Gujarati News

અમદાવાદઃ 22 વર્ષીય MBBSની વિદ્યાર્થિનીએ ટેક્સી ડ્રાઇવર પર છેડતીનો આરોપ લગાવ્યો છે. આરોપી ગાંધીનગરમાં કોઇ અગ્રણી નેતાનો ડ્રાઇવર હોવાનો દાવો કર્યો હતો. વિદ્યાર્થિનીએ આરોપ લગાવ્યો કે દાણીલિમડામાં રહેતો સૈનિશ ઠક્કર નામનો આ ડ્રાઇવર સતત તેને મેસેજ અને ધમકીભર્યા ફોન કરી રહ્યો હતો.

યુવતીની ફરિયાદ મુજબ 28મી ફેબ્રુઆરીએ ચાંદખેડામાં ઇન્ટર્વ્યૂ હોવાથી ચિલોડાથી ચાંદખેડા જવા માટે પોતે ઠક્કરની શટલ ટેક્સીમાં બેઠી હતી. પોલીસ અધિકારીએ જણાવ્યું કે, “પરત જવા માટે વાહન ન મળે તો પોતે લઇ જશે તેવું કહી રસ્તામાં ઠક્કરે તેણીનો નંબર માગ્યો હતો, પણ વિદ્યાર્થિનીએ નંબર આપવાની ના પાડી દીધી. ટેક્સી ડ્રાઇવરે આગ્રહ કરતાં વિદ્યાર્થિનીએ ડ્રાઇવરનો નંબર લઇ લીધો હતો.”

પોલીસ અધિકારીએ કહ્યું કે, “પરત ફરતી વખતે વિદ્યાર્થિની ચાંદખેડાથી ગાંધીનગર સુધી સ્ટેટ ટ્રાન્સપોર્ટમાં ગઇ હતી. પણ ગાંધીનગરથી ચિલોડા જવા માટે વાહન ન મળ્યું અને તેણી હિંમતનગરની બસ ચૂકી ગઇ હતી. તેણીએ પોતાના ભાઇને પિકઅપ કરવા માટે ફોન કર્યો તો તેણે કહ્યું કે ટેક્સીમાં આવી જા. જે બાદ વિદ્યાર્થિનીએ ઠક્કરને ફોન કર્યો, ઠક્કરે કહ્યું કે તે ગાંધનગરમા જ છે અને 5 મિનિટમાં પિકઅપ કરી જશે.”

પોલીસે જણાવ્યા મુજબ, “વિદ્યાર્થિની પાછળની સીટ પર બેઠી હતી, ચિલોડા-ગાંધીનગર હાઇવે પર ડ્રાઇવરે એક જગ્યાએ ગાડી રોકી અને દરવાજા તથા વિન્ડો તરફ નજર ફેરવી. બાદમાં આરોપીએ વિદ્યાર્થિનીને પોતાની તરફ ખેંચી, એક હાથમાં તેણીને દબોચી રાખી અને બીજા હાથેથી સેલ્ફી ખેંચી. બાદમાં ફોટો સોશિયલ મીડિયામાં વાયરલ કરી દેવાની ધમકી આપીને યુવતી પાસે સેક્સ્યૂઅલ ડિમાન્ડ કરવા લાગ્યો હતો. બાજુમાંથી 4-5 વાહન પસાર થઇ રહ્યાં હતાં ત્યારે વિદ્યાર્થિનીએ કાર વિન્ડોને જોરથી ફટકારવાનું શરૂ કર્યું, એલર્ટ થયેલા ટેક્સી ડ્રાઇવરે કાર ડોર અનલોક કરી દીધો અને વિદ્યાર્થિની ટેક્સીની બહાર નીકળી ગઇ હતી.”

જે બાદ ઠક્કર તેને મેસેજ અને ધમકીભર્યા ફોન કરવા લાગ્યો હતો. વિદ્યાર્થિનીએ કહ્યું કે ઘટનાને પગલે તે બહુ ડરી ગઇ હતી અને તેને કારણે તરત ફરિયાદ નહોતી નોંધાવી શકી. બાદમાં વિદ્યાર્થિનીના પરિજનોની સલાહથી તેણીએ હિંમતનગર પોલીસ સ્ટેશને ફરિયાદ નોંધાવી હતી. પોલીસે ફોન પર વોર્નિંગ આપવા સિવાય ઠક્કર વિરુદ્ધ કાંઇ પગલાં નહોતાં ભર્યાં. જે બાદ વિદ્યાર્થિનીએ સિનિયર અધિકારીઓનો સંપર્ક સાધ્યો અને ચિલોડા પોલીસ સ્ટેશનમાં FIR દાખલ કરી. ચિલોડા પોલીસ સ્ટેશનના ઇન્સપેક્ટર એલ.ડી. વાઘેલાએ કહ્યું કે, “છેડતી અને ધાકધમકી બદલ અમે તુરંત આરોપીની ધરપકડ કરી લીધી છે.” ફોન કોલ્સ અને મેસેજ મોકલવા માટે ઉપયોગમાં લીધેલ ન્ંબર પરથી પોલીસે ઠક્કરને ટ્રેક કર્યો હતો.