Gujarati News

પ્રશાંત રુપેરા, વડોદરાઃ વડાપ્રધાન મોદીએ તેમના સમકક્ષ જાપાનીઝ વડાપ્રધાન શિન્ઝો આબે સાથે મળીને પહેલી ભારતીય બુલેટ ટ્રેનના પ્રોજેક્ટને લોંચ કર્યાના લગભગ એક વર્ષ પછી જાપાનથી બુલેટ ટ્રેનનું પહેલું શિપમેન્ટ વડોદરા ખાતે પહોંચી ગયું છે. પહેલા મુંબઈ આવેલ અને પછી ત્યાંથી રોડ માર્ગે વડોદરામાં સ્થાપવામાં આવેલ હાઈસ્પીડ રેલ ટ્રેનિગ ઇન્સ્ટિટ્યૂટ ખાતે(HSRT) ખાતે પહોંચેલા આ પાર્સલમાં હાઈસ્પીડ ટ્રેન માટેના 20 સ્લેબ ટ્રેક, 200 મીટર રેઇલ્સ અને 13mm ડાયામીટરના બાર્સ આવ્યા છે.

વડોદરા ખાતે આવેલ નેશનલ એકેડમી ઓફ ઇન્ડિયન રેલવેઝ(NAIR)ના કેમ્પસમાં જ HSRT માટે ખાસ 5 હેક્ટર્સના વિશાળ ક્ષેત્રમાં ટ્રેનિંગ વિસ્તાર વિકસાવવામાં આવ્યો છે. રવિવારે નેશનલ હાઈસ્પીડ રેલ કોર્પોરેશન લિમિટેડ(NHSRCL)ના મેનેજિંગ ડિરેક્ટર અચલ ખરેએ જાપાનીઝ માલસામાન દ્વારા ટ્રેનિંગ માટે જે જગ્યાએ રેલવે ટ્રેક બિછાવવામાં આવે છે તે જગ્યાનું સ્થળ નિરિક્ષણ કર્યું હતું. NHSRCL ખાતેના ચીફ પ્રોજેક્ટ મેનેજરે કહ્યું કે ‘જાપાનીઝ નિષ્ણાંતો સાથે પ્રોજેક્ટ સાથે જોડાયેલ નિષ્ણાંતો ટ્રેનિંગ ટ્રેક પર કામ કરવાનું શરુ કરી દીધું છે જે જાન્યુઆરીના મધ્યભાગ સુધીમાં તૈયાર થઈ જશે.’

સમગ્ર રુટ પર 1 લાખ સ્પેશિયલ સ્લેબ લાગશે

જ્યારે ખરેએ અમારા સહયોગી ટાઇમ્સ ઓફ ઇન્ડિયા સાથે વાત કરતા જણાવ્યું કે ‘આ ટ્રેક સ્લેબ હાઈ સ્ટ્રેન્થ ધરાવતા કોંક્રિટના બનેલા હોય છે. જે હાલ ફક્ત જાપાનમાં જ બને છે. આપણે હાઈસ્પીડ રેલ માટે જાપાનની શિનકાનસેન ટેક્નોલોજીનો ઉપયોગ કરી રહ્યા છીએ. ભવિષ્યમાં આ ટ્રેક ભારતમાં પણ ઉત્પાદન કરવામાં આવશે.’ ટોટલ પ્રોજેક્ટ 508 કિમીનો છે જેમાં મોટાભાગનો રુટ એલિવેટેડ કોરિડોરનો બનેલો છે. જેથી આવા 1 લાખ સ્લેબની સમગ્ર પ્રોજેક્ટ માટે જરુરિયાત પડશે.

ચીફ પ્રોજેક્ટ મેનેજર પ્રદીપ આહિરકરે કહ્યું કે, ‘એકવાર ટ્રેનિંગ ટ્રેક બની જશે અને હોસ્ટેલ તૈયાર થઈ જશે પછી અમે ફેબ્રુઆરીથી ટ્રેનિંગ આપવાની શરુઆત કરીશુ. આ ખાસ ટ્રેનિંગ સેન્ટરમાં દરેક પ્રકારની ટેક્નોલોજીનો ઉપયોગ કરવામા આવ્યો છે જેથી બુલેટ ટ્રેનના ડ્રાઇવરથી લઈને તમામ સ્ટાફને એકસાથે અને અદ્યતન ટ્રેનિંગ આપી શકાય.’­