Gujarati News

Gujarati News

News of Wednesday, 20th June 2018

અમદાવાદ જિલ્લા પંચાયતમાં ભાજપે કોંગ્રેસ પાસેથી આંચકી

કોંગ્રેસના છ સભ્યોએ પાટલી બદલતાં અસર પડી : જિલ્લા પંચાયત નવા પ્રમુખ તરીકે જિતેન્દ્રસિંહ ચૌહાણ, ઉપપ્રમુખ ભાવિબહેન પટેલ : ભાજપની છાવણી ગેલમાં

અમદાવાદ,તા.૨૦ : કોંગ્રેસ શાસિત અમદાવાદ જિલ્લા પંચાયતમાં અઢી વર્ષ બાદ સત્તા પરિવર્તન થઇને ભાજપનું કમળ ખીલ્યું હતું. જોકે અમદાવાદ જિલ્લા પંચાયતના પ્રમુખ અને ઉપપ્રમુખપદની આજની ચૂંટણીમાં કોંગ્રેસ દ્વારા હોર્સ ટ્રેડિંગનો આક્ષેપ મુકાતાં એક તબક્કે રાજકીય વાતાવરણ ગરમાયું હતું. અમદાવાદ જિલ્લા પંચાયતના નવા પ્રમુખ તરીકે જિતેન્દ્રસિંહ ચૌહાણ અને ઉપપ્રમુખ તરીકે ભાવિબહેન પટેલની વરણી કરવામાં આવી છે. અમદાવાદ જિલ્લા પંચાયતની ચૂંટણી દરમ્યાન કોંગ્રેસના છ સભ્યોએ પાટલી બદલતાં પરિણામો પર તેની અસર પડી હતી. અમદાવાદ જિલ્લા પંચાયતમાં કોંગ્રેસના ૧૮ સભ્ય અને ભાજપના ૧૩ સભ્ય હોઇ કોંગ્રેસ પાસે બહુમતી હતી. આજે જિલ્લા પંચાયતના પ્રમુખ અને ઉપપ્રમુખની ચૂંટણી માટે સામાન્ય સભાનું આયોજન કરાયું હતું. કોંગ્રેસ તરફથી અમરસિંહ ઠાકોર અને ભાજપ તરફથી જિતેન્દ્રસિંહ ચૌહાણે પ્રમુખપદ માટે ઝંપલાવ્યું હતું. જ્યારે ઉપપ્રમુખપદ માટે કોંગ્રેસના અમરસિંહ સોલંકી અને ભાજપ તરફથી ભાવિબહેન પટેલ સ્પર્ધામાં હતા. આજની સામાન્ય સભામાં કોંગ્રેસ અને ભાજપ વચ્ચે સત્તા મેળવવા રાજકીય દાવપેચ ખેલાય તેવી ભારોભાર શકયતાને કારણે કોંગ્રેસના તમામ સભ્યોને રાજ્ય બહાર મોકલી દેવાયા હતા. છેલ્લા દસ દિવસથી આ સભ્યો અજ્ઞાતવાસમાં હતા. ગઇકાલે રાત્રે તેઓ અમદાવાદ પરત ફરતાં કોંગ્રેસ મોવડી મંડળ દ્વારા શહેરની એક હોટલમાં રખાયા હતા. દરમિયાન કોંગ્રેસ જિલ્લા પંચાયતમાં સત્તા જાળવી રાખે તેવી શકયતાની વચ્ચે કોંગ્રેસના અમરસિંહ ઠાકોર અને અમરસિંહ સોલંકી પ્રમુખ અને ઉપપપ્રમુખ તરીકે ચૂંટાઇ આવશે તેમ રાજકીય વર્તુળોમાં ચર્ચાતું હતું, પરંતુ આજે સવારે અચાનક જ રાજકીય સમીકરણ પલટાયાં હતા. અમદાવાદ જિલ્લા પંચાયતના કોંગ્રેસના છ સભ્યોએ બળવો કરતાં અમદાવાદ જિલ્લાના સ્થાનિક રાજકારણમાં ચકચાર મચી ગઇ હતી. કોંગ્રેસના મનુજી ઠાકોર, જગદીશ મેણિયા, દેવકુંવરબા દાઇમા, ઇચ્છાબહેન પટેલ, ઠાકરશી રાઠોડ અને કાળુજી ઠાકોરે ભાજપ તરફી મતદાન કરતાં કોંગ્રેસને સત્તા ગુમાવવાનો વારો આવ્યો હતો.

બીજીબાજુ, અમદાવાદ જિલ્લા પંચાયતનાં કોંગ્રેસનાં સૂત્રોએ ભાજપ પર ગંભીર આક્ષેપ કર્યો હતો કે, એક એક સભ્યને પક્ષમાંથી તોડવા માટે ભાજપે કરોડો રૂપિયાની રકમ ચૂકવી છે. પૈસાના જોરે ભાજપે અમદાવાદ જિલ્લા પંચાયતમાં સત્તા મેળવી છે. પક્ષ વિરોધી પ્રવૃત્તિ કરનારા તત્વો સામે પણ પક્ષના સ્થાનિક આગેવાન નેતાઓનું ધ્યાન દોરી શિક્ષાત્મક કાર્યવાહી કરવા મામલે ફરિયાદ કરાશે.

(7:36 pm IST)
  • ઇમરાન ખાનનું ઉમેદવારી પત્ર રદ્દ : પાકિસ્તાનમાં ખળભળાટ : આ પહેલા પૂર્વ વડાપ્રધાન અબ્બાસી અને મુશર્રફના ઉમેદવારીપત્રો પણ નામંજૂર થયા હતા access_time 5:47 pm IST

  • આંધ્રપ્રદેશ અને બિહાર બાદ ઓરિસ્સાએ પણ માંગ્યો વિશેષ રાજ્યનો દરજ્જો :ચંદ્રાબાબુ નાયડુ અને નીતીશકુમાર બાદ નવીન પટનાયકે પછાતપણા અને અનુસૂચિત જાતિ ,જનજાતિ વસ્તીની વધુ ટકાવારીનો હવાલો આપીને વિશેષ રાજ્યનો દરજ્જો માંગ્યો ;નિતીઆયોગની બેઠકમાં ગેરહાજર રહ્યા બાદ મોદીને લખ્યો પત્ર access_time 1:03 am IST

  • રાજકોટ સેન્ટ્રલ જેલમાં પાકા કામનો કેદીનું હાર્ટએટેકથી મોત: તળાજા તાલુકાના બરડા ગામના વૃદ્ધને મડરનાં કેસમાં હતો જેલ હવાલે : ગઇકાલે હાર્ટએટેક આવવાથી સારવાર માટે સિવિલમા દાખલ કરાયો હતો : આજે સારવાર દરમિયાન થયુ મોત છે access_time 8:51 pm IST