Gujarati News

વડોદરા;શહેરના ગોત્રી ખાતે રહેતા ડોક્ટરે અનગઢ ખાતે હોસ્પિટલ ખોલીને મહિલા દર્દીઓ સાથે કામલીલા આચરી હતી. મહિલા દર્દીઓ સાથેના તેમના વીડિયો વાયરલ થયા બાદ ડોક્ટરે અનગઢ ખાતે પોતાનું ક્લિનિક બંધ કરી દીધું હતું. બાદમાં તેમણે બોરસદ તાલુકાના અનારસ ગામ ખાતે નવું ક્લિનિક શરૂ કર્યું હતું. જોકે, અનારસ ગામના લોકોને ડોક્ટરની કામલીલા અંગે જાણ થઈ જતાં ડોક્ટર ત્યાંથી પણ રફુચક્કર થઈ ગયો હતો. બીજી તરફ ગામ લોકોએ નક્કી કર્યું છે કે હવે તે ડોક્ટરને તેના ગામમાં ઘૂસવા નહીં દે.

   મળતી માહિતી પ્રમાણે ડો. પ્રતિક જોશીએ અનારસ ખાતે 15 દિવસ પહેલા જ ભાડાના મકાનમાં પોતાનું ક્લિનિક શરૂ કર્યું હતું. બાદમાં ગામના લોકોને વાયરલ થયેલા વીડિયો પરથી ખબર પડી હતી કે કામલીલામાં જોવા મળતો ડોક્ટર તેમના ગામમાં નવું દવાખાનું શરૂ કરનાર પ્રતિક જોશી જ છે. આ અંગે ગામના અમુક લોકોએ ડોક્ટરની પૂછપરછ કરી હતી. બાદમાં ડોક્ટર ગામમાંથી ફરાર થઈ ગયો હતો. ડોક્ટર ફરાર થઈ ગયા બાદ ગામના લોકોએ મકાનના બહાર ડોક્ટરના નામના બોર્ડ પર લાલ કલર લગાવી દીધો હતો.