Gujarati News

રાજકોટ, તા., ૧૧: રામમંદિરના ચુકાદા સંદર્ભે અને યોગાનુયોગ ઇદના તહેવારો હોવા છતા બધુ શાંતિથી પુર્ણ થઇ જતા રાજય પોલીસ તંત્રએ હાશકારો લઇ રાજયના પોલીસ વડા શિવાનંદ ઝાએ પોલીસ તંત્રની રજા ઉપર મુકેલ પ્રતિબંધ દુર કરી નાખ્યો છે. અમદાવાદ, વડોદરા, સુરત અને રાજકોટમાં અર્ધલશ્કરી દળોના ધાડા ઉતારવા સાથે સોશ્યલ મીડીયા પર પોલીસ કમિશ્નર આશીષ ભાટીયા, અનુપમસિંહ ગેહલોત, આર.બી.બ્રહ્મભટ્ટ અને એડીશ્નલ પોલીસ કમિશ્નર એચ.આર.મુલીયાણા ટીમ દ્વારા સંવેદનશીલ મથકોમાં આજ પરોઢ સુધી જડબેસલાક બંદોબસ્ત રાખવામાં આવેલ. 

અમદાવાદની વાત કરીએ તો અમદાવાદના સંવેદનશીલ વિસ્તારો જુહાપુરા,  દરીયાપુર, સરખેજ, શાહપુર, કાલુપુર સહીતના વિસ્તારોમાં એસઆરપીની કંપનીઓ ઉતારવા સાથે રેપીેડ એકશન ફોર્સની કંપનીઓ તૈનાત કરવામાં આવી હતી. પોલીસના ચોપડે ચડેલા ડાભુરીયાઓનેે જેલમાં ધકેલી દેવામાં આવ્યા હતા. હોટલો અને ગેસ્ટહાઉસોમાં પણ કડક ચેકીંગ રાખવામાં આવ્યાનું પોલીસ કમિશ્નર આશીષ ભાટીયાએ અકિલા સાથેની વાતચીતમાં જણાવ્યું હતું.  ફાયરબ્રિગેડ સ્ટાફની રજાઓ પણ રદ કરવામાં આવી હતી.

સુરતમાં સંવેદનશીલ વિસ્તારોમાં એડીશ્નલ પોલીસ કમિશ્નર એચ.આર. મુલીયાણાએ જાતે મોરચો સંભાળ્યો હતો. અર્ધ લશ્કરી દળો સાથે કમાન્ડો અને ક્રાઇમ બ્રાન્ચ ટીમે સતત ગત મોડી રાત સુધી પેટ્રોલીંગ કરી કોઇ અનિશ્ચનીય ઘટના ન બને તે માટે સતત કાળજી રાખી હતી. રાજકોટમાં પણ પોલીસ કમિશ્નર મનોજ અગ્રવાલ અને જોઇન્ટ પોલીસ કમિશ્નર ખુરશીદ અહેમદના માર્ગદર્શન હેઠળ ડીસીપી  મનોહરસિંહ જાડેજા સતત દોડતા રહયા હતા. અસામાજીક તત્વોની હામ ભાંગી જાય તે રીતે અસરકારક પેટ્રોલીંગ હાથ ધરવામાં આવ્યું હતું.

વડોદરાની વાત કરીએ તો વડોદરાનો સંવેદનશીલ મીજાજ અને ભુતકાળમાં બીન લાદેનના પોસ્ટરો સાથે એક યુગમાં દેખાવકારો  નિકળેલા તે બાબત ધ્યાને લઇ અનુપમસિંહ ગેહલોત જાતે જ ઉચ્ચ અધિકારીઓ તથા સ્ટાફ સાથે સતત પેટ્રોલીંગમાં હાજર રહયા  હતા.

વાત આટલેથી જ નથી અટકતી ર૦ સભ્યોની સાયબર ક્રાઇમની એક સ્પેશ્યલ ટીમ પોલીસ કમિશ્નરે બનાવી હતી. શુક્રવાર રાતથી જ આ ટીમ સતત સોશ્યલ મીડીયા પર નજર રાખી રહયા હતા. આ દરમિયાન ૧૭ જેટલા લોકો કે જેમાં એક આંતરરાષ્ટ્રીય સંગઠનના હોદેદારનો સમાવેશ થાય છે તેમની પોસ્ટો વાંધાજનક જણાતા જ ક્રાઇમ બ્રાન્ચે તાકીદનું તેડુ પોલીસ કમિશ્નરની સુચનાથી આપેલ. શિવસેનાના કાર્યકરોએ મંદિરમાં સમુહ આરતી રાખી હોવાથી તેઓને પણ પોલીસ કમિશ્નરે બોલાવી તેઓના કાર્યક્રમોની અપડેટ મેળવી હતી. પોલીસની આવી આકરી કાર્યવાહી જોઇ ઘણા હિસ્ટ્રીશીટરોએ વોટસએપ કે ફેસબુક જ નહી પોતાના મોબાઇલો પણ સ્વીચઓફ કરી નાખ્યા હતા. નવાઇની વાત એ છે કે ઉશ્કેરણીજનક પોસ્ટ મુકવાનો પ્રયાસ કરનારાઓએ પોલીસનો આકરો મિજાજ જોઇ શાંતીની અપીલ કરતી પોસ્ટો મુકી દીધી હતી.