Gujarati News

Gujarati News

News of Thursday, 14th October 2021

અમદાવાદ સાઇબર ક્રાઇમ બ્રાન્ચે ઓનલાઇન શોપિંગ કૌભાંડો કર્યો પર્દાફાશ : બે આરોપીઓની ધરપકડ

ગ્રાહકોના ઑનલાઇન ડિલિવરી કરેલા ઓર્ડરને હેક કરીને સરનામું બદલી કોઈપણ રીતે મેળવી વગર ખર્ચે ઓનલાઈન પ્લેટફોર્મનો લાભ લેતા

અમદાવાદ સાઈબર ક્રાઈમ બ્રાન્ચે ઓનલાઇન શોપિંગ કૌભાંડનો પર્દાફાશ કરી લાખો રૂપિયાનો મુદ્દામાલ કબ્જે કર્યો છે. સાયબર ક્રાઇમની ટીમે 2 આરોપીઓની ધરપકડ કરી લાખો લોકોના થયેલા ડેટા લીક કૌભાંડનો પર્દાફાશ કર્યો છે છે. બને આરોપીઓ ઓનલાઇન શોપિંગ કરનાર ગ્રાહકોના ઓર્ડર બારોબાર મેળવી લેતા હતા.આરોપીઓ ગૌતમ ઉર્ફે પૃથ્વી બારડ અને નિલેશ બાબરીયા. બંને યુવકોની છેતરપીંડી કરતા પહેલા પબજી ગેમ રમતા દરમિયાન મુલાકાત થઈ હતી.

 બંને આરોપીઓએ કઈ ખાસ અભ્યાસ કર્યો નથી તે છતાં માસ્ટર માઈન્ડ છે અને ટેલિગ્રામમાંથી તમામ લોકોના ડેટા મેળવી એકાઉન્ટ હેક કરી છેતરપીંડી કરતા. પકડાયેલ બન્ને આરોપીઓ ફ્લિપકાર્ટ, મંત્રા, બ્રાન્ડ ફેક્ટરી, ટાટા ક્લિક જેવી બીજી વેબસાઈટના ગ્રાહકોના ઑનલાઇન ડિલિવરી કરેલા ઓર્ડરને હેક કરીને સરનામું બદલી કોઈપણ રીતે મેળવી લેતા હતા. બનેં આરોપીઓએ ટેલીગ્રામમાંથી આ તમામ ડેટા મેળવી ભોગ બનનારના યુઝરના એકાઉન્ટ હેક કરી આ સમગ્ર કૌભાડ આચર્યું હોવાનું સામે આવ્યું છે.

આ અંગે સાયબર ક્રાઈમ ડીસીપી અમિત વસાવાએ જણાવ્યું કે, પોલીસને પ્રાથમિક તપાસમાં જાણવા મળ્યું છે કે માત્ર ગુજરાતમાં જ નહિ પરંતુ સમગ્ર દેશના ગ્રાહકોનાં ઓર્ડર મેળવી લઈ કૌભાંડ આચરતા હતાં અને છેલ્લા એક વર્ષમાં અનેક લોકોના ડેટા હેક કરી તેઓના એકાઉન્ટ અને ટાર્ગેટ કર્યા હતા. ઉલ્લેખનીય છે કે, આરોપીઓ ઓર્ડર કોઈ ઘરે કે ઓફિસની જગ્યા પર નહિ પરંતુ રોડ પર જ ઓર્ડરની ડિલિવરી મેળવવા હતા. અત્યારસુધીમાં બંને આરોપીઓએ 1 હજારથી વધુ લોકો સાથે ચિટિંગ કર્યું હોવાનું સામે આવ્યું છે. જોકે સાયબર ક્રાઈમેં આરોપીઓ પાસેથી 92 વસ્તુ કબજે કરી છે.

આરોપીઓની મોડેસ ઑપરેન્ડીની વાત કરીએ તો પશ્ચિમ બંગાળથી એક ડમી સિમકાર્ડ લાવ્યા હતા. જે સીમ કાર્ડ માત્ર ઓર્ડરની ડિલિવરી માટે અડધો કલાક ચાલુ રાખી બંધ કરી દેતા હતા. જેથી કરીને પોલીસ તેમને ટ્રેક ના કરી શકે. આરોપી ખાસ કરીને જે એડવાન્સ પેમેન્ટ કરીને ઓર્ડર કરતા હતા તેવા ગ્રાહકોને ટાર્ગેટ કરતા હતા. નોંધનીય છે કે આ ગેંગમાં અન્ય લોકો સામેલ હોય શકે છે. કારણ કે આ દેશ વ્યાપી કૌભાંડ છે જેથી અન્ય લોકોને પકડવાની કાર્યવાહી હાથ ધરી છે. સાથો સાથ આરોપીઓ કોને કોને માલ વેચ્યો છે તેની પર પોલીસ તપાસ કરી છે.

(9:23 pm IST)