Gujarati News

પ્રાંતિજ : સાબરકાંઠાના પ્રાંતીજમાં 14 વર્ષની દીકરીને તેનાં જ માતા-પિતાએ દેહવ્યાપારમાં ધકેલતાં ચકચાર મચી છે. નવમા ધોરણમાં અભ્યાસ કરતી છોકરીએ તેના માતા-પિતા સામે દેહવ્યાપાર કરાવવાની ફરિયાદ નોંધાવી છે. છોકરીએ પોલીસમાં આપેલા નિવેદન પ્રમાણે છેલ્લા એક વર્ષમાં વિવિધ હૉટલો અને ગેસ્ટ હાઉસમાં તેની પર બળાત્કાર કરવામાં આવ્યો.
છોકરી પ્રાંતીજના શ્રીમાળી ખડકી વિસ્તારમાં તેના માતા-પિતા સાથે રહે છે. છોકરી ત્રાસ સહન ન થતાં ત્યાંના સ્થાનિક સામાજિક કાર્યકર પિનલ પટેલની મદદથી માતા-પિતા સામે પોલીસ સ્ટેશનમાં ફરિયાદ નોંધાવી.
હાલ, છોકરીની મેડિકલ તપાસ માટે પ્રાંતીજની સિવિલ હૉસ્પિટલમાં દાખલ કરાઈ છે. પ્રાંતીજ પોલીસ સ્ટેશનના ઈંસ્પેક્ટર વી. આર. ચાવડાએ જણાવ્યું કે, “કેસની પ્રાથમિક તપાસ શરૂ કરી દેવાઈ છે. મેડિકલ રિપોર્ટ આવ્યા બાદ આગળની કાર્યવાહી કરવામાં આવશે.”
ઈંસ્પેક્ટર ચાવડાએ આપેલી માહિતી પ્રમાણે છોકરીના માતા-પિતા તેને ગ્રાહકો સાથે સેક્સ કરવા મજબૂર કરતા હતા. અને જો તે આમ કરવાની ના પાડે તો તેને મારતા અને શારીરિક ત્રાસ આપતા. ગ્રાહકો પાસે મોકલતા પહેલા દુખાવામાંથી રાહત આપવા છોકરીના માતા-પિતા તેને કોઈ દવા પણ પીવડાવતા હતા.