ચાલુ વર્ષમાં જ રાજકોટમાં પોલીસ કમિશ્નર મનોજ અગ્રવાલના માર્ગદર્શનમાં
એસઓજી પીઆઇ આર.વાય.રાવલે ૧ કરોડથી વધુના કેફી પદાર્થ ઝડપ્યા
રાજકોટ, તા., ૧૮: ગુજરાતમાં ગાંજા મ્યાંઉ મ્યાંઉ જેવા નશાકારક ડ્રગ્સો ઘુસાડવામાં ડ્રગ્સ પેડલરો રાજકોટમાં પણ પાછળ નથી. જો કે રાજકોટના પોલીસ કમિશ્નર મનોજ અગ્રવાલની જાગૃતીથી અને રાજકોટ એસઓજીના કાર્યદક્ષ પીઆઇ આર.વાય.રાવલે કુલ ૧ર કેસોમાં ચાલુ વર્ષમાં જ ૧ કરોડ ૧૯ લાખ પ૦ હજારથી વધુ રકમનો કેફી પદાર્થ પકડી પાડવામાં સફળતા મળી છે.
એસઓજી ટીમ દ્વારા જે કેફી પદાર્થ ચાલુ વર્ષમાં ઝડપાયો તેમાં ગાંજો ર૪ કિલો, મેફેટ્રોન ૯.૭૭ ગ્રામ, કોકીન ૩૮.પ૪૦ ગ્રામ, મ્યાંઉ મ્યાંઉ ૧.૭પ૦ ગ્રામ, મળી ટોટલ ૯,૮૧,પ૯૯ નો ડ્રગ્સ તથા બે ડઝન આરોપીઓને ઝડપી પીઆઇ આર.વાય.રાવલ ટીમે યશસ્વી ફરજ મનોજ અગ્રવાલના માર્ગદર્શનમાં બજાવી છે.
સંસ્કારી નગરી (વડોદરા)ના યુવાનોને કેફી દ્રવ્યોના બંધાણી થતા અટકાવવા
યુરોપથી અનુપમસિંહ ગેહલોતે મંગાવેલ કીટની હાઇકોર્ટે પણ નોંધ લીધી
રાજકોટ, તા., ૧૮: ગુજરાત સરકાર માટે અને રાજય પોલીસ તંત્રમાં નવો પડકાર ઉભો થયો છે અને આ પડકાર છે રાજયના નાના મોટા વિવિધ શહેરોમાં ચરસ, બ્રાઉન સુગર અને ગાંજો, કોકેઇન જેવો જથ્થો ઠલવવાનો પડકાર.
સંસ્કારી નગરી તરીકે જાણીતા વડોદરાના સુપ્રસિધ્ધ શિક્ષણધામો નજીક યુવા પેઢીને નશાની ગર્તામાં ધકેલવા માટે પ્રયાસો કરનાર વિવિધ ગેંગોને ઝડપી લીધા બાદ અને આવા આરોપીઓની પુછપરછ દરમિયાન નશાકારક ઇન્જેકશનો અને યુવાઓને ચરસના બંધાણી બનાવવા માટે જે ષડયંત્ર ચાલી રહયું હતું તેનાથી પોલીસ કમિશ્નર અનુપમસિંહ ગેહલોત ચોંકી ઉઠયા હતા. તેઓએ યુરોપથી ખાસ પ્રકારની જે કીટ મંગાવી છે તેની નોંધ કેરળ હાઇકોર્ટે લઇ કેરળ સરકારને વડોદરા પોલીસ જેવી જ કાર્યવાહી કરવા સુચવ્યું છે. આજ બતાવે છે કે યુવા પેઢી પર નશાકારક પદાર્થોનું કેટલું મોટુ સંકટ તોળાઇ રહયું છે.
અમરેલી જીલ્લામાંથી તો આખુને આખુ ગાંજાનું વાવેતર ઝડપાતા નાના ગ્રામ્ય વિસ્તારો
સુધી કેફી પદાર્થનું દુષણ ફેલાયાનું સાબીત થયું
રાજકોટ, તા., ૧૮: ગુજરાતમાં નશાકારક પદાર્થો ઘુસાડવાનું ષડયંત્ર માત્ર મોટા શહેરો કે ગુજરાત પુરતુ જ મર્યાદીત નથી કાઠીયાવાડના નાના નાના ગામોનો પણ તેમાં સમાવેશ હોવાની ચાડી ખાતી ઘટનાઓ પ્રકાશમાં આવી છે. અમરેલી જીલ્લાના લાઠીના સુવાગઢ ગામમાં ગાંજાનું ગેરકાયદેસર વાવેતર થયાની માહિતી મળતા જ ભાવગનર રેન્જના વડા અશોકકુમાર યાદવ અને અમરેલી એસપી નિલિપ્ત રાય વગેરે ચોંકી ઉઠયા હતા. અશોકકુમાર યાદવે ભાવનગર, અમરેલી પોલીસનું સંયુકત ઓપરેશન હાથ ધરી મોટા પ્રમાણમાં ગાંજાનું વાવેતર પકડી પાડયું હતું.
દામનગર પોલીસ, એસઓજી વિગેરેએ ટીમ વર્ક દ્વારા પકડી પાડેલું ષડયંત્ર પણનશાકારક પદાર્થોના પડકારથી કાઠીયાવાડના નાના સેન્ટરો પર પણ બાકાત ન હોવાની બાબતને પુષ્ટી આપી રહયું છે. આ બધી બાબતો આમતો ચિંતાજનક છે પરંતુ પોલીસ પણ આ પડકારને ઝીલવા ઝઝુમી રહી છે.
એસઓજી ક્રાઇમ ડીસીપી ડો.હર્ષદ પટેલે નવતર કાયદાનો અમદાવાદથી પ્રારંભ કરાવ્યો
રાજકોટઃ પોલીસ કમિશ્નર આશીષ ભાટીયા અને અમદાવાદ શહેર ક્રાઇમ બ્રાન્ચના વડા અજય કુમાર તોમર કે જેઓ યુવા ધનને નશાની ગર્તામાં ધકેલવા માટે વિશેષ અભિયાન ચલાવે છે તેમના અભિયાનને રસપુર્વક એસઓજી ક્રાઇમ બ્રાન્ચના ડીસીપી ડો.હર્ષદ પટેલ રસ પુર્વક આગળ વધારી રહયા છે. ટુંકાગાળામાં જ ચરસ, બ્રાઉન સુગર અને ગાંજાના સપ્લાયરોને જેલ ભેગા કરવા સાથે પીઆઇટી એનડીપીએસની નવતર કલમનો દેશમાં અમદાવાદથી પ્રારંભ કરાવી સીઆઇડી વડા આશીષ ભાટીયા સમક્ષ દરખાસ્ત રજુ કરી ગુન્હો કરવાની ટેવવાળા આરોપી મહમદ આરીફને ભુજ જેલમાં મોકલાતા સન્નાટો મચી ગયો છે.