Gujarati News

અમદાવાદ, તા. ર૪ :  ગુજરાતની ૬ મહાનગર પાલિકાની ચૂંટણીમાં ભાજપને એક વખત ફરીથી જવલંત વિજય મેળવ્યો છે. ૬ મહાનગર પાલિકાની કુલ ૫૭૬ બેઠકોમાંથી ૪૮૦થી વધુ બેઠકો ભાજપે જીતી લીધી છે. ભાજપના ભવ્ય વિજયને ઉજવવા માટે ગઈકાલે ખાનપુર સ્થિત પાર્ટીના જૂના કાર્યાલય ખાતે એક ખાસ કાર્યક્રમ યોજાયો હતો. જેમાં ભાજપના પ્રદેશ અધ્યક્ષ સીઆર પાટીલ, મુખ્યમંત્રી વિજય રૂપાણી અને નાયબ મુખ્યમંત્રી નીતિન પટેલ સહિતના નેતાઓ ઉપસ્થિત રહ્યાં હતા.

આ કાર્યક્રમમાં સંબોધન દરમિયાન મુખ્યમંત્રી વિજય રૂપાણીએ કોંગ્રેસને આડેહાથ લેતા ભાજપને જીતાડવા બદલ મતદારોનો આભાર માન્યો હતો. મુખ્યમંત્રીએ ભાજપના કાર્યકર્તાઓની મહેનતને પણ બિરદાવી હતી. મુખ્યમંત્રી વિજયભાઇ રૂપાણીએ જણાવ્યું કે, રાજ્યની ૬ મહાનગર પાલિકામાં મતદારોએ કોંગ્રેસને એવો જાકારો આપ્યો છે કે, અનેક ઠેંકાણે તેમની ડિપોઝીટો પણ ડૂલ થઈ ગઈ છે. આ ચૂંટણીમાં અમને પણ દયા આવી જાય તેટલી બેરહેમીથી જનતાએ કોંગ્રેસના મતદારોને માર્યા છે.

કોંગ્રેસે ખેડૂત આંદોલનના, મોંઘવારી અને ભ્રષ્ટાચારના નામે ગુજરાતની જનતાને ગેરમાર્ગે દોરવાની જ કામગીરી કરી છે. કોંગ્રેસને જાકારો આપીને પ્રજાએ ભાજપની નીતિ અને નિયત પર વિશ્વાસ મૂક્યો છે. આ સાથે જ દરેક કોર્પોરેટરને જનતાએ ભાજપમાં મૂકેલો વિશ્વાસ એળે ના જાય, તો માટે ૫ વર્ષ સુધી સતત સંઘર્ષ કરવા આહવાન કર્યું છે. આજે ભાજપને સાથ આપનારા મતદારોએ આપેલો ચૂકાદો માત્ર ટ્રેલર છે, ૨૦૨૨માં આનાથી પણ વધારે સારૂ પિક્ચર જોવા મળશે.

આ તકે ભાજપના પ્રદેશ અધ્યક્ષ સીઆર પાટીલે જણાવ્યું કે, ૩૦ વર્ષોથી ગુજરાતની જનતાનો ભાજપ પર અડીખમ ભરોસો છે. ભાજપ વિરોધીની નબળાઈથી નહીં, પરંતુ પોતાના કાર્યોથી જીતે છે. તેમણે પાર્ટીના વિજય બગલ જનતાનો આભાર માન્યો છે.

જ્યારે નાયબ મુખ્યમંત્રી નીતિન પટેલે જાહેર સભાને સંબોધતા જણાવ્યું કે, ગુજરાતના આરોગ્ય મંત્રી તરીકે હું રાજ્યને કોરોના મુક્ત કરવા માંગુ છુ. આ સાથે જ મારી ઈચ્છા ગુજરાતમાંથી કોંગ્રેસ મુક્ત થાય તેવી છે. અગાઉ મતદાન ઓછું થવાના અહેવાલ બાદ મેં ધારણાં કરી હતી તે મુજબ ભાજપનો ભવ્ય વિજય થયો છે. કોંગ્રેસની સ્થિતિ ક્યાંય સારી નથી. સુરતમાં સોનિયાપ્રરાહુલને સમ ખાવા પૂરતાં કોઈ કોર્પોરેટર બચ્યા નથી. ગુજરાતના મતદારોએ બધુ જ પૂરુ કરી નાંખ્યું છે. કોંગ્રેસના બનાવટી અને ઘસાઈ ગયેલા સિક્કાને જનતાએ નકારી દીધો છે.