Gujarati News

Gujarati News

News of Saturday, 20th October 2018

સુરતમાં ૩ વર્ષની બાળા ઉપર દુષ્‍કર્મ આચરીને હત્યા કરનાર શખ્સ બિહારના બસકર જીલ્લાના ઘાનેસુરિયા ગામમાં તેના ઘરમાંથી ઝડપાયો

સુરતઃ સુરતના લિંબાયત વિસ્તારમાં પાડોશીની ત્રણ વર્ષની બાળકીનો રેપ કરી હત્યા કરનાર 25 વર્ષનો આરોપી બિહારના બક્સર જિલ્લા અને સુરત પોલીસના જોઈન્ટ ઓપરેશનથી પકડાઈ ગયો હતો. 14 ઓક્ટોબરે બાળકીનો રેપ અને મર્ડર થયુ હતું. તેના ગુપ્તાંગ પર ભારે ઈજા થઈ હતી. બાળકીના મૃતદેહના પોસ્ટમોર્ટમમાંથી માલૂમ પડ્યું છે કે તેના બિલ્ડિંગમાં ગ્રાઉન્ડ ફ્લોર પર રહેતી વ્યક્તિએ તેની સાથે અકુદરતી સેક્સ કર્યું હતું. બાળકીનો મૃતદેહ આરોપીના બંધ રૂમમાંથી મળ્યો હતો. તેને એક કોથળામાં ભરીને બાલ્દી નીચે મૂકી દેવાયો હતો.

બિહાર ભાગી ગયો હતોઃ

ગુનો આચર્યા બાદ આરોપી બિહાર ભાગી ગયો હતો. સુરત ક્રાઈમ બ્રાન્ચ, લિંબાયત પોલીસ અને બિહાર પોલીસના જોઈન્ટ ઓપરેશન બાદ આરોપી બક્સર જિલ્લાના ધાનેસુરિયા ગામમાં આવેલા પોતાના ઘરમાંથી પકડાયો હતો. તેને સુરત ટ્રાન્સફર વોરંટ પર લાવવામાં આવી રહ્યો હતો. શહેરના પોલીસ કમિશનર સતીષ શર્માએ આ ધરપકડને કન્ફર્મ કરતા કહ્યું કે શનિવારે આ અંગે વધુ વિગતો જાહેર કરવામાં આવશે.

પોલીસને આ રીતે ગઈ હતી શંકાઃ

છોકરીના પિતાએ 14 ઓક્ટોબરે પોતાની દીકરી ગુમ હોવાની લિંબાયત પોલીસ સ્ટેશનમાં ફરિયાદ કરી હતી. સ્થાનિકો અને પોલીસે તેની તપાસ હાથ ધરી હતી. તેમાં આરોપીએ પણ પોલીસની મદદ કરી હતી. જો કે 15 ઓક્ટોબરે તે ગુમ થઈ ગયો હતો અને પોલીસને તેના પર શંકા ગઈ હતી. તેના ઘરની તપાસ કરતા ત્યાં છોકરીનો મૃતદેહ મળ્યો હતો.

સોશિયલ મીડિયાનો ઉપયોગ કરી ઝડપ્યોઃ

સુરત શહેરની પોલીસે સોશિયલ મીડિયાનો ઉપયોગ કરીને આરોપીને ઝડ્યો હતો. પોલીસે અનેક જગ્યાએ તેના પોસ્ટર પણ લગાવ્યા હતા. આરોપી સામે બાળાત્કાર, ખૂન અને પ્રોટેક્શન ઑફ ચિલ્ડ્રન ફ્રોમ સેક્શુઅલ ઓફેન્સિસ એક્ટ અંતર્ગત મામલો દર્જ કરવામાં આવ્યો છે.

(5:34 pm IST)