Gujarati News

Gujarati News

News of Thursday, 22nd February 2024

ત્રીજુ બાળક થતા મહિલા સરપંચને હોદ્દો છોડવા મળી નોટિસઃ હાઈકોર્ટે આપી મોટી રાહત

આ કેસ દાહોદ જિલ્લાના કરોડિયા પૂર્વા ગ્રામ પંચાયતના સરપંચ રાધિકા નિનામાનો છે : તેમને બે બાળકોના નિયમના ભંગ બદલ સરપંચ પદે કેમ હટાવવામાં ન આવે તે જણાવતી શો-કોઝ નોટિસ ફટકારવામાં આવી હતી

અમદાવાદ, તા.૨૨: ત્રણ બાળકોના કારણે મહિલા સરપંચને હોદ્દા પરથી હટાવવા માટે આદેશ પર ગુજરાત હાઈકોર્ટે સ્‍ટે આપ્‍યો છે. સરપંચ તરીકેના પોતાના કાર્યકાળ દરમિયાન મહિલાએ ત્રીજા બાળકને જન્‍મ આપ્‍યો હતો. જેના કારણે બે બાળકના નિયમના ભંગ બદલ તેમને સરપંચ પદેથી હટાવવાનો કોઈ પણ અંતિમ આદેશ પસાર કરવા સામે હાઈકોર્ટે સરકારને સ્‍ટે આપ્‍યો છે. આ કેસ દાહોદ જિલ્લાના કરોડિયા પૂર્વા ગ્રામ પંચાયતના સરપંચ રાધિકા નિનામાનો છે. ડિસેમ્‍બર ૨૦૨૧માં તેઓ સરપંચ તરીકે ચૂંટાયા હતા. ત્‍યારે તેમને બે દીકરીઓ હતી અને તેના કારણે તેઓ સ્‍થાનિક સંસ્‍થાઓની ચૂંટણી લડવા માટે લાયક હતા. જોકે, ઓગસ્‍ટ ૨૦૨૩માં તેમણે પોતાના ત્રીજા બાળકને જન્‍મ આપ્‍યો હતો. જેના કારણે બે ગ્રામજનોએ અધિકારીઓના ધ્‍યાન પર આ વાત લાવી હતી. તેમણે અયોગ્‍યતાના નિયમોને ટાંકીને તેમને પદ પરથી હટાવવાની માંગ કરી હતી.

ફતેપુરાના તાલુકા વિકાસ અધિકારીએ આ અંગે રાધિકા નિનામાને કારણદર્શક નોટિસ જારી કરી હતી. જેમાં તેમને ગુજરાત પંચાયત એક્‍ટ ૧૯૯૩ની કલમ ૩૧(૧)(m) હેઠલ બેથી વધુ બાળકો હોવાના કારણે ગેરલાયક ઠર્યા હોવાના કારણે તેમને હોદ્દા પરથી શા માટે દૂર ન કરવામાં આવે તે અંગે જવાબ માંગવામાં આવ્‍યો હતો. જોકે, નિનામાએ આ નોટિસને પડકારી હતી અને તેમના વકીલે દલીલ કરી હતી કે સરપંચનું પદ પંચાયતના અન્‍ય સભ્‍યો કરતા અલગ છે. કલમ ૩૦ પંચાયતના સભ્‍યોને લાગુ પડે છે અને સરપંચના કિસ્‍સામાં તે ઈપ્‍સો ફેક્‍ટો લાગુ થશે નહીં. સરપંચની ગેરલાયકાતની માંગ કરવા માટે કલમ ૩૦ની અરજી અધિકારક્ષેત્ર વિના છે તેમ તેમણે નોટિસને પડકારી હતી.

વધુમાં એવી દલીલ કરવામાં આવી હતી કે બે-બાળકના નિયમના ઉલ્લંઘનના કિસ્‍સામાં ગેરલાયકાત માત્ર પંચાયત સભ્‍યોને જ લાગુ પડે છે અને સરપંચ માત્ર પંચાયતના હોદ્દેદાર સભ્‍ય છે. એવી દલીલ પણ કરવામાં આવી હતી કે ગામના સરપંચને કલમ ૩૦ લાગુ પડવી તે ડિવિઝન બેંચ સમક્ષ નિર્ણય માટે પેન્‍ડિંગ છે, જેણે સરપંચને દૂર કરવા પર રોક લગાવી છે. કેસની સુનાવણી કર્યા પછી જસ્‍ટિસ વી ડી નાણાવટીએ રાજ્‍ય સરકાર પાસેથી જવાબ માંગ્‍યો હતો અને સત્તાવાળાઓને આદેશ આપ્‍યો હતો કે તેઓ આગામી આદેશો સુધી આ મુદ્દા પર અંતિમ નિર્ણય ન લે. આ મામલે હવે વધુ સુનાવણી ૧૩ માર્ચે યોજવામાં આવશે.

(4:47 pm IST)