Gujarati News

Gujarati News

News of Wednesday, 12th May 2021

તાપી જિલ્લામાં એપ્રિલમાં ૧૫૦૦ મૃત્યુ : પી.એમ. કેર ફંડમાંથી આવેલા વેન્ટીલેટર ધૂળ ખાય છે !

કોંગી નેતા તુષાર ચૌધરીની 'અકિલા' સાથે વાતચીત : આંકડાઓ રેકોર્ડ આધારિત હોવાનો દાવો : માત્ર કન્વર્ટરના અભાવે નવા વેન્ટીલેટર ચાલુ થઇ શકતા નથી

રાજકોટ તા. ૧૨ : દક્ષિણ ગુજરાતના તાપી જિલ્લામાં એપ્રિલ મહિનામાં કોરોનાના કારણે ૧૫૦૦ જેટલા મૃત્યુ થયા છે. કોંગ્રેસના પ્રદેશ નેતા પૂર્વ કેન્દ્રીય મંત્રી ડો. તુષાર ચૌધરીએ આંકડાકીય દાવા સાથે સરકારી તંત્ર સામે આક્રોશ વ્યકત કર્યો છે. પ્રધાનમંત્રી કેર ફંડમાંથી આવેલા વેન્ટીલેટર ધૂળ ખાઇ રહ્યા છે તેમ તેમનું કહેવું છે.

શ્રી તુષાર ચૌધરીએ આજે અકિલા સાથેની વાતચીતમાં જણાવેલ કે, માત્ર ૭ તાલુકાઓના તાપી જિલ્લામાં એપ્રિલ ૨૦૨૧માં કુલ ૨૦૦૦ જેટલા મોત થયા છે. જેમાંથી ૫૦૦ જેટલા લોકોના મૃત્યુ કુદરતી કે અન્ય બિમારીના કારણે થયાનું માની શકાય. ૧૫૦૦ જેટલા મૃત્યુ માત્ર કોરોનાના કારણે થયા છે. ગ્રામ પંચાયતો અને તાલુકા પંચાયતોના રેકોર્ડના આધારે અમે આ તારણ કાઢયું છે.

કોરોના કેસનો એકદમ ઉછાળો હતો તે વખતે તાપીની સરકારી હોસ્પિટલોમાં સુવિધાનો અભાવ હતો. પી.એમ. કેર ફંડમાંથી ૨૫ નવા વેન્ટીલેટર જિલ્લાને ફાળવાયા છે પણ સાથે કન્વર્ટર ન હોવાથી ચાલુ થઇ શકતા નથી. આજેય આ વેન્ટીલેટર ધૂળ ખાઇ રહ્યા છે. ગાડી હોય પણ ચાલુ કરવા માટે ચાવી ન હોય તેવી હાલત છે. ઓકિસજન, વેન્ટીલેટર વગેરેની પૂરતી વ્યવસ્થા કરવામાં સરકારી તંત્ર નિષ્ફળ ગયું હોવાથી કોવિડના દર્દીઓએ ઘણુ સહન કરવું પડયું છે.

(3:13 pm IST)
  • મંગળવારે બપોરે પશ્ચિમ બંગાળના જુદા જુદા ભાગોમાં તોફાન અને ભારે વરસાદને કારણે આઠ લોકોનાં મોત નીપજ્યાં હતાં. અધિકારીઓએ આ માહિતી આપી. હવામાન ખાતાના એક અધિકારીએ જણાવ્યું હતું કે વીજળી પડવાથી અને કલાકે 50 કિલોમીટરની ઝડપે થયેલ ધૂળના તોફાનને કારણે કોલકાતા, ઉત્તર 24 પરગણા, નાદિયા, મુર્શીદાબાદ, બાંકુરા, પૂર્વી બર્ધમાન, પશ્ચિમ મેદનીપુર, બીરભૂમ અને પુરૂલિયા જિલ્લામાં ભારે નુકસાન થયું છે. access_time 11:57 pm IST

  • કેન્દ્ર સરકારને આડે હાથે લેતા, કોરોના રસીકરણ અંગે બોમ્બે હાઈકોર્ટે બુધવારે કહ્યું હતું કે, જો કેન્દ્ર સરકારે કેટલાક મહિના પહેલા વરિષ્ઠ નાગરિકો માટે ડોર-ટુ-ડોર રસીકરણ શરૂ કર્યું હોત, તો ઘણા જાણીતા વ્યક્તિઓ સહિત અનેક લોકોનો જીવ બચાવી શકાયો હતો. મુખ્ય ન્યાયાધીશ દિપાંકર દત્તા અને ન્યાયાધીશ જી.એસ. કુલકર્ણીની ખંડપીઠે કેન્દ્રને કહ્યું હતું કે, જ્યારે રસીકરણ કેન્દ્રોની મુલાકાત લેવામાં અસમર્થ વરિષ્ઠ નાગરિકોના જીવનનો પ્રશ્ન છે, ત્યારે ડોર-ટુ-ડોર રસીકરણ કાર્યક્રમ કેમ શરૂ કરાયો નથી? access_time 9:42 pm IST

  • કોરોનાથી રાજકોટ શહેરમાં આજે પણ થોડી રાહત અને ગ્રામ્ય વિસ્તારમાં આતંક આજે પણ યથાવત : આજે સાંજ સુધીમાં રાજકોટ શહેરમાં 286 અને ગ્રામ્યના 335 કેસ સાથે કુલ 621 નવા કોરોના ના કેસ નોંધાયા access_time 7:38 pm IST