Gujarati News

વડોદરાઃ શુક્રવારે આણંદ જિલ્લાના વલ્લભવિદ્યાનગરમાંના નાના બજારમાં આવેલા બેંક ઓફ બરોડના ATM સેંટરમાં આગ લાગી. અંદાજો છે કે આગની ઘટનામાં 25 લાખની રોકડ બળીને ખાક થઈ ગઈ છે. મોડી સાંજે ઈલેક્ટ્રોનિક બેંકિંગ સેંટરમાં આવેલા 3 ATM, 1 કેશ ડિપોઝિટ મશીન અને 1 પાસબુક પ્રિન્ટરમાં આગ ફાટી નીકળી.

શોર્ટ સર્કિટના કારણે આગ લાગી હોવાનું પ્રાથમિક અનુમાન છે. જો કે આગનું ચોક્કસ કારણ જાણવા માટે CCTV ફૂટેજ તપાસવામાં આવશે. જ્યારે બેંકના સિક્યોરિટી ગાર્ડે સેંટરમાંથી ધૂમાડા નીકળતાં જોયા ત્યારે સમગ્ર ઘટના પ્રકાશમાં આવી. સિક્યોરિટી ગાર્ડે બેંકના અધિકારીઓને જાણ કરતાં તેમણે ફાયરબ્રિગેડને બોલાવી. જો કે ફાયર ફાઈટર્સ આવે ત્યાં સુધીમાં આગ આખા સેંટરમાં પ્રસરી ગઈ હતી.

બેંકની બ્રાંચ પણ આગના ભરડામાં આવી ગઈ. ફાયર ફાઈટર્સે ATM સેંટરમાં લાગેલી આગ પર કાબૂ મેળવી લીધો છે. ધૂમાડો બહાર કાઢવા માટે બેંકની બ્રાંચના બિલ્ડિંગની બારીઓના કાચ તોડવા પડ્યા હતા. બેંકની બ્રાંચમાં વીજપુરવઠો પણ બંધ કરી દેવાયો છે. સૂત્રોના મતે, ATM અને બાકીના મશીનોને ભારે નુકસાન થયું છે. હકીકતમાં કેટલી કેશ બળી ગઈ તે જાણવા માટે કેટલા રૂપિયા ઉપાડાયા અને હજુ ATMમાં કેટલા રૂપિયા બચ્યા છે તેની ગણતરી કરવી પડશે.