Gujarati News

વડોદરા, તા. ૧૦ : નશાની હાલતમાં માણસ શું કરતો હોય તેનું તેને સંપૂર્ણ રીતે ધ્યાન રહેતું નથી. આવા સમયે વ્યક્તિ જોખમી અને કોટા કાર્યો તરફ પણ આકર્ષાઈ જતી હોય છે. વડોદરામાં નશામાં ચકચૂર ચાર યુવાનોને પોલીસે પકડી પાડ્યા છે. આ યુવાનોએ નશાની હાલતમાં શહેરમાં રાતના સમયે લટાર મારવાનું ભારે પડી ગયું. પોલીસને જોયા પછી મિત્રોએ ભાગવાની કોશિશ કરી હતી પરંતુ પોલીસ તેમના કરતા વધારે ચપળ નીકળી અને પોલીસને તેમને પકડી લેવામાં સફળતા મળી.

રિપોર્ટ મુજબ દારૂ પીધા પછી મજાને ડબલ કરવા માટે ચાર મિત્રો રાત્રે કાર લઈને ફરવા માટે નીકળ્યા હતા. રાત્રે ૯:૩૦ વાગ્યે યુવાનો ફરવા નીકળ્યા પણ જેવા કાલાઘોડા પંચમુખી હનુમાનજી મંદિર પાસેથી પસાર થયા કે તેમને પરસેવો છૂટી ગયો કારણ કે પોલીસ તેમની પાછળ હતી. પોલીસને કાળા રંગની કારને જોઈને શંકા પડી અને તાત્કાલિક તેનો પીછો કર્યો.

જેપી રોડ પોલીસ સ્ટેશનનો સ્ટાફ રાત્રે પેટ્રોલિંગ કરી રહ્યો હતો ત્યારે આ નબીરાઓને ઝડપી લેવામાં આવ્યા હતા. નશામાં રહેલા યુવાનો પોલીસથી બચવા માટે વધારેને વધારે ફાસ્ટ કાર ભગાવી રહ્યા હતા પરંતુ આખેર તેઓ પોલીસના હાથે બચી શક્યા નહીં. પોલીસે ફિલ્મી સ્ટાઈલમાં કાળા રંગની નંબર પ્લેટ વગરની કારનો પીછો કર્યો હતો. પોલીસે કાળી કારને કલ્યાણ પાર્ટી પ્લોટ પાસે ઓવરેટ કરીને અટકાવી દીધી હતી.

પોલીસે જે ચાર યુવાનોને પકડ્યા છે તેમાં સિદ્ધિવિનાયક મહાવીર સ્વામીની પોળ લાટવાડાના રહેવાસી દેવેન ચૌહાણ અને મિત્રો મયુર ભરતભાઈ રાણા, સંદીપ ગોવર્ધનભાઈ મકવાણા અને ઈન્દ્રવદન ગોવિદભાઈ રાણાને ઝડપી પાડ્યા હતા. જેપી રોડ પોલીસે આ નબીરાઓ સામે દારૂબંદીના કાયદાના ભંગ બદલ કાર્યવાહી કરવામાં આવી છે.