Gujarati News

ગાંધીનગર , તા.૧૭ : રાજ્યમાં પોલીસ દ્વારા અવારનવાર દરોડા પાડીને લાખો રૂપિયાનો દારૂ ઝડપી લેવામાં આવે છે, પરંતુ ઘણીવાર બૂટલેગરો દારૂ ઘૂસાડવા માટ એવો કીમિયો અપનાવે છે જેથી તેમને પકડવાનું મુશ્કેલ થઈ જાય છે. આવો જ એક કિસ્સો ગાંધીનગરમાંથી સામે આવ્યો છે. જેમાં દૂધની આડમાં દારૂની હેરાફેરી થતી હોવાનું સામે આવ્યું છે. મીડિયા રિપોર્ટ મુજબ ગાંધીનગરમાં અમૂલ દૂધના ટેક્નરમાંથી વિદેશી દારૂ મળી આવ્યો હતો. જેમાં પોલીસ દ્વારા ટેક્નર અને દારૂનો જથ્થો કબજે કરીને આગળની કાર્યવાહી હાથ ધરવામાં આવી છે.

મીડિયા રિપોર્ટ મુજબ ગાંધીનગરમાં એલસીબી ટીમે અમૂલ દૂધના ટેક્નરમાંથી ૭૬૬૮ નંગ વિદેશી દારૂની બોટલોનો જથ્થો કબજે કહ્યો હતો. જો કે, ડ્રાઈવર ભાગી જવામાં સફળ રહ્યો હતો. જ્યારે અમૂલ ગાડીને સહી સલામત નિયત સ્થળે પહોંચાડવા માટે પાયલોટિંગ કરતી અર્ટિગા કાર સાથે ડ્રાઇવરને ઝડપી લેવામાં આવ્યો છે. પોલીસ દ્વારા દારૂના જથ્થો તેમજ બે વાહનો મળી કુલ રૂ. ૧૫.૦૬ લાખનો મુદ્દામાલ જપ્ત કરી કાયદેસરની કાર્યવાહી કરવામાં આવી હોવાનું જાણવા મળ્યું છે.

પ્રાપ્ત અહેવાલો અનુસાર અમૂલ દૂધના ટેક્નરમાં વિદેશી દારૂનો જથ્થો અમદાવાદ પહોંચે તે પહેલાં જ એલસીબી દ્વારા ઝડપી લેવામાં આવ્યો હતો. રૂપાલ ગામમાં વરદાયિની માતાની પલ્લીમાં પેથાપુર પોલીસ પણ બંદોબસ્તમાં હતી. દરમિયાન દારૂની હેરાફેરી પકડવા માટે એલસીબીની ટીમ પેથાપુર પોલીસ મથકની હદમાં પેટ્રોલિંગ પર હતી. આ દરમિયાન એલસીબીને બાતમી મળી હતી કે સોનીપુર - કોલવડા રોડ પરથી અમૂલ દૂધના ટેક્નરમાં વિદેશી દારૂનો જથ્થો અમદાવાદ માટે રવાના થવાનો છે. જેથી એલસીબીની ટીમે પહેલાથી જ વોચ ગોઠવીને રાખી હતી અને અમૂલનું ટેક્નર અને દારૂનો જથ્થો ઝડપી પાડ્યો હતો.

ત્યારબાદ એલસીબીએ અમૂલ દૂધના ટેક્નરમાં તપાસ કરતા વિદેશી દારૂની ૭૬૬૮ જેટલી બોટલ મળી આવી હતી. સાથે જ દૂધના ટેક્નરને પ્રોટેક્ટ કરતી અર્ટિગા કાર અને તેના ડ્રાઈવરને પણ ઝડપી લેવામાં આવ્યો હતો. પોલીસ પૂછપરછ દરમિયાન અમદાવાદના એક શખ્સે રાજસ્થાનથી દારૂ મંગાવ્યો હોવાનું ખુલતાં પોલીસે અમૂલ દુધના ટેક્નર, અર્ટિંગા કાર સાથે દારૂનો જથ્થો કબજે કરીને આગળની કાર્યવાહી હાથ ધરી હતી.