Gujarati News

અમદાવાદ તા. ૧૭ : ચોરી કરવા માટે ચોર વિવિધ તરકીબો અપનાવે છે, જે ચોરીની યોજના કે તેમાં ઉપયોગમાં લેવાતા સાધનો કે પદ્ઘતિની હોય છે. પરંતુ શું તમે કયારેય સાંભળ્યું છે કે ચોર ચોરી કરવા માટે વજન ઉતારે? આવો જ નવાઈ પમાડતો કિસ્સો અમદાવાદના બોપલ વિસ્તારમાં બન્યો છે. ૩૪ વર્ષીય શખ્સે પૂર્વ માલિકના ઘરે ચોરી કરવા માટે ડાયટિંગ કરીને વજન ઉતાર્યું હતું. ઘરના આગળ અને પાછળના દરવાજામાં લાગેલા સીસીટીવી કેમેરાથી બચીને બારીમાંથી ઘરની અંદર સરકી જવાય તે માટે શખ્સે વજન ઉતાર્યું હતું.

કરમની કઠણાઈ જુઓ કે, પોલીસે સીસીટીવીને આધારે જ આ શખ્સને ઝડપી લીધો. અમદાવાદ ગ્રામ્ય પોલીસની લોકલ ક્રાઈમ બ્રાંચે હાર્ડવેરની દુકાનના સીસીટીવી ફૂટેજના આધારે આ શખ્સને ઝડપ્યો હતો. બારીનો કાચ તોડવા માટે ચોરે આ દુકાનમાંથી કરવત અને લેલું ખરીદ્યું હતું.

'બોપલમાં આવેલી બસંત બહાર સોસાયટીમાં મોહિત મરડીયાના ઘરે આરોપી મોતીસિંહ ચૌહાણ બે વર્ષ પહેલા કામ કરતો હતો. મોતીસિંહને ઘરની મહત્વની માહિતી જેમ કે, કિંમતી વસ્તુઓ કયાં મૂકવામાં આવે છે અને સીસીટીવી કેમેરાનું લોકેશન કયાં છે તે અંગેની જાણકારી હતી. તેને એ પણ ખબર હતી કે, હાઈટેક ડિજિટલ દરવાજો તૂટશે નહીં,' તેમ પોલીસે જણાવ્યું.

હાલ સિંધુભવન રોડ પર આવેલા અન્ય એક વ્યકિતના ઘરે કામ કરતાં મોતીસિંહ ચૌહાણે મોહિત મરડીયાના ઘરે ચોરી કરવા માટે વજન ઉતારવાનું નક્કી કર્યું હતું. રસોડાની બારીમાંથી ઘરમાં પ્રવેશવા માટે તેણે વજન ઘટાડવાનું શરૂ કર્યું હતું. પોલીસે વધુ માહિતી આપતાં જણાવ્યું, 'આરોપીના કહેવા મુજબ તેણે ત્રણ મહિના સુધી દિવસમાં એકવાર જમીને તેનું વજન ૭૫ કિલોથી ઘટાડીને ૬૫ કિલો કર્યું હતું. હાલ મોતીસિંહ જે ઘરે કામ કરે છે તેના માલિકે અમને જણાવ્યું છે કે, તે ડાયટિંગનું કહીને રાત્રે જમતો નહોતો.'

મોતીસિંહ ચૌહાણે મોહિત મરડીયાના ઘરે ૫ નવેમ્બરે ધાડ પાડી હતી અને ૩૭ લાખ રૂપિયાની કિંમતી ચીજવસ્તુઓ ચોરી હતી. સીસીટીવીમાં મોતીસિંહ દેખાયો ના હોવાથી પોલીસે હ્યુમન ઈન્ટેલિજન્સનો ઉપયોગ કર્યો અને બોપલમાં આવેલી હાર્ડવેરની દુકાનમાંથી તેના ફૂટેજ શોધ્યા હતા. બાદમાં મોતીસિંહના મોબાઈલના લોકેશનને આધારે પોલીસે તેને એસપી રિંગ રોડ પરથી ઝડપી પાડ્યો હતો. મોતીસિંહ બસમાં બેસીને પોતાના વતન ઉદયપુર જઈ રહ્યો હતો ત્યારે જ પોલીસે દબોચ્યો હતો. ચોરી થયેલો સામાન પોલીસે તેની પાસેથી જપ્ત કર્યો છે

ઘરફોડ ચોરી કરનાર આ શખ્સને પકડવા માટે પોલીસ પાસે સીસીટીવી ફૂટેજ નહોતા. પરંતુ તેમને ઘટનાસ્થળની નજીકથી કરવત અને લેલું ઝાડ પર લટકેલા મળી આવ્યા હતા. આ ઓજારો પર પ્રાઈસ ટેગ લાગેલા હતા. જેથી પોલીસ ઓજારો ખરીદાયા હતા તે દુકાને પહોંચી હતી. દુકાનના માલિકે કહ્યું કે, આ ઓજારો ખરીદનાર શખ્સ તેને યાદ છે કારણકે ૧૦ રૂપિયા માટે તેણે બબાલ કરી હતી. આ બંને ઓજારોની કિંમત ૩૧૦ રૂપિયા થઈ હતી અને ૩૦૦ રૂપિયામાં આપવા માટે શખ્સે જિદ્દ પકડી હતી. દુકાનમાં લાગેલા સીસીટીવીમાં ૨૦૨૨નો સમય સેટ કર્યો હોવાથી દુકાનદાર કે પોલીસ તે શખ્સ દુકાનમાં કયારે આવ્યો હતો તેના વિશે નક્કી ના કરી શકી. પરંતુ સીસીટીવી ફૂટેજ જોતી વખતે દુકાનદારને યાદ આવ્યું કે એ દિવસ દિવાળીનો હતો અને આરોપી તેની દુકાનમાં આવ્યો ત્યારે ત્યાં ટેબલ પર મીઠાઈના બોકસ પડ્યા હતા. પોલીસે મીઠાઈના બોકસ ટેબલ પર પડ્યા હોય તેવા સીસીટીવી ફૂટેજ શોધવાનું શરૂ કર્યું અને એક વિડીયોમાં તે જોવા મળ્યો હતો. આ ફોટોને આરોપીના પૂર્વ માલિકને બતાવાયો અને તેમણે તેની ઓળખની પુષ્ટિ કરી હતી.