતા ઝગડાઓ અને અશાંતિ પણ વ્યક્તિને લગ્નના બંધનથી દૂર લઈ જતી હોય છે તેવું કેટલાક સમાજ ચિંતકોનું કહેવું છે. માટે જ કહેવાય છે કે ખુશાલ પરિવારનો પાયો પતિ પત્ની બંને એકબીજા સાથે કેટલો ક્વોલિટી સમય પસાર કરે છે તેના આધારે છે.

આવો જ એક કિસ્સો અમદાવાદના નવા વાડજનો સામે આવ્યો છે જેમાં પત્નીએ પતિના ફોનના બિલમાં આવેલા અજાણ્યા નંબરો પરથી પતિના પ્રેમ પ્રકરણનો ભાંડો ફોડ્યો હતો. જે બાદ પરિણીતાએ પતિ, સસરા, જેઠ, જેઠાણી વિરુદ્ધ નોંધાવેલી ફરિયાદમાં પતિના પ્રેમ પ્રકરણનો ઉલ્લેખે કર્યો છે. પરિણીતાએ ફરિયાદમાં એવો આક્ષેપ કર્યો છે કે, અન્ય સ્ત્રી સાથેના પ્રેમ સંબંધને કારણે પતિ તેને હેરાન કરે છે. જ્યારે તે ગર્ભવતી થઈ ત્યારે સસરા, જેઠ, જેઠાણી એવું કહેતાં કે, 'નવાઈની છોકરાં જણે છે, ઘરકામ કરતી નથી અને સૂઈ રહે છે.લ્લ

નવા વાડજમાં આવેલા ગ્રીનસિટી ફ્લેટમાં રહેતાં રચનાબેન (નામ બદલેલું છે)લગ્ન ૨૦૦૩માં રાજેશ(નામ બદલેલું છે) સાથે થયાં હતાં. લગ્ન બાદ તેઓ સંયુક્ત પરિવારમાં રહે છે. તેમણે નોંધાવેલી પોલીસ ફરિયાદમાં જણાવ્યા અનુસાર ૨૦૦૫માં રચનાબેન બીજી વાર ગર્ભવતી થતા તેમને વારંવાર ઊલટીઓ થતી હોવાથી આરામ કરતા હતા. જેને લઈને ઘરમાં કામ કરવા બાબતે ઘણાં ઝગડા થતાં રહેતા હતા. આથી એક દિવસ સસરાએ કહ્યું કે, 'નવાઈની છોકરાં જણે છે, કંઈ કામ કરતી નથી અને આખો દિવસ સૂઈ રહે છે.લ્લ આથી કંટાળીને રચના પિયરમાં રહેવા જતી રહી હતી. જોકે પુત્રના જન્મ બાદ સાસરિયાંએ તો રચનાને વધુ ત્રાસ આપવાનું શરૂ કર્યું હતું. આથી કંટાળીને રચનાએ પતિને વિનંતી કરી અને બંને બાળકોને લઈને વેજલપુરમાં જુદા રહેવા જતા રહ્યાં હતાં. જોકે રાજેશભાઈના મોબાઈલ બિલમાં ઘણા બધા અજાણ્યા નંબર જોતાં રચનાબેને રાજેશભાઈને આ બાબતે પૂછતા તો તેમણે રચનાબેન સાથે ઝઘડો કરી મારઝૂડ કરતા હતા. આથી રચનાબેનને શંકા ગઈ હતી અને તપાસ કરતાં જાણ થઈ હતી કે તેના પતિને કોઈ બીજી સ્ત્રી સાથે પ્રેમસંબંધ છે. હવે આ બાબતે બંને વચ્ચે વારંવાર ઝઘડા થતા હોવાથી રચના પિયર જતી રહી હતી.

તાજેતરમાં તેમની વચ્ચે આ મુદ્દે ફરી ઝઘડો થતા રચના અને બંને બાળકોને કાઢી મૂકી પતિ ફોન પર હેરાન કરતા હોવાથી આખરે રચનાએ પતિ રાજેશ, સસરા, જેઠ અને જેઠાણી દીપ્તિ વિરુદ્ધ વાડજ પોલીસ સ્ટેશનમાં ફરિયાદ નોંધાવી છે.

(9:13 pm IST)