Gujarati News

સુરત, તા. ૧૩ : કર્ફ્યુ તોડવા પર કુમાર કાનાણીના દીકરાને ધમકાવનાર મહિલા કોન્સ્ટેબલ સુનિતા યાદવ રાતોરાત ટ્વીટર સેન્સેશન બની ગઈ. જોકે હવે તે પોતાની નોકરી પરથી રાજીનામું આપવા ઈચ્છે છે અને IPS અધિકારી બનવા માટે સિવિલ સર્વિસની પરીક્ષા આપવા ઈચ્છેછે. સોમવારે સુનિતા શહેર પોલીસ કમિશનર આર.બી બ્રહ્મભટ્ટને મળવા માટે ગઈ હતી. અન્ય સીનિયર અધિકારીઓ સાથે ચર્ચા કર્યા બાદ આખરે તેને મળવા માટેની મંજૂરી અપાઈ હતી. સુનિતાએ પોલીસ કમિશનરને જણાવ્યું કે તે સમાજની સેવા કરવા માટે IPS ઓફિસર બનવા ઈચ્છે છે અને પોતાની પોસ્ટ પરથી રાજીનામું આપવા ઈચ્છે છે. પોલીસ કમિશનરે જણાવ્યું કે, મેં તેને લોકો સાથે સારી રીતે વર્તવાની સૂચના આપી. કોઈ પોલીસ અધિકારીએ લોકો સાથે અપશબ્દોનો ઉપયોગ ન કરવો જોઈએ.

           ઉલ્લેખનીય છે કે, સુનિતાએ રાજ્યના સ્વાસ્થ્ય મંત્રી કુમાર કાનાણીના દીકરા પ્રકાશને ૮મી જુલાઈને રાત્રે અટકાવ્યો હતો. રવિવારે કર્ફ્યુનું પાલન ન કરવા બદલે તેની અન્ય બે મિત્રો સાથે ધરપકડ કરાઈ હતી. કર્ફ્યુના આદેશનું પાલન ન કરવા પર પ્રકાશને સવાલ કરતા સુનિતાના વીડિયો અને ઓડિયા વાઈરલ થયા હતા. વીડિયોના આધારે તેમની ધરપકડ કરાઈ હતી, જોકે બાદમાં તેને જામીન આપી દેવાયા હતા. ઘટના બાદથી જ સુનિતાને ટ્વિટર પર લોકોનો ખૂબ સપોર્ટ મળી રહ્યો હતો. સેમવારે પણ સુનિતાનો વધુ એક વીડિયોસામે આવ્યો હતો, જેમાં તે વરાછામાં દુકાનોની બહાર સોશિયલ ડિસ્ટન્સિંગના નિયમનું પાલન ન કરનારા લોકોને ઉઠ-બેસ કરાવતી જોવા મળે છે. કેમોફ્લાજ માસ્ક પહેરેલી સુનિતા લોકોને દંડાથી મારવાની ધમકી પણ આપતી દેખાય છે.

            સિનિયર પોલીસ અધિકારીએ જણાવ્યું કે, આ ઘટના વરાછા પોલીસ સ્ટેશનના સિનિયર પોલીસ અધિકારીઓના ધ્યાને લવાઈ હતી. સ્થાનિક લોકોએ તેના ખરાબ વર્તન અંગે ફરિયાદ કરતા તેને અન્ય જગ્યાએ શિફ્ટ કરવામાં આવી હતી. તે અપશબ્દોનો ઉપયોગ કરતી હોવાની પણ ફરિયાદો સામે આવી છે. ઉલ્લેખનીય છે કે હાલમાં સોશિયલ મીડિયામાં સુનિતાનો કારમાં 'પોલીસલ્લનું બોર્ડ લગાવેલો એક ફોટો પણ વાઈરલ થઈ રહ્યો છે. આ કાર તેના પિતાના નામ પર રજિસ્ટર્ડ છે. છેલ્લા કેટલાક દિવસોમાં સુનિતાના નામે ઘણા ફેક એકાઉન્ટ્સ અને ફોટો પણ સામે આવ્યા છે.