Gujarati News

અમેરિકાની ટોચની તપાસ એજન્સી ફેડરલ બ્યુરો ઑફ ઈન્વેસ્ટિગેશન  છેલ્લા ચાર વર્ષથી મૂળ ગુજરાતના એક યુવકને શોધી રહી છે.અમદાવાદના વિરમગામનો વતની એવા ભદ્રેશ કુમાર પટેલનું નામ FBIના ટોપ 10 મોસ્ટ વૉન્ટેડ ભાગેડુના લિસ્ટમાં શામેલ છે અને તેની બાતમી આપનારને સરકાર $1,00,000 એટલે કે અંદાજે રૂ. 70 લાખનું ઈનામ આપશે.

  ભદ્રેશ અમેરિકામાં પોતાની પત્નીની હત્યા કરી ફરાર થયો હતો.FBI માને છે કે ભદ્રેશ પટેલ ખૂબ જ ખતરનાક ગુનેગાર છે જેણે હેનોવરના ડંકિન ડોનટ્સ સ્ટોરમાં પોતાની યુવાન પત્નીની વિચિત્ર રીતે હત્યા કરી હતી.પત્નીને મારી નાખ્યા બાદ ભદ્રેશ પટેલ એક જગ્યાએથી બીજી જગ્યાએ ભાગ્યા કરે છે. FBIના 2019ના લિસ્ટમાં તે ખૂબ જ ખતરનાક ગુનેગાર તરીકે સામેલ છે. પટેલનું નામ સૌથી પહેલા 2017ના ટોપ 10 લિસ્ટમાં આવ્યું હતું.

  ડંકિન ડોનટ્સ સ્ટોરમાં નાઈટ શિફ્ટમાં કામ કરતો હતો. આ સ્ટોરમાં જ ભદ્રેશે પલકની હત્યા કરી હતી. પલકની લાશ કલાકો પછી 12 એપ્રિલ 2015ની રાત્રે મળી હતી. તેના શરીર પર ચપ્પુના ઘાના અનેક નિશાન હતા. પલકને ક્રૂરતાથી માર્યા બાદ અને ચપ્પુના ઘા ઝીંકી તેની હત્યા કર્યા બાદ પટેલ સ્ટોર છોડીને જતો રહ્યો હતો.

  સીસીટીવી ફૂટેજમાં ભદ્રેશ અને પલક સાથે રસોડા તરફ જતા જોવા મળે છે અને પછી રેક્સ પાછળ ગાયબ થઈ જાય છે. થોડી ક્ષણો બાદ પટેલ ફરી દેખાય છે. તે રસોડાનું ઓવન બંધ કરે છે અને સ્ટોરમાંથી નીકળી જાય છે જાણે કે કશું થયું જ ન હોય. તેની બૉડી લેંગ્વેજ અને ચહેરાના હાવભાવ સાવ નોર્મલ દેખાય છે.

  આ ક્રૂરતાભરી હત્યાએ મેરીલેન્ડમાં ચકચાર મચી હતી.સીસીટીવી ફૂટેજમાં દેખાય છે કે હત્યા બાદ ભદ્રેશ પટેલે નેવાર્કની એક હોટેલમાં ચેક ઈન કર્યું હતું અને રૂમમાં કેશ આપતો જોવા મળ્યો હતો. તે ત્યાં રાત રોકાઈને સવારે જતો રહ્યો હતો.