Gujarati News

અમદાવાદ, તા.૨૩: કોરોનાને કારણે કોઈ વ્યકિતએ દારુ પીધો છે કે કેમ તે ચેક કરવા તેનું મોઢું ના સૂંઘવું તેવો આદેશ તમામ પોલીસકર્મીને અપાયો છે. દારુડિયાનું મોઢું સૂંઘ્યા વિના જ તે ખરેખર નશાની હાલતમાં છે કે કેમ તે જાણવું મુશ્કેલ તો છે, પરંતુ પોલીસવાળાની અનુભવી નજર મોઢું સૂંઘ્યા વિના જ વ્યકિતની આંખો જોઈને તેણે દારુ પીધો છે કે નહીં તેનો અંદાજ લગાવી શકે છે. તેવામાં હવે કોઈની આંખ લાલ છે કે કેમ તે જોઈને પોલીસ તેણે દારુ પીધો છે કે નહીં તે ચેક કરશે.

થર્ટી ફર્સ્ટને હવે ખાસ દિવસો નથી બચ્યા. ન્યૂ યરની પાર્ટી દારુ વિના અધૂરી ગણાય તેવું માનનારો મોટો વર્ગ છે, પરંતુ આવા લોકોને મોઢું સૂંઘ્યા વિના જ પકડવા માટે હવે પોલીસ પર્યાપ્ત માત્રામાં બ્રેથ એનાલાઈઝર ઉપલબ્ધ ના હોવાના કારણે દારુડિયાને પકડવા અવનવા રસ્તા શોધી રહી છે. તેમ ટાઇમ્સ ઓફ ઇન્ડીયાનો અહેવાલ જણાવે છે.

સૂત્રોનું માનીએ તો મોઢું સૂંઘવા પર મનાઈ હોવાના કારણે આ વખતની થર્ટી ફર્સ્ટ પર પોલીસના હાથે ઝડપાયેલા દારુડિયાનો આંકડો ઓછો રહે તેવી શકયતા છે. પોલીસ આંખો જોઈને પીધેલાને પકડી શકે છે, પરંતુ આંખ લાલ હોવાના કારણ બીજા પણ હોઈ શકે છે. જેમ કે, કોઈ ગુસ્સામાં હોય, પૂરતી ઊંઘ ના મળી હોય કે પછી કોઈ પ્રકારની દવા ચાલતી હોય તો પણ વ્યકિતની આંખ લાલ હોઈ શકે.

એક સિનિયર પોલીસ અધિકારીના જણાવ્યા અનુસાર, હવે કોઈ દારુડિયો પકડાય તો તે અંગેની FIRમાં એવો ઉલ્લેખ કરવામાં આવશે કે પકડાયેલા વ્યકિતની આંખો લાલ અને નશામાં ઘેરાયેલી હતી. ટેકનોલોજીના જમાનામાં પોલીસ ટ્રાફિકના નિયમોને તોડનારા લોકોને મેમો ફટકારવા ભલે કેમેરાનો ઉપયોગ કરતી હોય, પરંતુ દારુડિયાને પકડવા માટે તે હજુય ટેકનોલોજી પર ઓછો અને મોઢા કે પછી આંખ પર વધારે આધાર રાખી રહી છે.

અગાઉ દારુડિયાના કેસમાં પોલીસ એવું નોંધતી હતી કે આરોપીનું મોઢું પોલીસકર્મી તેમજ પંચ દ્વારા સૂંદ્યવામાં આવ્યું હતું અને તેમાંથી દારુની વાસ આવતી હતી. જોકે, કોરોનાને કારણે કોઈ આરોપીનું મોઢું ના સૂંદ્યવું તેવો તમામ પોલીસકર્મીઓને આદેશ અપાયો છે.

જે વ્યકિતની આંખો લાલ હશે તેને પોલીસ ચલાવીને પણ જોશે. જો વ્યકિત લથડીયા ખાશે તો તેના પર પ્રોહિબિશનની લાગતી-વળગતી કલમ હેઠળ ગુનો નોંધવામાં આવશે, અને બાદમાં તેનો મેડિકલ ટેસ્ટ પણ કરાશે. પોલીસ આ અઠવાડિયાથી જ લોકોને ચેક કરવાનું શરુ કરશે, જેમાં લાલ આંખ હોય તેવા લોકો પર ખાસ નજર રખાશે.