Gujarati News

અમદાવાદના કઠવાડા જીઆઈડીસીમાં આવેલી GSP ક્રોપ સાયન્સ નામની દવા બનાવતી કંપનીમાં ત્રણ મહિનાથી કામ કરતા 12 બાળકો સહિત 94 બંધૂઆ (કરાર આધારિત)મજૂરોને નિકોલ પોલીસે છોડાવ્યા છે. આ તમામ મજૂરોને ગોંધી રાખી તેમની ઈચ્છા વિરૂદ્ધ કામ કરાવવાની સાથે આર્થિક શોષણ પણ કરવામાં આવતું હતું.

  આ અંગે મળતી વિગત મુજબ સિનોયહીલ પુટી ક્રિશ્ચન (રહે. મૂળ આસામ ) અને હોતન બાયુની ક્રિશ્ચન (રહે.મૂળ નાગાલેન્ડ )મારફતે આરોપી મુકેશ ભરવાડ મજૂરોને લાવી કામ કરાવતો હતો.

  આ તમામ મજૂરોને SP રિંગ રોડ પર રણાસણ ટોલટેક્સ પાસે આવેલા બામ્ભા ફાર્મ હાઉસમાં રાખવામાં આવ્યા હતા. આ મામલે મુકેશ રણછોડ ભરવાડ નામના શખ્સની અટકાયત કરી ત્રણ શખ્સો સામે ફરિયાદ નોંધવામાં આવી છે. મુકેશ ભરવાડ બેથી ત્રણ એજન્ટ દ્વારા આ લોકોને નાગાલેન્ડ અને આસામથી લાવ્યો હતો. જેમાના કેટલાક ત્રણ માસથી અને કેટલાક ચાર માસથી કામ કરતા હતા. હાલ કેટલી કંપનીઓમાં આ લોકોને મજૂરી કરાવવામાં આવતી હતી તે અંગે તપાસ ચાલુ છે.

  તમામ મજૂરોને પગાર પણ આપતા ન હતા અને પરિવાર સાથે વાત નહોતા કરવા દેતા. આ મામલે જુવેનાઇલ જસ્ટિસ, ચાઈલ્ડ લેબર, બોન્ડેડ લેબર કાયદા હેઠળ કાર્યવાહી કરવામાં આવી રહી છે. તેમજ આ કેસની અન્ય એજન્સીઓ પણ તપાસ કરશે. આરોપી મુકેશ ભરવાડના લગ્ન આસામમાં થયા હોવાથી તે ત્યાંથી મજૂરો લાવતો હતો.