Gujarati News

રાજકોટ તા. ૧૯ : ગુજરાતમાં ૬ મહાનગરોની ચૂંટણી માટેના જાહેર પ્રચારનો આજે સાંજથી અંત આવી રહ્યો છે. રવિવારે મતદાન છે. મતદાન આડે હવે એક દિવસ બાકી રહ્યો છે. રાજ્યમાં સામાન્ય રીતે ભાજપ - કોંગ્રેસ વચ્ચે સ્પર્ધા રહે છે. તે યથાવત રહેવા ઉપરાંત આ વખતે અરવિંદ કેજરીવાલની આમ આદમી પાર્ટીએ મક્કમતાથી પગ મૂકયો છે. ઉભા રહેવાની જગ્યા થાય તો ભવિષ્યમાં 'આપ' ગુજરાતમાં ચાલવા અને દોડવા થનગને છે. ઉમેદવારી પાછી ખેંચાયા પછી સ્પષ્ટ થયેલ ચિત્ર મુજબ કુલ ૫૭૫ બેઠકો પૈકી આપના ઉમેદવારો ૪૬૯ બેઠકો પર છે. તે ટકાવારીની દ્રષ્ટિએ ૮૧ ટકાથી વધુ થાય છે.  અમદાવાદની એક બેઠક ભાજપને બિનહરીફ મળેલ છે. બાકીની ૬ કોર્પોરેશનોની ૫૭૫ (તમામ બેઠકો) પર ભાજપના ઉમેદવારો છે. કોંગ્રેસના ઉમેદવારો ૫૬૪ બેઠકો પર રહ્યા છે. આમ આદમી પાર્ટીના ઉમેદવારો ૪૬૯ બેઠકોમાં લડી રહ્યા છે. બસપાના ૧૬૭ ઉમેદવારો અને એનસીપીના ૮૯ ઉમેદવારો છે. અન્ય પક્ષના ૧૫૫ અને ૨૨૭ અપક્ષો લડી રહ્યા છે. 'આપ'નો પ્રથમ પ્રયોગ ખૂબ આશાસ્પદ છે. તમામ ૬ મહાનગરોમાં એક માત્ર રાજકોટ એવું મહાનગર છે કે જ્યાં તમામ ૭૨ બેઠકો પર 'આપ' મેદાનમાં છે. સત્તાવાર ઉમેદવારનું એકેય ફોર્મ રદ્દ થયું નથી કે પાછું ખેંચાયું નથી. રાજકોટમાં કોંગ્રેસ (૭૦) કરતા 'આપ'ના ઉમેદવારો વધુ છે. 'આપ'નું ઝાડું કોની કેવી સફાઇ કરે છે ? તે તો પરિણામ વખતે જ ખબર પડશે.