Gujarati News

Gujarati News

News of Wednesday, 21st March 2018

એન્ફ્રા લાગુ કરવાની કેન્દ્રની તજવીજ સામે સીએ નારાજ

પંજાબ નેશનલ બેંકના હજારો કરોડના કૌભાંડ બાદઃ સીએ દ્વારા કાળી પટ્ટી ધારણ કરી વિરોધ કરાયો: કોર્પોરેટ મંત્રાલયના રિજિયોનલ ડાયરેકટરને આવેદનપત્ર સુપરત

અમદાવાદ,તા. ૨૧: પંજાબ નેશનલ બેંકના હજારો કરોડના કૌભાંડ બાદ કેન્દ્ર સરકાર અને ેતેની એજન્સીઓ દ્વારા નીરવ મોદી, મેહુલ ચોકસી જેવા ડિફોલ્ટરો સામે સબક સમાન કાર્યવાહી કરવાના બદલે દોષનો ટોપલો ચાર્ટર્ડ એકાઉન્ટન્ટ્સ પર ઢોળવાના પ્રયાસની તેમ જ સીએ પર ગાળિયો કસતી નેશનલ ફાયનાન્સીયલ રિપોર્ટીંગ ઓથોરીટી(એન્ફ્રા)ની જોગવાઇઓ લાગુ કરવાની કેન્દ્ર સરકાર દ્વારા થઇ રહેલી તજવીજના વિરોધમાં આજે અમદાવાદ શહેરમાં ચાર્ટર્ડ એકાઉન્ટન્ટ્સ દ્વારા ધી ટેક્સ પેયર્સ પ્રોટેકશન કાઉન્સીલ, જાગેગા ગુજરાત સંઘર્ષ સમિતિના નેજા હેઠળ  સીએ આલમ દ્વારા વિરોધદર્શક કાર્યક્રમ યોજાયો હતો. ચાર્ટર્ડ એકાઉન્ટન્ટ્સ દ્વારા હાથ પર કાળી પટ્ટી ધારણ કરી કેન્દ્ર સરકારની સરમુખત્યારશાહીનો વિરોધ કરાયો હતો. દરમ્યાન આજે સાંજે ટેક્સ પેયર્સ પ્રોટેકશન કાઉન્સીલના પ્રવકતા અને જાગેગા ગુજરાત સંઘર્ષ સમિતિના પ્રમુખ પ્રકાશ કાપડિયા, જનરલ સેક્રેટરી રોહિત પટેલ(એડવોકેટ) સહિતના અગ્રણીઓના પ્રતિનિધિમંડળ દ્વારા કોર્પોરેટ મંત્રાલયના રિજિયોનલ ડાયરેકટરને એક વિસ્તૃત આવેદનપત્ર પણ સુપ્રત કરવામાં આવ્યું હતું. પ્રતિનિધિમંડળ તરફથી આ આવેદનપત્ર વડાપ્રધાન નરેન્દ્ર મોદી, કેન્દ્રીય નાણાંમંત્રી, ગુજરાતના રાજયપાલ, મુખ્યમંત્રી સહિતના સંબંધિત સત્તાવાળાઓને પણ પાઠવવામાં આવ્યું હતું. ટેક્સ પેયર્સ પ્રોટેકશન કાઉન્સીલના પ્રવકતા અને જાગેગા ગુજરાત સંઘર્ષ સમિતિના પ્રમુખ પ્રકાશ કાપડિયા, જનરલ સેક્રેટરી રોહિત પટેલે આ અંગે જણાવ્યું હતું કે, પંજાબ નેશનલ બેંક સહિતની બેંકોમાં વીલફુલ ડિફોલ્ટરો દ્વારા હજારો કરોડના કૌભાંડો આચર્યા બાદ હવે દેશની બેંકોમાં લોકોના માનસપટ પર એવો ડર પેસી ગયો છે કે, તેમની મહેનત પરસેવાની કમાણી હવે બેંકોમાં પણ સલામત નથી. કારણ કે, બેંકોમાં વીમાકવચ હેઠળ થાપણદારોને માત્ર એક લાખનું જ વીમાકવચ છે, જે વધારી દસ લાખ કરવા અમે વર્ષોથી માંગણી કરી છે અને ખુદ આરબીઆઇએ ૨૦૧૪માં તે વધારવાની હૈયાધારણ આપી હોવાછતાં આજદિન સુધી તે અંગે કોઇ નિર્ણય લેવાયો નથી. જેના કારણે આજે દેશની બેંકોમાં પ્રજાના નાણાં સલવાયા છે. બીજીબાજુ, નીરવ મોદી, વિજય માલ્યા, મેહુલ ચોકસી જેવા ડિફોલ્ટરો હજારો કરોડની લોન લઇ વિદેશ ભાગી જાય છે અને દોષનો ટોપલો સીએ પર ઢોળી દેવાનો પ્રયાસ થાય છે. પીએનબી કૌભાંડ બાદ કેન્દ્ર સરકાર પોતાનો દોષનો ટોપલો બીજાની પર ઢોળવા અને વિષયથી ધ્યાન ભટકાવવા માટે હવે એન્ફ્રાની જોગવાઇઓ કે જેમાં સીએ પર ગાળિયો કસવાની વાત છે તે લાગુ કરવાની તજવીજ હાથ ધરી રહી છે, જેને લઇ ગુજરાત સહિત દેશભરના સીએ આલમમાં ઉગ્ર રોષ અને વિરોધની લાગણી ફેલાઇ છે. ટેક્સ પેયર્સ પ્રોટેકશન કાઉન્સીલના પ્રવકતા પ્રમુખ પ્રકાશ કાપડિયા અને જનરલ સેક્રેટરી રોહિત પટેલે ઉમેર્યું હતું કે, ખુદ આરબીઆઇએ ૨૦૧૬માં બેકીંગસીસ્ટમની સલામતી માટે સ્વીફ્ટ સીસ્ટમ અને સીબીએસ સીસ્ટમને લીંક કરવા સૂચના આપી હોવાછતાં તે લીંક નહી કરાતાં પંજાબ નેશનલ બેંકના કૌભાંડ જેવા મોટા કૌભાંડો આચરાયા, આવા તમામ કૌભાંડોની જવાબદારી કેન્દ્ર સરકાર, નાણાં મંત્રાલય અને આરબીઆઇના ગવર્નરની બને છે. થાપણદારોના હિતમાં અને તેઓની જીવનભરની મૂડીની સલામતી માટે આગામી દિવસોમાં આ સમગ્ર મામલે રાજયવ્યાપી આંદોલનની ચીમકી પણ તેમણે ઉચ્ચારી હતી.

