Gujarati News

Gujarati News

News of Wednesday, 21st March 2018

સેટેલાઈટમાં પત્નીને મિત્ર સાથે રંગે હાથે પતિએ ઝડપી પાડતા મામલો બિચક્યો

અમદાવાદઃ સેટેલાઈટમાં પતિ, પત્ની ઔર વોનો કિસ્સો પ્રકાશમાં આવ્યો છે. જેમાં પતિના મિત્ર સાથે પત્નીની આંખ મળી જતાં પ્રેમના અંકુર ફૂટયા હતા અને પછી તો પૂછવું શું ? બીજી તરફ પ્રેમ ગમે તેટલો છુપાવો છતાં છૂપો રહેતો નથી અને એક દિવસ તો ભાંડો ફૂટયા વિના રહેતો નથી. સેટેલાઈટમાં પતિએ પોતાની પત્નીને જ્યારે પોતાના મિત્ર સાથે પ્રેમાલાપ કરતાં રંગેહાથ પકડી ત્યારે મામલો બિચક્યો હતો. સમગ્ર મામલો પોલીસ સ્ટેશન સુધી પહોંચ્યો હતો અને પોલીસે મધ્યસ્થી કરી મામલો થાળે પાડયો હતો.

સેટેલાઈટમાં સંજય તેની પત્ની રિમા સાથે રહે છે. સંજયનો મિત્ર રાકેશ અવારનવાર ઘરે આવતો હતો તે દરમિયાન રાકેશ અને રિમાની આંખો મળી જતાં સંબંધ પ્રેમમાં પરિણમ્યો હતો. રિમા પ્રેમમાં પાગલ થઈ ગઈ હતી અને બંને બહાર મળવા પણ લાગ્યાં હતાં. દરમિયાન સંજયને શંકા જતાં બંને મિત્રો વચ્ચેની મિત્રતામાં ખટાશ આવી ગઈ હતી. સંજયની ગેરહાજરીમાં રાકેશ ઘરે આવતો હતો અને રિમાની સાથે પ્રેમના ગુલ ખીલવતો હતો. સંજયને દાળમાં કશુંક કાળું હોવાની પ્રતીતિ થવા લાગી હતી આથી તેને રિમા ઉપર વોચ રાખવાનું નક્કી કર્યું હતું.

દરમિયાન એક દિવસ સંજયે પત્ની રિમાને રાકેશ સાથે પ્રેમાલાપ કરતાં પકડી પાડી હતી. જેમાં રિમા તો ભાગી ગઈ હતી પરંતુ, રાકેશ હાથમાં આવી જતાં પોલીસને ફોન કર્યો હતો અને મામલો પોલીસસ્ટેશન સુધી પહોંચ્યો હતો. સંજય અને તેના મિત્રોએ પોલીસસ્ટેશનમાં રાકેશને મારવા લીધો હતો. જેમાં પોલીસ અધિકારીઓ વચ્ચે પડયા હતા. બીજી તરફ રાકેશે સંજયના આક્ષેપોને નકાર્યા હતા.

(6:24 pm IST)