Gujarati News

અમદાવાદ તા. ૨૬ : ગાંધીનગર જિલ્લાના પેથાપુર ગામમાં પોતાના ઘરની બહાર ઊંઘી રહેલી માસુમ બાળાને નરાધમે પોતાની હવસનો શિકાર બનાવી. પેથાપુર પોલીસે POCSO અંતર્ગત કેસ નોંધ્યા બાદ આ મામલે ગાંધીનગર સર્કલ પોલીસ ઇન્સ્પેકટરે (CPI) તપાસ હાથ ધરી છે. સારવાર માટે બાળકીને ગાંધીનગર સિવિલ હોસ્પિટલે ખસેડવામાં આવી છે.

તપાસકર્તાઓ મુજબ મજૂરી કામ કરતો આ પરીવાર ગામની ખુલ્લી જગ્યામાં રહે છે. કપલને ૨ છોકરા અને ૪ છોકરી સહિત ૬ બાળકો છે. બધા ભાઇ બહેનોમાં સૌથી નાની બાળા આ ઘટનાનો શિકાર બની. રાત્રે ૧૦.૩૦ વાગ્યે તે પોતાના પિતા સાથે ઊંઘી રહી હતી અને તે સમયે કંઇક કામ માટે તેના મમ્મી બહાર ગયાં હતાં.

પોલીસે જણાવ્યું કે, 'છોકરીના કાકાએ નોંધાવેલી ફરિયાદમાં કહ્યું કે રાત્રે ૧.૪૫ વાગ્યાની આસપાસ બાળકી રહેણાકથી ૭૫ ફૂટ દૂર મળી આવી હતી. બાળકીના રડવાનો અવાજ સાંભળ્યા બાદ તેમણે તેને શોધી લીધી હતી.' બાળકી લોહીલુહાણ હતી અને તેણે પહેરેલું શોર્ટ ગાયબ હતું. સારવાર માટે બાળાને તરત ગાંધીનગર સિવિલ હોસ્પિટલે ખસેડવામાં આવી. મેડિકલ પરીક્ષણમાં રેપ થયો હોવાની પુષ્ટિ થઇ છે.

CPI એલ.ડી. વાઘેલાએ કહ્યું કે, અમે તમામ શકય એન્ગલની તપાસ કરી રહ્યા છીએ. વધુ પરીક્ષણ માટે શારીરિક પ્રવાહીને ભેગો કરવામાં આવ્યો છે. ફોરેન્સિક એકસપર્ટ જીપી દરબાર અને વાઘેલાએ ઘટના સ્થળની મુલાકાત લઇ પડોશીઓની પૂછપરછ કરી હતી. પોલીસને શંકા છે કે પરીવારની નજીકના જ કોઇ શખ્સે રેપ કર્યો હોઇ શકે છે.(૨૧.૮)