Gujarati News

Gujarati News

News of Thursday, 14th June 2018

કિંમતી ચીજવસ્તુની તફડંચી કરતી ગેંગ હાલમાં સક્રિય છે

વિવિધ વિસ્તારોમાં રૂ.૫.૫૦ લાખની મત્તા ગુમાવી :માત્ર ૩૬ કલાકમાં કૃષ્ણનગર, નિકોલ, ઇસનપુર, સોલા સહિતના વિસ્તારમાં ગેંગનો આતંક :પોલીસ દોડતી થઇ

અમદાવાદ,તા. ૧૪ :શહેરમાં છેલ્લા કેટલાક સમયથી એકલ-દોકલ વ્યક્તિની નજર ચૂકવી સોના-ચાંદીના દાગીના સહિત કિંમતી માલ-સામાનની તફડંચી કરતી ગેંગ સક્રિય બનતા લોકોમાં ભયની લાગણી પ્રસરી છે. માત્ર છેલ્લા ૩૬ કલાક દરમ્યાન શહેરના કૃષ્ણનગર, નિકોલ, ઇસનપુર અને સોલા સહિતના વિસ્તારમાં નજર ચૂકવી તફડંચી કરવાના બનેલા બનાવમાં લોકોએ આશરે રૂ.પ.પ૦ લાખની માલમત્તા ગુમાવી છે. આ બનાવોને પગલે જે તે વિસ્તારની પોલીસે જરૂરી ગુનો નોંધી તપાસ શરૂ કરી છે અને ગેંગના સભ્યોને પકડવા માટે દોડતી થઇ છે. આ અંગેની વિગત એવી છે કે, સૈજપુર ટાવર નજીક કુબેરદાસની જુની ચાલીમાં રહેતી કોકિલાબહેન સુરેશભાઇ શર્મા નામની મહિલા આ વિસ્તારમાં ફદેલી રોડ પર તખતેશ્વર મહાદેવના મંદિર પાસે પસાર થતી હતી ત્યારે બે શખસોએ તેને રોકી વિશ્વાસમાં લઇ નજર ચૂકવ્યા બાદ રૂ. બે લાખના સોનાનાં ઘરેણાં તફડાવી લીધા હતા. પોતે ઘરેણાં ગુમાવ્યા હોવાનો અહેસાસ થતા આ મહિલાએ કૃષ્ણનગર પોલીસ સ્ટેશનમાં ફરિયાદ નોંધાવી હતી. જ્યારે નિકોલમાં સામવેદની બાજુમાં આવેલ શ્રીમત ફલેટમાં રહેતા હર્ષભાઇ કનુભાઇ ચૌહાણ નિકોલ સરદાર મોલ પાસે પોતાનું એક્ટિવા પાર્ક કરી ઊભા હતા ત્યારે કોઇ શખસે તેની નજર ચૂકવી એક્ટિવાની ડેકીમાંથી રૂ.૯૦ હજારની રકમની તફડંચી કરી હતી. આ ઉપરાંત નાના ચિલોડામાં આવેલ પુષ્કર હોમમાં રહેતી હેમાબહેન મનીષભાઇ જીવનાની નામની યુવતી ઇસનપુર ચાર રસ્તાથી ઓટો રિક્ષામાં વિશાલનગર તરફ જવા માટે બેઠી હતી. આ રિક્ષામાં અગાઉથી બેઠેલા ત્રણ ગઠિયા હેમાબહેનની નજર ચૂકવી તેમની બેગમાંથી સોનાના દાગીના અને રોકડ મળી રૂ.૮પ૦૦૦ની મતા તફડાવી ફરાર થઇ ગયા હતા. તો આવા જ અન્ય એક બનાવમાં, રાણીપ ખાતે રહેતા શાંતીલાલ જીવરામભાઇ જોશી અમદાવાદ ગીતામંદિર બસ સ્ટેશનથી રિક્ષામાં બેસી રાણીપ તરફ જઇ રહ્યા હતા ત્યારે રિક્ષામાં બેઠેલ ગઠિયાએ તેમના થેલા પર બ્લેડથી ચેકો મૂકી બેગમાંથી રૂ.૧.પ૦ લાખની રકમ તફડાવી લીધી હતી. પોલીસે આ બનાવો અંગે ગુના દાખલ કરી આગળની કાર્યવાહી હાથ ધરી છે. બીજીબાજુ, નાગરિકોમાં આ પ્રકારે તફડંચી કરતી ગેંગને પકડી તેની વિરૂધ્ધ સખત કાર્યવાહી કરવા ઉગ્ર માંગણી ઉઠવા પામી હતી.

(8:22 pm IST)
  • મુંબઈ હુમલાનો માસ્ટર માઈન્ડ હાફિઝ સઈદને જોરદાર ઝટકો :ચૂંટણી આયોગે હાફિઝના સંગઠન જમાત-ઉદ દવાની રાજકીય એકમ મિલ્લી મિસલીમ લીગને રાજકીય પાર્ટી તરીકે નોંધણી કરવાની અરજી ફગાવી :ઇસ્લામાબાદ ઉચ્ચ ન્યાયાલયે પાકિસ્તાન ચૂંટણી પંચે હાફીઝ્ની પાર્ટીને રાજકીય પાર્ટી તરીકે રજીસ્ટ્રેશન કરવાની અરજી નકારી કાઢવાના પોતાના નિર્ણ્યની સમીક્ષા કરે access_time 1:22 am IST

  • દિલ્હીના મંત્રી ઇમરાન હુસૈનને જાનથી મારી નાખવાની ભાજપના ધારાસભ્યે ધમકી દીધીઃ પર્યાવરણમંત્રી ઇમરાને ઈંદ્રપ્રસ્થ પોલીસ સ્ટેશનમાં ભાજપના ધારાસભ્ય મનિન્દરસિંહ સિરસા વિરુદ્ધ ફરિયાદ નોંધાવી :સરકારી કામમાં ખલેલ પહોચાડયાનો પણ આક્ષેપ access_time 12:57 am IST

  • ગૌરી લંકેશના શંકાસ્પદ હત્યારાઓના હિટલિસ્ટમાં બીજા અનેક લોકોના નામ હોવાનું ખુલ્યું : એસઆઇટીના સુત્રોએ કહ્યું કે,હિટલિસ્ટમાં ગિરીશ કર્નાડ ઉપરાંત જ્ઞાનપીઠ પુરસ્કાર વિજેતા નેતા, સાહિત્યાકર બીટી લલિતા નાઇક, નિદુમામિડી મઠના પ્રમુખ વીરભદ્ર ચન્નામલ્લા સ્વામી અને બુદ્ધિજીવી સીએસ દ્વારકાનાથનો સમાવેશ access_time 12:55 am IST