Gujarati News

રાજકોટ તા. ૨૫ : ગુજરાતમાં આ વર્ષે મેઘરાજાએ જૂનના પ્રારંભે જ પધરામણી કરતા વાવણીનું કાર્ય પૂરજોશમાં ચાલી રહ્યું છે. ઘણા વિસ્તારોમાં વાવેતર થઇ ગયું છે અને બાકી જ્યાં છે ત્યાં ચાલી રહ્યું છે. ગયા વર્ષે ખેડૂતોને મગફળીના સારા ભાવ મળ્યા હોવાથી આ વર્ષે ખેડૂતો મગફળીના વાવેતર તરફ મોટા પ્રમાણમાં વળ્યા છે. સૌરાષ્ટ્રમાં મગફળી અને કપાસ તે બે મુખ્ય પાક છે. ગયા વર્ષે સરકારે ટેકાના ભાવે મગફળી મોટા પ્રમાણમાં ખરીદેલ તેમજ ખુલ્લા બજારમાં પણ સારા ભાવ મળતા આ વર્ષે ખેડૂતોને મગફળીના વાવેતરનું વિશેષ આકર્ષણ છે. ગયા વર્ષની જૂનના ચોથા અઠવાડિયાની સરખામણીએ આ વખતે મગફળીનું વાવેતર બમણું થયું છે. હવે વરસાદની જરૂરીયાત છે. જો સમયસર વરસાદ મળતો રહે અને કુદરતી રીતે કોઇ પ્રતિકૂળતા ન સર્જાય તો આ વર્ષે મગફળીનો પાક વિપુલ પ્રમાણમાં થશે.

૨૨ જૂનના સરકારી આંકડા મુજબ ગયા વર્ષે આ સમયગાળામાં રાજ્યમાં ૬,૦૧,૨૮૯ હેકટર જગ્યામાં મગફળીનું વાવેતર થયેલ તે આ વર્ષે ૨૨ જૂન સુધીમાં ૧૨,૩૬,૬૨૨ હેકટરમાં વાવેતર થયું છે. ગયા વર્ષ કરતા પ્રમાણ બમણું થઇ ગયું છે. નોર્મલ વાવેતર વિસ્તારની સામે ચાલુ વર્ષે મગફળીનો વાવેતર વિસ્તાર ૮૦.૩૦ ટકા જેટલો થઇ ગયો છે. રાજ્યના મગફળીના કુલ વાવેતર પૈકી ૧૧,૭૧૮ હેકટર વાવેતર વિસ્તાર સૌરાષ્ટ્રનો છે. જેમાં ૨૪૧૫ હેકટર સાથે રાજકોટ જિલ્લો મગફળીના વાવેતરમાં સૌથી મોખરે છે. રાજ્યમાં છેલ્લા ત્રણ વર્ષનો મગફળીનો સરેરાશ વાવેતર વિસ્તાર ૧૫,૪૦,૦૭૮ હેકટર છે.

રાજ્યમાં વાવેતરની દ્રષ્ટિએ બીજા ક્રમે કપાસ આવે છે. કપાસનું વાવેતર ૧૧,૬૬,૮૧૪ હેકટરમાં થયું છે. ગયા વર્ષના આ સમયગાળામાં ૭,૬૭,૦૭૦ હેકટરમાં વાવેતર થયેલ. છેલ્લા ત્રણ વર્ષમાં કપાસનો સરેરાશ વાવેતર વિસ્તાર ૨૬,૭૩,૮૯૨ હેકટર રહ્યો છે. આ વર્ષે અત્યાર સુધીમાં કુલ ૨૮,૪૪,૧૦૮ હેકટરમાં વાવેતર થઇ ચૂકયું છે. જેમાં પાકોનો સમાવેશ થાય છે. આ વખતે સૌથી ઓછું ૨.૧૦ ટકા વાવેતર ગુવારનું થયું છે.