Gujarati News

Gujarati News

News of Tuesday, 13th March 2018

ગુલાબી ઇયળના ત્રાસ અને પાણીની તંગીને લીધે

કપાસના ઉત્પાદનમાં મોટો ઘટાડો થશે

અમદાવાદ તા. ૧૩ : કોટન એસોસિયેશન ઓફ ઇન્ડિયા (સીએઆઇ)એ ચાલુ કોટન વર્ષ દરમિયાન કોમોડિટીનું ઉત્પાદન ૩૬૨ લાખ ગાંસડી (એક ગાંસડી એટલે ૧૭૦ કિગ્રા) રહેશે એમ જણાવ્યું છે.

તાજેતરમાં મળેલી બેઠકમાં તેણે અગાઉના ૩૬૭ લાખ ગાંસડીના અંદાજમાં ૫ લાખ ગાંસડીનો ઘટાડો કર્યો છે. તેમાં મુખ્ય ઘટાડો કર્ણાટક અને તામિલનાડુમાંથી જોવા મળશે એમ સંસ્થાએ જણાવ્યું છે. બંને રાજયોમાં ઉત્પાદન બે-બે લાખ ગાંસડી જેટલું ઓછું જોવા મળશે. જયારે અન્યત્ર એક લાખ ગાંસડી ઉત્પાદન ઘટશે. ગુલાબી ઈયળની સમસ્યા તેમજ પાણીની તંગીને કારણે પાકમાં ઘટાડો નોંધાશે.ઉત્પાદનમાં અગાઉના અંદાજ સામે ઘટાડો જોવાયો છે પરંતુ દેશમાંથી નિકાસ સારી જોવા મળી રહી છે. અગાઉના ૫૫ લાખ ગાંસડીના અંદાજ સામે દેશમાંથી ચાલુ સીઝનમાં નિકાસ ઊંચી રહેવાની સંભાવના છે. ૬૦ જેનું મુખ્ય કારણ વિશ્વમાં હાલમાં ભારતીય કોટન સૌથી સસ્તું કોટન છે અને તેથી સ્થાનિક પાકની ઊંચી માગ રહી છે.

૩૧ માર્ચ સુધીમાં ભારતમાંથી ૪૫ લાખ ગાંસડીની નિકાસ થઈ જવાની સંભાવના છે. ભારતીય ટેકસટાઇલ મિલ્સનો વપરાશ ૧૦ લાખ ગાંસડી વધીને ૩૨૦ લાખ ગાંસડી પરથી ૩૩૦ લાખ ગાંસડી રહેશે. વપરાશમાં વૃદ્ઘિનું મુખ્ય કારણ ગુજરાતમાં ૩૫-૪૦ લાખ નવી સ્પિન્ડલ્સની સ્થાપના છે. આમ ગુજરાતમાં કોટનનો વપરાશ નોંધપાત્ર વધીને ૬૫ લાખ ગાંસડીનો રહેવાની સંભાવના છે એમ સીએઆઇના પ્રમુખ અતુલ ગણાત્રા જણાવે છે.

૨૦૧૭-૧૮ના વર્ષ માટે કેરી ફોરવર્ડ ઘટીને ૨૨ લાખ ગાંસડી રહેવાની સંભાવના છે. જે અગાઉ ૪૨ લાખ ગાંસડી રહેવાનો અંદાજ મુકાતો હતો. કેરી ફોરવર્ડમાં ઘટાડો મુખ્યત્વે ભારતીય મિલ્સના વપરાશમાં ૧૦ લાખ ગાંસડીની વૃદ્ઘિને કારણે છે. ઉપરાંત નિકાસમાં ૫ લાખ ગાંસડી વૃદ્ઘિ અને ઉત્પાદનમાં ૫ લાખ ગાંસડીનો ઘટાડો પણ આ માટે કારણભૂત છે.ઊંચા સ્થાનિક વપરાશ અને નિકાસ માગ પાછળ આગામી સમયગાળામાં કોટનના ભાવમાં મજબૂતી જોવા મળે તેવું પણ ગણાત્રા જણાવે છે. છેલ્લાં ત્રણેક વર્ષથી ભારતમાંથી નીચી આયાત કરી રહેલા ચીનમાં પણ રિઝર્વ સ્ટોકનો વપરાશ ચાલુ છે અને તેથી ત્યાંની માગ પણ વધી શકે છે.(૨૧.૧૪)

 

(11:39 am IST)
  • આજથી 88 વર્ષ પહેલા 12 માર્ચના ઐતિહાસિક દિવસે મહાત્મા ગાંધીએ અમદાવાદના સાબરમતી આશ્રમથી દાંડીકૂચ કરી બ્રિટિશ શાસનના પાયા હચમચાવી નાંખ્યા હતા. જેમાં દાંડી ખાતે ગાંધીજીએ ચપટી મીઠું ઉપાડીને કાયદો તોડીને સત્યાગ્રહ કરતા લોકજુવાળ ભભુકી ઉઠ્યો હતો. આજ દિવસે ગાધીએ સપથ લીધા હતા કે ‘કાગડા-કૂતરાના મોતે મરીશ પણ સ્વરાજ લીધા વિના પાછો નહીં ફરું' access_time 10:02 am IST

  • મે-ર૦૧૯ સુધી આધારકાર્ડની જરૂરીયાતનો સુપ્રિમ કોર્ટ મુલત્વી રાખેઃ અત્યારે જીએસટી જેવી અંધાધુંધ પરિસ્થિતિ પ્રવર્તે છે! સુબ્રમણ્યમ સ્વામીનો વધુ એક વિસ્ફોટ access_time 11:29 am IST

  • સીરિયામાં સતત હવાઈ હુમલા અંગ અમેરીકાએ બોલાવી તાકિદની બેઠક : અમેરીકી અધિકારીઓએ જણાવ્યું કે, સતત હવાઈ હુમલાના અહેવાલો સાચા સાબીત થશે તો સીરિયા દ્વારા યુદ્ધ વિરામનો ભંગ ગણવામાં આવશે : તેઓએ વધુમાં જણાવ્યું કે, અમે બધા પક્ષોને આગ્રહ કર્યો છે કે તે કોઈ એવી કાર્યવાહિ ન કરે, જેનાથી યુદ્ધ વિરામની સ્થિતી જોખમાય, આ સ્થિતીની સમીક્ષા કરવા અને યુદ્ધ વિરામની સ્થિતી જળવાઈ રહે તે માટે અમે (અમેરીકાએ) જોર્ડનમાં એક તાકિદની બેઠક બોલાવી છે access_time 12:53 pm IST