Gujarati News

નવી દિલ્હીઃ કોંગ્રેસના રાષ્ટ્રિય માળખામાં મોટા પરિવર્તન આવ્યા છે. ગુજરાતમાંથી શ્રી અહેમદભાઈ પટેલ, શ્રી મધુસુદન મિસ્ત્રી અને શ્રી શકિતસિંહ ગોહિલને ખૂબ જ મહત્વના સ્થાનો અપાયા છે. ઓલ ઈન્ડિયા કોંગ્રેસ કમિટિના શ્રી વેણુગોપાલે જાહેર કરેલ યાદી મુજબ ૨૨ સભ્યોની કોંગ્રેસની સી.ડબલ્યુ.સી. (કોંગ્રેસની રાષ્ટ્રિય કારોબારી)માં શ્રી અહેમદભાઈ પટેલ સામેલ છે. આ સમિતિમાં ડો.મનમોહન સીંઘ, શ્રી રાહુલ ગાંધી, એ.કે.એન્ટની, ગુલાબ નબી આઝાદ, અંબીકા સોની, પ્રિયંકા ગાંધી, ચિદમ્બરમ સહિતના દેશભરના કોંગી મહાનુભાવો સામેલ છે.

શ્રીમતી સોનિયા ગાંધીએ ૬ સભ્યોની ખાસ સમિતિ નિયુકત કરી છે. જે પક્ષના કાર્યો અને ઓપરેશનલ બાબતોમાં કોંગ્રેસના રાષ્ટ્રિય અધ્યક્ષાને મદદ કરશે. શ્રીમતિ ગાંધીએ સી.ડબલ્યુ.સી.ની બેઠકમાં આવી સમિતિ માટે ઈચ્છા દર્શાવેલ. આ સમિતિમાં  પણ અહેમદભાઈ પટેલને સ્થાન અપાયું છે. ૬ સભ્યોમાં બીજી સર્વશ્રી એ.ડો.એન્ટોની, અંબિકા સોની, વેણુગોપાલ, મુકુલ વાસનીક અને રણદીપ સિંઘ સુરજેવાલા છે.

ઓલ ઈન્ડિયા કોંગ્રેસ કમિટિના કાયમી ૨૬ આમંત્રિતો અને ૧૦ સ્પેશીયલ- ખાસ આમંત્રિતો ગુજરાતના એકમાત્ર અને કોંગ્રેસના રાષ્ટ્રિય પ્રવકતા શ્રી શકિતસિંહ ગોહિલને ખાસ સ્થાન અપાયું છે.