Gujarati News

Gujarati News

News of Saturday, 15th September 2018

બાબુ બજરંગીના ઘેર તસ્કર ત્રાટકયા : દાગીનાની ચોરી

નરોડા પાટિયા હત્યાકાંડમાં બજરંગીને સજા થઇ છે : બાબુ બજરંગીના પુત્ર દ્વારા સરદારનગર પોલીસ મથકમાં ફરિયાદ કરાઈ : પોલીસે સમગ્ર મામલે તપાસ શરૂ કરી

અમદાવાદ,તા. ૧૫ : વર્ષ ર૦૦રમાં થયેલા નરોડા પાટિયા હત્યાકાંડમાં સજા પામેલા બાબુ બજરંગીના ઘરમાંથી ગઇકાલે તસ્કરોએ ત્રાટકી સોના-ચાંદીના દાગીના તેમજ રોકડ રકમથી ભરેલ સેફ લોકરની ચોરી કરીને ફરાર થઇ જતાં સમગ્ર વિસ્તારમાં ભારે ચકચાર મચી ગઇ છે. આ બનાવની જાણ થતાં બાબુ બજરંગીના પુત્રએ સરદારનગર પોલીસમથકમાં ફરિયાદ નોંધાવી છે, જેના આધારે પોલીસે વધુ તપાસ હાથ ધરી છે. નરોડા વિસ્તારમાં આવેલ ભાગ્યોદય સોસાયટીમાં રહેતા અને વકીલાતનો અભ્યાસ કરતા બાબુ બજરંગીના પુત્ર વિરેન પટેલે સરદારનગર પોલીસ સ્ટેશનમાં એ મતલબની ફરિયાદ નોંધાવી હતી કે, ગુરુવારે વિરેનનાં ચાર મહિનાનાં ભત્રીજા ધ્વીનને બાયડ ખાતે આવેલી હોસ્પિટલમાં સારવાર માટે દાખલ કર્યો હોવાથી તે તેનાં પિતા બાબુભાઇ સહિત પરિવાર સાથે ઘર બંધ કરીને બાયડ ગયાં હતાં. ગઇ કાલે વહેલી પરોઢે વિરેનના સામેના મકાનમાં રહેતાં લીલાબહેન પટેલે ફોન કર્યો હતો અને મકાનમાં ચોરી થઇ હોવાનું જણાવ્યું હતું. ચોરીનાં સમાચાર મળતાંની સાથે વિરેન, તેનો મોટો ભાઇ તરુણ અને પિતા બાબુભાઇ તેમના ઘરે પરત આવ્યા હતા. ઘરનો મુખ્ય દરવાજો તૂટેલો હતો અને ઘરનો તમામ સરસામાન વેરવિખેર હતો અને લોખંડની તિજોરીમાં પડેલ સેફ લોકર ગાયબ હતું. લોકરમાં પાંચ લાખ કરતાં વધુના સોના-ચાંદીના દાગીના અને ૬૦ હજારની રોકડ રકમ હતી. ચોરી કરવા માટે ત્રણ ચોર બાઇક લઇને આવ્યા હતા. લીલાબહેને ચોર-ચોર કરીને બૂમો પાડતાં ત્રણેય જણા બાઇક લઇને નાસી ગયા હતા. બાબુ બજરંગીને બાયપાસ સર્જરી કરાવી હોવાથી તેઓ ફર્લો પર જેલની બહાર છે. સરદારનગર પોલીસે સમગ્ર મામલે તપાસ શરૂ કરી છે. જો કે, બાબુ બજરંગીના ઘરમાં તસ્કરોએ ત્રાટકી હાથ સાફ કરતાં સમગ્ર વિસ્તારમાં ચકચાર મચી ગઇ હતી.

 

(8:07 pm IST)
  • સાવરકુંડલાના ઘોબા અને ભમોદરા માં ધોધમાર વરસાદ:અડધો ઇંચ વરસાદ ખાબકતા ઘોબા ની બજારો થઈ પાણી પાણી:ખેડૂતો માટે આશીર્વાદ સમાનનો વરસાદ:રસાદને કારણે ખેડૂતોમાં ખુશહાલી access_time 8:28 pm IST

  • ઉ.પ્ર.ના આઝમગઢમાં આંબેડકર પાર્કમાં આંબેડકરજીની મૂર્તિ સાથે ચેડાઃ તોડ ફોડઃ પોલીસ દ્વારા નરાધમોને ઝડપી લેવા પ્રયાસોઃ મૂર્તિ નવી મૂકવા તજવીજ હાથ ધરાઈ access_time 11:58 am IST

  • નરેન્દ્રભાઈના સ્વચ્છતા અભિયાનમાં અમિતાભ અને રતન ટાટા જોડાયાઃ 'સ્વચ્છતા હી સેવા' અભિયાનનો પ્રારંભ : આજથી ૨ ઓકટોબર સુધી સ્વચ્છતા માટે યોગદાન આપવા વડાપ્રધાનની અપીલ : ૩ લાખ બાળકોની જીંદગી બચી, ૪ વર્ષમાં ૯ કરોડ શૌચાલયો બન્યા access_time 3:19 pm IST