Gujarati News

અમદાવાદ, તા.૨૩ :  હવામાન વિભાગની આગાહી વચ્ચે છેલ્લા ૨૪ કલાકમાં દક્ષિણ ગુજરાતના ડાંગ જિલ્લાના વઘઈ અને નવસારી જિલ્લાના ચીખલીમાં અઢી ઈંચથી વધુ વરસાદ ખાબકતાં સર્વત્ર જળબંબાકારની સ્થિતિ સર્જાઇ હતી. દિવાળી ટાળે વરસાદના પગલે ખેડૂતઆલમ અને સ્થાનિક નાગરિકોને ભારે હાલાકીનો સામનો કરવાનો વારો આવ્યો છે. નવસારી જલાલપોર વિસ્તારમાં દિવસ દરમિયાન વાદળછાયુ વાતાવરણ સર્જાયા બાદ મોડી સાંજે વરસાદી છાંટણા થયા હતા. જો કે, નવસારી જિલ્લાના ગણદેવી, ચીખલી, ખેરગામ અને વાંસદા તાલુકામાં સામી દિવાળીએ નોંધનીય, સારો એવો ચોમાસા જેવો વરસાદ ખાબકયો હતો. ચીખલી તાલુકામાં વાતાવરણમાં પલટો આવી ભારે પવન સાથે ધોધમાર વરસાદ વરસ્યો હતો. સૌરાષ્ટ્રના ઉના, અમરેલીના ખાંભા, ગીર, ખડાધામર, મોટા બારમણ, બોરાળા, હનુમાનપુર, ચતુરી સહિના પંથકોમાં સતત બીજા દિવસે પણ કમોસમી વરસાદ વરસતાં સ્થાનિક ખેડૂતો ભારે ચિંતામાં ગરકાવ બન્યા હતા. સાવરકુંડલામાં પણ બાઢડા પંથકમાં ત્રણ ઇંચથી વધુ વરસાદ ખાબકતાં ખેડૂતોએ પાકની વ્યાપક નુકસાનની ફરિયાદ કરી હતી.

                 ખેડૂતોએ સારો પાક થવાની આશાએ ડાંગરની ખેતી કરી હતી ત્યારે ડાંગરનો પાક તૈયાર પણ થઈ ગયો હતો. જેનાથી ચાલુ વર્ષે સારા નફાની ખેડૂતોને આશા જાગી હતી પરંતુ અઢી ઈંચથી વધુ વરસાદ ખાબક્યો હતો. જેનાથી ખેડૂતોના ઉભા પાકને મોટું નુકસાન થયું છે. જ્યારે બીલીમોરામાં પડેલા વરસાદને પગલે નીચાણવાળા વિસ્તારોમાં પાણીનો ભરાવો થતા ટ્રાફિકજામના દ્રશ્યો સર્જાયા હતા. ડાંગ જિલ્લાના વઘઈમાં પણ અઢી ઈંચ જેટલો વરસાદના પગલે લોકોને મુશ્કેલીનો સામનો કરવો પડ્યો હતો. દિવાળી ટાણે દિવાળીની ખરીદી માટે નીકળેલા લોકો વરસાદને કારણે કલાકો સુધી દુકાનોમાં જ રોકાવા મજબૂર બન્યા હતા. દિવાળીના ફટાકડા અને દિવાળીનો રંગોળી અને સજાવટનો સામાન વેચવા માટે જાહેર માર્ગ પર બેસેલા લારી અને પાથરણાવાળા શ્રમજીવીઓ પણ માલ બચાવવા માટે અટવાતા જોવાયા હતા. મોસમે અચાનક કરવટ બદલતા પલટો આવ્યા બાદ વરસાદ વરસ્યો હતો. બીજી બાજુ હાલ કાપણીની સીઝન હોઇ ડાંગર હજી ખેતરમાં જ હોવાથી એ ભીનું થતા પાકને બચાવવા ખેડૂતોએ દોડ મૂકી હતી.

                  ખેતરમાં કાપેલા ડાંગરનો પાક ઝરમર વરસાદમાં ભીંજાય જતા ચિંતાનું મોજું ફરી વળ્યું હતું. કેટલાક ખેડૂતો કાપેલા ડાંગરને બચાવવા મથામણ કરી હતી. દક્ષિણ ગુજરાતના વાતવરણમાં પલટા સાથે વરસેલા વરસાદના પગલે જનજીવન પણ અસ્તવ્યસ્ત થઈ ગયું હતું. છેલ્લા ૨૪ કલાકમાં દક્ષિણ ગુજરાતમાં સૌથી વધુ વરસાદ ચીખલી અને વઘઈમાં અઢી ઈંચ પડ્યો હતો. જ્યારે દક્ષિણ ગુજરાતના ૨૫ તાલુકામાં ૧ મિમિથી લઈને અઢી ઈંચ જેટલો વરસાદ પડ્યો હતો. આ જ પ્રકારે સૌરાષ્ટ્રના અમરેલી, ખાંભા, ધારી, ગીર, ખડાધામર, મોટા બારણ, બોરાળા સહિતના પંથકોમાં પણ સારો એવો વરસાદ ખાબકયો હતો., જેથી ખેડૂતો પાકની નુકસાનીને લઇ ચિંતાતુર બન્યા હતા.