Gujarati News

તલોદ:તલોદમાંથી ગુરૂવારે રાત્રે ૨ કીલોથી વધુ અફીણ સાથે ઝડપાયેલા તલોદ અને સુરતના (મૂળ બંને રાજસ્થાનના) બે આરોપીને તલોદની કોર્ટે ૬ દિવસના રીમાન્ડ મંજૂર કર્યા છે. આગામી તા. ૨૩ મે ૨૦૨૦ના રોજ બપોરે ૧૧ કલાકે તેઓના આ રીમાન્ડની મુદત પુરી થશે.

તલોદનો સંતોષ ભાજીપાઉં વાળો પિન્ટુ રમેશભાઈ ડાંગી અને તેનો સાથી ભંવર ડાંગી - સુરત (મૂળ  રાજસ્થાન)નાઓ ગત તા. ૧૫-૫ ની રાત્રે તલોદ પોલીસ અને એસ.ઓ.જી.ના એક સંયુક્ત ઓપરેશનમાં ઝડપાઈ ગયા હતા. પિન્ટુ ડાંગીની કારની આગળની ખાલી સાઈડની સીટ નીચેથી પોલીસને તલાશી દરમ્યાન ૨ કિલો ૧૭૭ ગ્રામ જેટલો અફીણનો જથ્થો મળી આવ્યો હતો. મુદ્દામાલ અફીણ અને કાર સાથે જ બંને આરોપીઓને પોલીસે ઝડપી લઈને, આરોપીઓને જેલની ભીતરમાં ધકેલી દીધા હતા. તેઓને ૨૪ કલાકમાં કોર્ટમાં રજુ કરવાના હતા. પરંતુ કોવિડ-૧૯ના વર્તમાન સમયમાં ગાઈડલાઇન મુજબ બંનેનો કોરોના ટેસ્ટ કરાવવાનો હતો. જે કરાવ્યા બાદ રીપોર્ટ નેગેટીવ આવતાં જ તપાસ અધિકારી સી.પી.આઈ. કે.એસ. બ્રહ્મભટ્ટએ આજે રવિવારે બંને આરોપીઓને કોર્ટ સમક્ષ રજૂ કરીને રીમાન્ડની માંગ કરતાં કોર્ટ ૬ દિવસના (તા. ૨૩-૫) સુધીના રીમાન્ડ મંજુર કર્યા હતા.