Gujarati News

Gujarati News

News of Sunday, 19th September 2021

દારૂની મહેફિલમાં માથાકૂટ થતાં મિત્રે મિત્રને ગોળી મારી

મિત્રો સાથેની દારૂની મહેફિલ જીવલેણ સાબિત થઈ : સરગાસણ રોડ હડમતિયા વિસ્તારમાં આવેલા સામ્રાજય ફાર્મ હાઉસમાં પાર્ટી દરમિયાન ઝગડાએ ઉગ્રરૂપ લીધું

ગાંધીનગર , તા.૧૮ : ગાંધીનગરમાં દારૂની મહેફિલ દરમિયાન મિત્રો વચ્ચે માથાકૂટ થતાં એક વ્યક્તિની હત્યા હોવાની ઘટના સામે આવી છે. મીડિયા રિપોર્ટ મુજબ સરગાસણ રોડ હડમતિયા વિસ્તારમાં આવેલા સામ્રાજય ફાર્મ હાઉસમાં શુક્રવારે આઠ મિત્રો દારૂની મહેફિલ માણી રહ્યા હતા. દરમિયાન ઝઘડો થતાં એક મિત્રે રિવોલ્વર વડે બીજા મિત્રને છાતીમાં ગોળી ધરબી દેતા મોત નીપજ્યું હતું. ફાયરિંગમાં મૃત્યુ પામનાર સામ્રાજ્ય પાર્ટી પ્લોટના માલિક પ્રવીણ માણીયા હોવાનું સામે આવ્યું છે. હાલ પોલીસે ગુનો નોંધીને કાયદેસરની કાર્યવાહી હાથ ધરી છે.

મીડિયા રિપોર્ટ મુજબ ગાંધીનગર સ્થિત સામ્રાજય પાર્ટી પ્લોટના માલિક પ્રવિણ કલ્યાણ માણીયા, જયદીપસિંહ ગોહિલ, તરુણસિંહ તેમજ સંતોષ ભરવાડ, હરપાલસિંહ જનક જયરાજસિંહ તેમજ મોહિત સહિતના મિત્રો દારૂની પાર્ટી કરી રહ્યા હતા. આ દરમિયાન કોઈ મામલે તકરાર થતાં બધા મિત્રો અંદરો અંદર બાખડી પડ્યા હતા. જેથી પ્રવિણભાઈ અને જયદીપસિંહ તેમજ તરુણસિંહ વચ્ચે વધારે માથાકૂટ થઇ હતી. જેથી જયદીપસિંહે પોતાની રિવોલ્વર કાઢી પ્રવીણસિંહ પણ ફાયરિંગ કર્યું હતું. ફાયરિંગ કર્યા બાદ પ્રવિણભાઈ ત્યાં જ ઢળી પડ્યા હતા જ્યારે જયદીપ અને તરુણસિંહ ત્યાથી કારમાં ભાગવા લાગ્યા ત્યારે એક શખ્સે તેમને રોકવાનો પ્રયાસ કર્યો હતો. જેથી બંનેએ તે શખ્સને પણ લાફા માર્યા હતા અને ગાડી લઈને ભાગવામાં સફળ થયા હતા. દરમિયાન પ્રવિણભાઈને સારવાર માટે તાત્કાલિક હોસ્પિટલ ખસેડવામાં આવ્યા હતા. જ્યાં ટૂંકી સારવાર દરમિયાન તેમનું મોત નીપજતાં પોલીસના ઉચ્ચ અધિકારીઓ સહિતનો કાફલો દોડી આવ્યો હતો. હાલ સમગ્ર મામલે સીસીટીવી ફૂટેજ સહિતના પુરાવાના આધારે વધુ તપાસ હાથ ધરવામાં આવી હોવાનું જાણવા મળ્યું છે.

સૂત્રો પાસેથી પ્રાપ્ત માહિતી અનુસાર, ફાયરિંગમાં મૃત્યુ પામનાર પ્રવીણભાઈ ભાવનગર જિલ્લા પંચાયતની બે વખત ચૂંટણી કોંગ્રેસ તરફથી લડયા હતા અને હારી ગયા હતા. તેમના પરિવારમાં પત્ની અને બે સંતાનો છે. દીકરીના લગ્ન થઈ ચૂક્યા છે. તેઓ અવારનવાર આવી દારૂની મહેફિલ યોજતા હતા. દરમિયાન શુક્રવારેની મહેફિલ તેમના માટે જ જીવલેણ સાબિત થઈ હતી.

(9:15 pm IST)