Gujarati News

તાઉ તે વાવાઝોડાને પગલે મધ્ય ગુજરાતમાં ખેડા જિલ્લાના વાત્રક નદી કાંઠાના આજુબાજુના વિસ્તારના તેમજ ઝૂંપડાઓમાં રહેતા લોકોને ખેડા નગરપાલિકા દ્વારા કુમાર પ્રાથમિક શાળામાં આશ્રય આપવામાં આવ્યો છે. આ અસરગ્રસ્તોની સારસંભાળ રાખવા માટે મણિનગર શ્રી સ્વામિનારાયણ ગાદીના આચાર્ય શ્રી જિતેન્દ્રિયપ્રિયદાસજી સ્વામીશ્રીની આજ્ઞાથી શ્રી મુક્તજીવન સ્વામીબાપા પ્રાગટ્ય ધામ - શ્રી સ્વામિનારાયણ મંદિર, ખેડાના સંતોએ સ્વયં ખીચડી - કઢી બનાવીને જમાડ્યા હતા. વાવાઝોડાને પગલે અસરગ્રસ્તોને ચિંતા ન કરવા અને જ્યાં સુધી વાવાઝોડાની અસર દૂર ના થાય ત્યાં સુધી સલામત સ્થળે રહેવા મહંત શ્રી નિર્માનપ્રિયદાસજી સ્વામીએ ભલામણ કરી હતી. કુમાર શાળામાં 200થી વધુ સ્થળાંતરીત લોકોને સંતોએ જાતે જ ભોજન કરાવ્યું હતું. ખેડા મંદિરમાં સંતોએ ખીચડી તેમજ કઢી બનાવીને જાતે જ જઈને અસરગ્રસ્તોને આપી આવી કપરી સ્થિતિમાં હિંમત ન હારવા અને ભગવાન પર વિશ્વાસ રાખવા માટે કહ્યું હતું. ગુજરાતમાં જ્યારે પણ કુદરતી આપદા આવી છે ત્યારે મણિનગર શ્રી સ્વામિનારાયણ ગાદી સંસ્થાન દ્વારા સમાજ સેવામાં ખડેપગે હાજર રહીને સંતો જાતે જ માનવસેવા કાર્યમાં તત્પર રહે છે. ગુજરાતમાં આવેલી આ કુદરતી આપદા સામે સમય પસાર કરીને લડવાનું છે. આવા સામાજિક કાર્યમાં શ્રી પરમસુખદાસજી સ્વામી તેમજ શ્રી વિશ્વેશ્વરદાસજી સ્વામી પણ હાજર રહ્યા હતા.