Gujarati News

અમદાવાદ: શહેરના સેટેલાઈટના જોધપુર ગામમાં બંધન પાર્ટી પ્લોટ નજીક બિલ્ડરની પુત્રીની છેડતી કરનાર સ્વિગી- ઝોમેટો કંપનીના ફૂડ ડિલિવરી બોયની આનંદનગર પોલીસે ધરપકડ કરી છે. પોલીસે સીસીટીવી ફૂટેજના  આધારે આરોપીને  ઝડપી લીધો છે.

 આ અંગેની વિગત મુજબ સેટેલાઈટ વિસ્તારમાં રહેતાં બિલ્ડરની 22 વર્ષીય પુત્રી તેના ઘરેથી વોક કરવા માટે નીકળી હતી. તે ચાલતી ચાલતી જોધપુર ગામમાં આવેલા બંધન પાર્ટી પ્લોટ પાસે પહોંચી હતી. તે સમયે અચાનક પાછળથી આવેલા એક્ટિવા ચાલક યુવકે યુવતીને પાછળના ભાગે ટપલી મારી હતી. બાદમાં યુવક એક્ટિવા લઈ પુરઝડપે ફરાર થઈ ગયો હતો. 

યુવતીએ ઘરે જઈ પરિવારને વાત કરી હતી. આ મામલે આનંદનગર પોલીસ સ્ટેશનમાં ફરિયાદ નોંધાવતા આરોપી વિરુદ્ધ ગુનો નોંધી અલગ અલગ ટીમોએ સીસીટીવી ફુટેજથી તપાસ હાથ ધરી હતી. આનંદનગર પોલીસે અલગ અલગ સીસીટીવી ફૂટેજ જોતા એક એક્ટિવા ચાલક જતા દેખાયો હતો અને તેના આધારે પોલીસ આરોપી આશિષ ઠાકોરની ધરપકડ કરી હતી.

આનંદ નગર પોલીસ સ્ટેશનના પીઆઇ એસ.જે.બલોચે જણાવ્યું હતું કે સેટેલાઇટમાં ગોકુલ આવાસમાં જ રહેતો યુવક આશિષ ઠાકોર મિત્રનું એક્ટિવા લઇ ત્યાંથી નીકળ્યો હતો અને યુવતીને જોતા તેની છેડતી કરી નાસી ગયો હતો.

સીસીટીવી ફુટેજમાં આરોપી એક્ટિવા પર જતાં દેખાતા તપાસ બાદ ઝડપી પૂછપરછ કરી હતી. આરોપી સ્વીગી અને ઝોમેટોમાં ફૂડ ડિલિવરીનું અને પરચુરણ કામ કરે છે. હાલ તેની ધરપકડ કરવામાં આવી છે.