Gujarati News

અમદાવાદ, તા. ૧૭ :  ઇલેકટ્રોથર્મ ઇન્ડિયા લિમિટેડના કરોડો રૂપિયાના કૌભાંડમાં તાજેતરમાં જ ચીફ મેટ્રોપોલીટન મેજિસ્ટ્રેટની કોર્ટમાં દાખલ થયેલી ત્રણ અલગ-અલગ ફરિયાદોના ચકચારભર્યા કેસમાં ચીફ મેટ્રોપોલીટન મેજિસ્ટ્રેટ એ.વાય.દવેએ સીઆઇડી ક્રાઇમને એફઆઇઆર નોંધવા બહુ જ મહત્વનો આદેશ જારી કર્યો હતો, તેના અનુસંધાનમાં સીઆઇડી ક્રાઇમ દ્વારા આ સમગ્ર ચકચારભર્યા કૌભાંડમાં આખરે કંપનીના એમડી શૈલેષ ભંવરલાલ ભંડારી અને વેસ્ટર્ન ઇન્ડિયા સ્પેશ્યાલિટી હોસ્પિટલ લિ.ના ડાયરેકટર નાગેશ ભંવરલાલ ભંડારી સહિતના અન્ય આરોપીઓ સામે એફઆઇઆર દાખલ કરવામાં આવી છે. સીઆઇડી ક્રાઇમે દાખલ કરેલી આ એફઆઇઆરને પગલે હવે આરોપીઓ પર ધરપકડની તલવાર તોળાઇ રહી છે.

કોની કોની સામે એફઆઈઆર દાખલ કરાઇ?

ઇલેકટ્રોથર્મ ઇન્ડિયા લિ. કંપનીના એમડી શૈલેષ ભંડારી, સીંગાપોરની કેસલશાઇન પીટીઇ લિ.ના ડાયરેકટર અશોક રામચંદલાલ ભંડારી, કલ્યાણ સુંદરમ મારન, ફેનીડેન ઇન્ટરનેશનલ લિ.ના જવાબદાર અધિકારી, વિવેક અશોક ભંડારી, એપલ કોમોડિટીઝ લિ.ના ડાયરેકટર અશોક નરેન્દ્ર ગર્ગ, અંકિત ગર્ગ, નિશ્ચિલ જૈન, કેલોન્ત શીકો., વીકટ્રી રીચ ટ્રેડીંગ લિ.ના ડાયરેકટર સુઇ પુઇ યાન, નિકુંજ ક્રિષ્નકુમાર ગોયલ સહિતના આરોપીઓ વિરૂધ્ધ સીઆઇડી ક્રાઇમ દ્વારા ત્રણ જુદી જુદી એફઆઇઆર દાખલ કરવામાં આવી છે. હવે આ સમગ્ર ચકચારભર્યા કૌભાંડમાં ધરપકડનો દોર શરૂ થવાની શકયતા છે.

ચીફ મેટ્રો. કોર્ટનો હુકમ શું હતો ?

   ઇલેકટ્રોથર્મ ઇન્ડિયા લિમિટેડના કરોડો રૂપિયાના કૌભાંડમાં તાજેતરમાં જ ચીફ મેટ્રોપોલીટન મેજિસ્ટ્રેટની કોર્ટમાં ઇલેકટ્રોથર્મ ઇન્ડિયા લિ.ના ફાઉન્ડર તેમ જ ચેરમેન મુકેશ ભંડારી અને ડાયરેકટર સિધ્ધાર્થ ભંડારી દ્વારા સિનિયર એડવોકેટ આર.જે.ગોસ્વામી મારફતે ત્રણ અલગ-અલગ ફરિયાદો દાખલ કરાઇ હતી. જેની સુનાવણીમાં ચીફ મેટ્રોપોલીટન મેજિસ્ટ્રેટ એ.વાય.દવેએ સીઆઇડી ક્રાઇમને એફઆઇઆર નોંધવા બહુ જ મહત્વનો આદેશ જારી કર્યો હતો. કોર્ટે આ સમગ્ર કેસની તપાસ ક્રિમીનલ પ્રોસીજર કોડની તપાસ કલમ-૫૬(૩) મુજબ, સીઆઇડી ક્રાઇમના પીઆઇ કક્ષાથી ઉચ્ચ કક્ષાના હોય તેવા ઉચ્ચ અધિકારી દ્વારા જ કરાવવા પણ તપાસનીશ એજન્સીને સ્પષ્ટ તાકીદ કરી હતી. ઉપરાંત, આ કેસની તપાસ પૂર્ણ કરી ૯૦ દિવસમાં સમગ્ર રિપોર્ટ અદાલત સમક્ષ રજૂ કરવા હુકમ કર્યો હતો.