Gujarati News

અમદાવાદઃ સોશ્યલ મીડિયાનો દુરૂપયોગ કરીને અમદાવાદના એક ટીનેજરે એકતરફી પ્રેમમાં પાગલ થઇને યુવતિના ફોન નંબર સોશ્યલ મીડિયામાં મુકીને પતિની ગેરહાજરીમાં  સેક્સ ઇચ્‍છતી આ યુવતિ હોવાનું  દર્શાવી દેતા ખળભળાટ મચી ગયો છે.

શહેરના સુરધારા સર્કલ પાસે રહેતી અને શહેરની એક કંપનીમાં સીનિયર મેનેજર તરીકે જોબ કરતી યુવતીના એકપક્ષીય પ્રેમમાં પડોશમાં જ રહેતા ટીનેજરે યુવતી જ્હાનવી ઠાકરનો નંબર અને ફોટો ફેસબુક પરથી ઉઠાવીને એડલ્ટ હુકઅપ વેબસાઇટ પર અપલોડ કરી દીધો હતો. તેટલું જ નહીં તેણે યુવતીને પતિની ગેરહાજરીમાં સેક્સ ઇચ્છતી ગર્લ તરીકે દર્શાવી દીધી હતી અને સાથે આપેલા યુવતીના ફોન નંબર પર કોલ કરવા જણાવ્યું હતું. જેના કારણે યુવતી મુશ્કેલીમાં મુકાઈ હતી.

પોતાની ઓળખ છૂપાવવાની ના પાડતા જ્હાનવીએ કહ્યું કે, ‘આવા લોકોને સમાજ સમક્ષ લાવવા માટે માટે જાહેરમાં આવવું ખૂબ જરુરી છે. મને ગત 31 ડિસેમ્બરના રોજથી સતત સેક્સ્યુઅલ ફેવર માગતા અજાણ્યા કોલ આવવા લાગ્યા હતા. જે બાદ મને આવા જ એક કોલર દ્વારા જાણવા મળ્યું કે મારો આ ફોન નંબર તેમણે એક વેબસાઇટ પરથી મળ્યો જ્યાં મારો ફોટો અને સાથે હું લોકોને સેક્સ માટે આમંત્રણ આપતી હોઉં તેવો મેસેજ લખવામાં આવ્યો હતો.’

6 વર્ષની બાળકીની માતા જ્હાનવી પાસે ત્યાર બાદ કોઈ વિકલ્પ બચ્યો નહોતો તેણે સાયબર સેલમાં ફરિયાદ નોંધાવી હતી જોકે જે વેબસાઇટ પર નંબર મુકવામાં આવ્યો હતો તે વિદેશી હોવાના કારણે પહેલા FIR નોંધવા માટે કહેવામાં આવી હતી. વેબસાઇટ પર યુઝ કરવામાં આવેલ ફોટો તેના ફેસબુક પ્રોફાઇલ પરથી ઉઠાવવામાં આવ્યો હતો. જે બાદ તેને બે અલગ અલગ એસ્કોટ સર્વિસ આપતી વેબસાઇટ પર મુકવામાં આવ્યો હતો.

તપાસકર્તા અધિકારીએ જણાવ્યું કે, આ સાથે જ મેસેજ લખવામાં આવ્યો હતો કે, ‘મારા પતિ 17 દિવસ માટે બહારગામ હોવાથી જે લોકો સેક્સ ઇચ્છતા હોય તે પ્લીઝ આ નંબર પર કોન્ટેક્ટ કરો. મારી પાસે ફક્ત 17 દિવસ જ છે…’ જ્હાનવીએ કહ્યું કે, આવા લોકો પોતાની ગંદી કલ્પનાઓના કારણે કોણપ વ્યક્તિની આબરુ નિલામ કરી શકે છે તેમની સાથે કાયદાકીય પગલાથી કામ લેવું જ જોઈએ.

તેણે વધુમાં કહ્યું કે, ‘આ બધા જ મહિનાઓ દરમિયાન લોકો મારી તરફ આંગળી ઉઠાવતા હતા. એટલા માટે કે મારો ફોટોગ્રાફ પણ વેબસાઇટ પર હતો. જેના કારણે મને અત્યાર સુધીમાં 15000 જેટલા કોલ આવી ચૂક્યા છે અને એવું નથી કે ભારતમાંથી જ આવ્યા હોય વિદેશથી પણ કેટલાક લોકોએ તેઓ ભારત આવે ત્યારે તેમની સાથે સેક્સ્યુઅલ એન્કાન્ટરની માગણી કરી હતી. તો મારા સોશિયલ મીડિયા એકાઉન્ટ પર પણ અનેક ગંદા ગંદા મેસેજ આવ્યા છે. તમે કલ્પના પણ ન કરી શકો કે કેટલા માનસિક ત્રાસમાંથી હું પસાર થઈ છું.’

જ્યારે ફરિયાદના આધારે ક્રાઇમ બ્રાંચ સાઇબર સેલે વેબસાઇટ પર નંબર અપલોડ કરનાર ડિવાઇસનું IP એડ્રેસ શોધ્યું ત્યારે તે નંબર યુવતીની પડોશમાં જ રહેતા ટીનેજરનો નીકળ્યો. જેણે હમણાં જ ધો. 12ની એક્ઝામ આપી છે. ડીસીપી ડીપેન ભદ્રને કહ્યું કે, ‘અમે માઇનોર અપરાધી સામે ટૂંકમાં જ ચાર્જશીટ દાખલ કરીશું.’

જ્યારે જ્હાનવીએ પોલીસની કામગીરીથી અસંતોષ વ્યક્ત કરતા કહ્યું કે ‘મારી સાથે આવું ઘૃણાસ્પદ કૃત્ય કરનાર તે ટીનેજર આજે પણ તેના પિતાની કારમાં મારા ઘરની આસપાસ ફરે છે. તેના પિતા ખૂબ જ જાણિતા ફેક્ટરી માલિક છે. જેના ઘણે દૂર સુધી કોન્ટેક્ટ છે. મને બહાર જતા પણ ડર લાગે છે કે લોકો મારી સામે આંગળી ચિંધશે. મારી ચરીત્રનું ચીરહરણ કરનાર ગુનેગાર સજા વગર બચી જવો જોઈએ નહીં. હું છેવટ સુધીની કાયદાકીય લડાઈ લડીને જ જંપીશ.’