(9:36 pm IST)
  • વિશ્વના સૌથી ઊંચા શિખર માઉન્ટ એવરેસ્ટ પર પ્રવાસીઓ અને પવર્તારોહકો દ્વારા ફેંકવામાં આવેલો કરચો કિલોમાં નહીં પણ ટનમાં છે. અહીં અંદાજે 100 ટન કચરો એકત્ર થયેલો છે. જેને એકત્ર કરી એરલિફ્ટ કરવાનું અભિયાન શરૂ કરવામાં આવ્યું છે. અભિયાનના પહેલા દિવસે 1200 કિલો કચરો લુકલા ઍરપૉર્ટથી કાઠમંડૂ 'ઍરલિફ્ટ' કરવામાં આવ્યો જે રિસાઇકલ માટે મોકલવામાં આવ્યો. access_time 2:12 am IST

  • પત્ની હસીન જહાંએ શમી પર મેચ ફિક્સિંગના આરોપ બાદ ભારતીય ઝડપી બોલર મોહંમદ શમીની મુશ્કેલી સતત વધી રહી છે. ત્યારે આ વિવાદનો અંત લાવવા મમતા બેનર્જી બંને વચ્ચે રહેલા વિવાદને ઉકેલવાની કોશિશ કરશે.હવે 23 માર્ચે ક્રિકેટર શમીની પણ મુખ્યમંત્રી સાથે મુલાકાત થવાની છે. access_time 2:13 am IST

  • ઇન્ડિયન ઇન્સ્ટિટ્યૂટ ઓફ મેનેજમેન્ટ (આઇઆઇએમ) જેવી પ્રતિષ્ઠિત સંસ્થાઓના હવેથી આધ્યાત્મિકતા અને માનવીય મૂલ્યોનું શિક્ષણ પણ આપવામાં આવશે. જેથી ભવિષ્યના મેનેજર્સ દબાણ વચ્ચે પણ શાંતિનો અનુભવ લઈ શકે. આઇઆઇએમ-અમદાવાદ ખાતે ભવિષ્યના કોર્પોરેટ લીડર્સને ભગવદ્‌ગીતાના પાઠ ભણાવવામાં આવી રહ્યા છે. આઇઆઇએમના પ્રોફેસરે જણાવ્યું કે તેનાથી સ્ટ્રેસમાં ઘટાડો થશે. access_time 2:12 am IST