Gujarati News

Gujarati News

News of Saturday, 26th September 2020

સાબરકાંઠા જિલ્લાના હાથરોલ ગામે કોરોના વિસ્ફોટ : એક સાથે 15 પોઝિટિવ કેસ :8 દિ 'લોકડાઉન લાગુ

ગામની નાની-મોટી તમામ દુકાનો બંધ રહેશે: દૂધ અને મેડિકલની સેવાઓને છૂટ

સાબરકાંઠા જિલ્લાના હાથરોલ ગામમાં એક સાથે 15 લોકો કોરોનાથી સંક્રમિત મળ્યા બાદ વહીવટી તંત્ર હરકતમાં આવ્યું છે. ગ્રામ પંચાયતના નિર્ણય પર હાથરોલમાં શુક્રવારથી એક અઠવાડિયા માટે લૉકડાઉન લાગૂ કરાયું છે

 આ અંગે હાથરોલ ગામના સરપંચ અમિત પટેલના જણાવ્યા પ્રમાણે, ગામના અનેક લોકો કામકાજ માટે બહાર જતા હોય છે. અનેક લોકોમાં રોગ પ્રતિકારક ક્ષમતા ઓછી હોવાના કારણે લોકો કોરોના સંક્રમણનો શિકાર બને છે. તાજેતરમાં ગામના 15 લોકો એક સાથે કોરોનાથી સંક્રમિત થઈ ચૂક્યા છે..આથી ગામના અન્ય લોકોને કોરોના સંક્રમણથી બચાવવા માટે તકેદારના ભાગરુપે ગ્રામજનો સાથે વિચાર-વિમર્શ કરીને શુક્રવારથી એક અઠવાડિયા માટે લૉકડાઉન જાહેર કરવામાં આવ્યુ છે.

 

આ લૉકડાઉનના પગલે ગામની નાની-મોટી તમામ દુકાનો બંધ રહેશે. જો કે દૂધ અને મેડિકલની સેવાઓને છૂટ આપવામાં આવી છે. લૉકડાઉનના પ્રથમ દિવસે શુક્રવારે ગામના રસ્તાઓ સૂમસામ રહ્યાં હતા. ગ્રામજનોએ પોતાના ઘરોમાં જ રહીંને લૉકડાઉનનું સ્વૈચ્છિક પાલન કર્યું હતું.

ઉલ્લેખનીય છે કે, અગાઉ સાબરકાંઠા જિલ્લાના જ વડાલી, પોશીના, ખેડબ્રહ્મા, વિજયનગર, ઈડર, પુંસરી, તખતગઢ ગામો સ્વયંભૂ બંધ પાળીને લૉકડાઉનની જાહેરાત કરી ચૂક્યાં છે.

જણાવી દઈએ કે, ગુજરાતમાં છેલ્લા 24 કલાકમાં કોરોનાના 1442 નવા કેસ સામે આવ્યાં છે. જ્યારે વધુ 12 કોરોના દર્દીઓના મરણ નોંધાયા છે. આ સાથે જ રાજ્યમાં કોરોના સંક્રમિતોનો કુલ આંકડો વધીને 1,30,391 પર પહોંચી ચૂક્યાં છે. હાલ રાજ્યમાં કોરોનાના 16,505 એક્ટિવ કેસ છે.

(12:05 pm IST)