Gujarati News

Gujarati News

News of Thursday, 22nd April 2021

કપરડાના મોટાપોઢાની યુવતિ કાલે લગ્નના બંધને બંધાઇને સાસરે જાય તે પહેલા પીપીઇ કીટ પહેરાવીને દુનિયામાંથી વિદાય આપવાની ફરજ પડી

વાપી: કોરોના મહામારીમાં સૌથી મોટું જોખમ કોરોના વોરિયર્સ પર છે. જીવને જોખમમાં મૂકીને તેઓ સતત ફરજ બજાવી રહ્યાં છે. અત્યાર સુધી ન જાણે કેટલાય કોરોના વોરિયર્સ આ લડાઈમાં મોતને ભેટ્યા છે. છતાં જુસ્સો હાર્યા વગર અન્ય વોરિયર્સ સતત કામ કરતા રહે છે. વાપીની એક કોરોના વોરિયર જીવન સામેની જંગ હારી ચૂકી છે. પરંતુ દુખદ વાત એ છે, આવતીકાલે 23 એપ્રિલે જેના લગ્ન થવાના હતા, તે જ મોતને ભેટી છે. જેને આવતીકાલે સાસરે વિદાય કરવાની હતી, તેને પીપીઈ કીટ પહેરાવીને દુનિયામાંથી વિદાય આપવાની ફરજ પડી હતી. 

કપરાડાના મોટાપોંઢામાં રહેતી મનીષા પટેલ નર્સિંગનો કોર્સ કરી વાપીની ખાનગી હોસ્પિટલમાં નર્સ તરીકે સેવા પણ આપી ચૂકી છે. હાલ કોઇ હોસ્પિટલમાં ફરજ બજાવતી ન હતી. પરંતુ પરિવારે આવતીકાલે 23 એપ્રિલે તેના લગ્ન લીધા હતા. તેના લગ્ન માટેની તમામ તૈયારીઓ ચાલી રહી હતી. આ વચ્ચે જ મનીષા કોરોના પોઝિટિવ નીકળી હતી. થોડા દિવસો પહેલા મનીષાને તાવ આવતા તેને સેલવાસની ખાનગી હોસ્પિટલમાં ખસેડાઈ હતી. જ્યાં વધુ તબિયત લથડતાં વેન્ટિલેટર સારવાર ચાલુ હતી. પરંતુ બુધવારે મનીષા કારોના સામે હારી ગઇ હતી.

જે દિવસે મનીષાનું મોત થયું તે દિવસે તેને લગ્નની પીઠી લાગવાની હતી. ઘરે લગ્નનો મંડપ પણ નાંખી દેવામાં આવ્યો હતો, આવતીકાલે 23 એપ્રિલે તેના લગ્ન હતા. લગ્નની તૈયારીઓ આટોપી લેવાઈ હતી, અને મનીષાના ઘરે આવવાની રાહ જોવાઈ રહી હતી. પરંતુ તે પહેલા જ કન્યા મોતને ભેટી હતી. કોરોનાએ પટેલ પરિવારની ખુશીને છીનવી લીધી હતી.

ઉલ્લેખનીય છે કે, તાપી જિલ્લામાં પણ કોરોનાનો વિસ્ફોટ થયો છે. જિલ્લામાં અત્યાર સુધીના સૌથી વધુ કોરોના પોઝીટીવ કેસ નોંધાયા છે. ગત 24 કલાકમાં જિલ્લામાં કુલ 115 કોરોના પોઝીટીવ કેસ નોંધાયા છે. હાલ જિલ્લામાં 450 એક્ટિવ કેસ છે. તો સામે 26 દર્દીને ડિસ્ચાર્જ કરવામાં આવ્યા છે.

(4:27 pm IST)
  • મુખ્યમંત્રી વિજયભાઈ રૂપાણીએ એક આદેશ જાહેર કર્યો છે અને પોલીસતંત્રને કહ્યુ છે કે સ્કુટર ચાલકો અને મોટર ચાલકો પાસેથી માસ્ક પહેર્યુ ન હોય તે સિવાય બીજો કોઈપણ દંડ હાલના સંજોગોમાં વસૂલવો નહિં access_time 6:08 pm IST

  • આજે રાજકોટ કોર્પોરેશને સાંજે જે નવા કોરોના કેસની યાદી બહાર પાડી છે તેમા અને ગાંધીનગરથી છેલ્લા 24 કલાક ના નવા કોરોના કેસના અકડાઓમાં વિસંગતતા જણાતા અકિલા એ રાજકોટ મ્યુ. કમિશ્નર શ્રી ઉદિત અગ્રવાલ ને આ બાબતે પૂછતાં તેમણે સ્પષ્ટતા કરી હતી કે રાજકોટ કોર્પોરેશને સાંજે જે આંકડાઓ દર્શાવ્યા છે તે છેલ્લા 24 કલાકના છે, નહિ કે બપોરથી સાંજના. એટલે રાજકોટ શહેરમાં છેલ્લા 24 કલાકમાં 397 નવા કોરોના કેસ નોંધાયાનું શ્રી ઉદિત અગ્રવાલે અકિલા ને જણાવ્યું છે. access_time 9:23 pm IST

  • દેશમાં કોરોનાએ હાહાકાર મચાવ્યો : તમામ રેકોર્ડ તોડ્યા : રાત્રે 12 વાગ્યા સુધીમાં કોરોનાના નવા સર્વાધિક 3.15.552 કેસ નોંધાયા : કુલ કેસની સંખ્યા 1.59.24.806 થઇ : એક્ટિવ કેસ 22.84.248 થયા : વધુ 1.79.407 દર્દીઓ સ્વસ્થ થતા કુલ 1,34,49,406 સ્વસ્થ થયા : વધુ 2101 લોકોના મોત સાથે કુલ મૃત્યુઆંક 1,84,672 થયો : દેશમાં સૌથી વધુ મહારાષ્ટ્રમાં નવા 67,468 નવા કેસ નોંધાયા access_time 1:39 am IST