Gujarati News

અમદાવાદ: મુંબઈની વર્સોવા પોલીસે અમેરિકામાં બાળકોનું સ્મલિંગ કરવાનું રેકેટ ઝડપી પાડ્યું છે. બાળકો તેમના પરિવાર સાથે USમાં રહી શકે તે માટે તેમનું સ્મલિંગ કરવામાં આવતું હતું. પોલીસને બાતમી મળી હતી કે બાળકોને એક સલૂનમાં મેક-અપ કરી આપીને અમુક પાસપોર્ટ હોલ્ડર જેવો લૂક આપવામાં આવ્યો છે. વર્સોવામાંથી ઝડપાયેલું આ રેકેટ અમદાવાદના રાણીપનો રહેવાસી રાજેશ ગમલેવાલા નામનો શખ્સ ચલાવતો હતો. રાજેશે મુંબઈ અને ગુજરાતના એજન્ટની મદદથી 300 જેટલા બાળકોને ગેરકાયદેસર રીતે US મોકલ્યા છે.

આ મામલે ગુજરાત CID (ક્રાઈમ) અને અમદાવાદ ક્રાઈમ બ્રાંચ ગુજરાત એન્ગલની ઊંડાણપૂર્વક તપાસ કરી રહી છે. તપાસમાં બહાર આવ્યું છે કે, મહેસાણાના દિવાનપુર અને અમદાવાદની બે છોકરીઓ સહિત 7 બાળકોને USમાં રહેતા તેમના પરિવાર સુધી પહોંચાડવાનો પ્લાન હતો. પોલીસ સૂત્રોના જણાવ્યા પ્રમાણે, CID ક્રાઈમ અને અમદાવાદ ક્રાઈમ બ્રાંચની ટીમે મુંબઈ પહોંચીને 4 આરોપીઓ- આમીર અઝમ, તજુદ્દીન ખાન, રિઝવાન ચોટાની અને રાજેશ ગમલેવાલાની પૂછપરછ કરી છે.