Gujarati News

અમદાવાદઃ પેડલ રીક્ષામાં પાછળ દુપટ્ટામાં ઘોડીયુ બનાવીને બાળકને સુવડાવ્યા બાદ આ પેડલ રીક્ષા રસ્‍તા ઉપરથી પસાર થઇ રહી હતી ત્યારે અચાનક દુપટ્ટો તૂટી જતા બાળક રોડ ઉપર ફંગોળાયુ હતું અને કારે તેને કચડી નાખતા તેનું મોત નીપજતા અરેરાટી વ્‍યાપી ગઇ છે.

નારોલમાં આવેલા એક નાનકડા તળાવ પાસે નાની ઓરડીમાં રહેતા 30 વર્ષના ગોપાલ દંતાણીએ પોતાનું 4 વર્ષનું બાળક ગુમાવ્યું. ગરમીમાં તપતા સૂરજથી બચાવવા 4 વર્ષના પુત્ર કરણને પેડલ રિક્ષામાં પાછળની બાજુ ઘોડિયું બનાવીને સૂવડાવતા. બુધવારે જ્યારે કરણ આ રીતે દુપટ્ટાના ઘોડિયામાં સૂતો હતો ત્યારે જ અચાનક તે તૂટી ગયું. બપોરે ગોપાલ દંતાણી પેડલ રિક્ષા પર નારોલ નાકા પાસેથી પસાર થતા હતા, ત્યારે આ દુર્ઘટના ઘટી.

કરણ ઘોડિયામાંથી રોડ પર પડ્યો અને પાછળથી પૂરઝડપે આવતી કાર તેના પર ચડી ગઈ. દંતાણી કારને રોકવા મદદ માટે રડતો રહ્યો, કાર થોડીવાર રોકાઈ પણ અને પછી જતી રહી. ઘાયલ કરણને એલ.જી. હૉસ્પિટલ લઈ જવામાં આવ્યો, થોડી સારવાર બાદ ડોક્ટરે તેને મૃત જાહેર કર્યો.

નારોલ પોલીસે અજાણ્યા કારચાલક સામે બેદરકારીપૂર્વક ગાડી ચલાવવાનો ગુનો દાખલ કર્યો છે. સીનિયર પોલીસ અધિકારીએ જણાવ્યું કે, “અમે ઘટનાસ્થળની આસપાસની દુકાનોના CCTV ફૂટેજ મેળવવાનું શરૂ કર્યું છે, જેથી કાર અને કારચાલકની ઓળખ થઈ શકે.”

પોલીસે આ મામલે પ્રત્યક્ષદર્શીનું નિવેદન પણ નોંધ્યું છે. ”અમને કાર અંગે થોડી માહિતી મળી છે, જેને અમે ચકાસી રહ્યા છીએ. પ્રત્યક્ષદર્શીના જણાવ્યા પ્રમાણે કાર નારોલથી અસ્લાલી તરફ જઈ રહી હતી.”, તેમ સીનિયર પોલીસ અધિકારીએ કહ્યું.