Gujarati News

Gujarati News

News of Thursday, 22nd October 2020

રાજ્યમાં છેલ્લા છ મહિનામાં ઈ-પેમેન્ટ થકી 4.76 લાખ દસ્તાવેજની નોંધણી

20 ઓક્ટોબર સુધી ગરવી વેબસાઈટ મારફતે 4,76,054 દસ્તાવેજો નોંધાયા: રૂપિયા 773.63 કરોડની આવક

અમદાવાદ : વૈશ્વિક કોરોના મહામારીના સમયમાં રાજ્યમાં કોરોના સંક્રમણ અટકે તથા દસ્તાવેજ નોંધણીને સંલગ્ન પ્રક્રિયા પણ કાર્યરત રહે તેને ધ્યાનમાં લઇને નોંધણી ફીની ફરજીયાત ઇ-પેમેન્ટથી ચુકવણી કરવા તથા દસ્તાવેજ નોંધણી માટે ફરજીયાત અપોઇન્ટમેન્ટ મેળવવાની જોગવાઈ કરવામાં આવી હતી. જે અંતર્ગત છેલ્લા છ માસમાં રાજ્યમાં દસ્તાવેજ નોંધણીની ઈ-પેમેન્ટ વ્યવસ્થા થકી 4.76 લાખ દસ્તાવેજની નોંધણી કરવામાં આવી છે.

તારીખ 24 એપ્રિલ 2020થી દસ્તાવેજ નોંધણી માટે નોંધણી ફીની ચુકવણી ઇ-પેમેન્ટથી કરવા અને અપોઇન્ટમેન્ટ મેળવવાની પ્રક્રિયા કાર્યરત છે. આ દસ્તાવેજ નોંધણીની પ્રકિયા એકદમ સરળાતાથી કામ કરે છે. આ પ્રક્રિયા દરમિયાન અરજદારને હાલાકી ન પડે તે માટે egaravi.gujarat.gov.in વેબસાઇટ પર “માર્ગદર્શિકા”(ઇ-પેમેન્ટ પ્રક્રિયાની સચિત્ર સમજૂતી) મુકવામાં આવી છે. જો કોઇ અરજદારને દસ્તાવેજ નોંધણી અંગે મુશકેલી કે પ્રશ્ન હોય તો જિલ્લાના નોંધણી નિરીક્ષકને અથવા રાજયની વડી કચેરીના મદદનીશ નોંધણી સર નિરીક્ષકનો સંપર્ક કરી શકે છે.

યાદીમાં વિશેષમાં જણાવાયું છે કે, તા. 24 એપ્રિલ 2020થી 20 ઓક્ટોબર 2020 સુધી ગરવી વેબસાઈટ મારફતે 4,76,054 દસ્તાવેજો નોંધાયા છે તથા રૂપિયા 773.63 કરોડની આવક થઈ છે. આ તમામ નોંધણી ફીનું સફળતાપૂર્વક ઓનલાઈન પેમેન્ટ થયું છે. આ છ મહિનાના સમયગાળામાં જે તે અરજદારની વ્યક્તિગત ભુલ, મિલકતની લે-વેચના નિર્ણયમાં થયેલ ફેરફાર અને સિસ્ટમને કારણે થયેલ ભુલને કારણે માત્ર 548 કિસ્સામાં જ નોંધણી અને સ્ટેમ્પડ્યુટી રીફંડના કિસ્સા ઉદભવ્યા છે. જે 4,76,054 લાખ સફળ ટ્રાન્ઝેકશનના પ્રમાણમાં ખૂબ જ ઓછુ અવગણી શકાય એટલું 0.11 % છે.

(9:10 am IST)