Gujarati News

રાજકોટ તા.૧૩: રાજય સરકારે ખેડુતો પાસેથી ટેકાના ભાવે ખરીદેલ ચણા, તુવેર અને રાયડાના નાણા લાંબા સમયથી ખેડુતોના ખાતામાં જમા ન થતા ખેડુતોમાં ભારે કચવાટ ફેલાયો છે. ત્રણેય ઉપજના મળી રૂ. ૭૦૦ કરોડ જેવી રકમ ચુકવવાની થાય છે. સરકારે કન્ટીજન્સી ફંડમાંથી ખેડુતોને નાણા ચુકવવાની પ્રક્રિયા હાથ ધરી છે. ફાઇલ નાણા વિભાગમાં પહોંચી ગઇ છે. અઠવાડિયામાં મંજુરી મળે તેવી આશા છે.સરકારે જે તે વખતે ચણા, રાયડો અને તુવેર ટેકાના ભાવે ખરીદી ખેડુતોને પોષણક્ષમ ભાવ આપવા પ્રયાસ કરેલ. ખેડુતો પોતાની ખેત ઉપજના પોષણક્ષમ ભાવ મેળવવા સમયસર નાણા મળવાની આશાએ ટેકાના ભાવે વેચાણ કરતા હોય છે. સરકારની વહીવટી આટીઘુંટીએ ખેડુતોની આશા પર પાણી ફેરવી દીધું છે. વાવણીની મોસમ હોવાથી ખેડુતોને પૈસાની વિશેષ જરૂર હોય તે સ્વાભાવિક છે. ત્રણેક મહિનાથી ખેડુતો હકકના નાણાની રાહ જોઇ રહયા છે.

સરકારી સુત્રોના જણાવ્યા મુજબ ખેડુતોની ફરીયાદમાં તથ્ય છે. રાજય સરકારે ટેકાના ભાવે ખરીદી માટે રૂ. ૫૦૦ કરોડનુ઼ રીવોલ્વીંગ ફંડ ઉભુ કરેલ તેમાંથી રૂ. ૯૦ કરોડ જેટલી રકમ પડી છે. ભારત સરકારે ૨૦૦ કરોડ રૂ. છુટ્ટા કર્યા છે. બાકીના નાણાની બજેટમાં જોગવાઇ ન હોવાથી સરકારે કન્ટીજન્સી ફંડમાંથી રૂ. ૪૦૦ કરોડ ઉપાડી ખેડુતોને ચુકવવાનું નક્કી કર્યુ છે. તે માટેની ફાઇલ નાણા ખાતામાં પડતર છે. અત્રે ઉલ્લેખનીય છે કે રાજય અને કેન્દ્ર બન્ને જગ્યાએ ભાજપની સરકાર છે વિપક્ષના ધારાસભ્યને રાજીનામુ અપાવીને એજ દિવસે પ્રધાન બનાવી શકતી રૂપાણી સરકાર ખેડુતોને નાણા ચૂકવવામાં અકળ વિલંબ કરી રહી છે 'સ્કાય'  યોજનાથી ખેડૂતોના ખેતરમાં વીજળી ઉત્પન્ન કરાવી તે વીજળી સરકાર ખરીદશે તેવા સપના

દેખાડનારા શાસકો પહેલા ત્રણ મહિનાથી ખરીદેલ ચણા, તુવેર, રાયડાના નાણા ચૂકવે તેવું ખેડુતો ઇચ્છી રહયા છે.