Gujarati News

Gujarati News

News of Monday, 17th May 2021

ગુજરાતમાં ઓરેન્જ એલર્ટઃ દોઢ લાખ લોકોનું સ્થળાંતર

અમિતભાઈ શાહે વિજયભાઈ રૂપાણી સાથે વિડીયો કોન્ફરન્સથી વાત કરી : રાજયના ૧૫ જિલ્લામાં ૭૦ થી ૧૭૫ કિ.મી.ની ઝડપે પવન ફૂંકાશેઃ બે દિવસ લોકોને ઘરની બહાર નહીં નિકળવા અપિલ

અમદાવાદઃ  અરબી સમુદ્રમાં ઉદભવેલા લો પ્રેશરને પરિણામે સર્જાયેલું તૌકતે વાવાઝોડું હવે પ્રચંડ બની ગયું છે. જેને પગલે ગુજરાતમાં ઓરેન્જ એલર્ટ જાહેર કરાયું છે. સૌરાષ્ટ્રમાં ૧.૫ લાખ લોકોનું સલામત સ્થળે સ્થળાંતર કરાઇ રહ્યું છે.

૧૭૫ કિમીની ઝડપે પવન ફૂંકાવા સાથે ભારે વરસાદની સંભાવના છે. જેમાં સૌરાષ્ટ્રમાં ૧૦ ઇંચ સુધી વરસાદ પડી શકે છે. વાવાઝોડાની અસરથી અમદાવાદ, વડોદરા, દક્ષિણ ગુજરાતના કાંઠાના વિસ્તારોમાં પણ વરસાદ પડવાની આગાહી કરાઇ છે.રાજ્યમાં ઓરેન્જ એલર્ટ જાહેર કરવાની સાથે બે દિવસ સુધી લોકોને ઘર બહાર નહીં નીકળવાની પણ અપીલ કરાઈ છે. આ દરમિયાન કાંઠા વિસ્તારના મોટા ભાગના જિલ્લામાં વરસાદ પડવાની શક્યતા છે, જ્યારે રાજ્યના ૧૫ જિલ્લામાં ૭૦થી ૧૭૫ કિ.મી.ની ઝડપે પવન પણ ફૂંકાશે.

રાજ્યમાં સ્થિતિ બેકાબુ ના થાય તે માટે સરકારે આર્મી, નૌસેના અને વાયુસેનાને પણ સ્ટેન્ડ બાય રહેવાનો નિર્દેશ આપ્યો છે. દરમિયાન વાવાઝોડાની તૈયારીની સમીક્ષા કરવા કેન્દ્રિય ગૃહમંત્રી અમિતભાઈ શાહે મુખ્યમંત્રી વિજયભાઈ રૂપાણી સાથે વિડીયો કોન્ફરન્સ કરી હતી.

સમીક્ષા બેઠક પછી મહેસૂલ વિભાગના અધિક મુખ્ય સચિવ પંકજ કુમારે કહ્યું કે, વાવાઝોડું દક્ષિણ ગુજરાતથી વેરાવળ તરફ ૬૦૦ કિ.મી. દૂર છે, જે ૧૭મીએ ગુજરાતના દરિયા કિનારે આવશે અને ૧૮મીએ પોરબંદરથી લઈને ભાવનગરના મહુવાને ક્રોસ કરશે.

(3:26 pm IST)
  • ગુજરાતના ૧૫ જિલ્લા અને કેન્દ્ર શાસિત પ્રદેશોમાં ભારેથી અતિભારે વરસાદ પડવાની જાહેરાત: મહા ભયંકર વાવાઝોડાને લીધે અડધા ગુજરાતમાં વિનાશક કમોસમી વરસાદ પડશે હવામાન ખાતાએ અત્યારે સાંજે પાંચ વાગ્યે જણાવ્યું છે કે ગીર સોમનાથ, અમરેલી, ભાવનગર, જૂનાગઢ, બોટાદ, વલસાડ, નવસારી, સુરેન્દ્રનગર, રાજકોટ, ભરૂચ, સુરત, અમદાવાદ, આણંદ, ખેડા અને વડોદરા સહિત કેન્દ્ર શાસિત દીવ, દમણ અને દાદરાનગર હવેલી પંથકમાંમાં ભારેથી અતિભારે વરસાદ પડશે access_time 6:19 pm IST

  • મુંબઈમાં ભારે વરસાદ પડી રહ્યો છે અને મુંબઇ 100 કિ.મી. પ્રતિ કલાકની ઝડપે ભારે પવન ફૂંકાઈ રહ્યો છે. હાલમાં મુંબઇમાં NDRFની ત્રણ ટીમો તૈનાત કરવામાં આવી છે અને 5 ટીમો એલર્ટ પર છે. મુંબઈમાં 5 સ્થાનો પર અસ્થાયી આશ્રય ઘરો બનાવવામાં આવ્યા છે, જેથી લોકોને જરૂર પડે તો અહીં સ્થળાંતર કરી શકાય. વેસ્ટર્ન મુંબઈમાં NDRFની ત્રણ ટીમો અને પૂરથી સુરક્ષા માટે ફાયર બ્રિગેડની 6 ટીમો પણ તૈનાત કરવામાં આવી છે. અહીં બપોરે 2 વાગ્યા સુધી એરપોર્ટ પણ બંધ કરવાની જાહેરાત કરવામાં આવી છે. access_time 5:28 pm IST

  • ચક્રવાત તૌકતે : હવામાન વિભાગે જાહેર કર્યું છે કે લેટેસ્ટ સેટેલાઇટ તસ્વીર જોતા વાવાઝોડાની 'આંખ' (કેન્દ્ર) નો આગળનો ભાગ અત્યારે ગુજરાતના દરિયાકાંઠા ક્ષેત્રમાં પ્રવેશી ચુક્યો છે. અત્યારે વાવાઝોડાની લેન્ડફોલ પ્રક્રિયા ચાલુ છે અને તે આગામી 3 કલાકમાં પૂર્ણ થશે. ચક્રવાતનું કેન્દ્ર હાલ દીવથી 35 કિ.મી. પૂર્વ - દક્ષિણપૂર્વમાં છે. તે સૌરાષ્ટ્ર કાંઠો ઓળંગીને દીવની પૂર્વ દિશામાંથી 3 કલાકમાં પસાર થઈ જશે. access_time 10:00 pm IST