Gujarati News

અમદાવાદઃ એક આર્મી જવાનના ઘરને ભાંગતું રોકવામાં પોલીસે મદદ કરીને અનોખું ઉદાહરણ રજૂ કર્યું છે. અમદાવાદમાં ફરજ બજાવતા આ જવાનની પત્નીએ તેની સામે રાજસ્થાનમાં શારીરિક, માનસિક ત્રાસ આપવાનો કેસ કર્યો હતો. સમાધાનના પ્રયાસો નિષ્ફળ જવા જવાને પણ અમદાવાદની ફેમિલી કોર્ટમાં છૂટાછેડાની અરજી કરી દીધી હતી. જોકે, એક આર્મી ઓફિસરે દખલ દઈ બંને વચ્ચે સમાધાન કરાવવાનો પ્રયાસ કર્યો હતો. પરંતુ, વાત ન બનતા આખરે પોલીસની મદદ લેવાઈ હતી, અને પોલીસે આ કપલ વચ્ચે ચાર વર્ષથી ચાલતા મતભેદને માત્ર દોઢ જ કલાકમાં દૂર કરી દીધા હતા.

સમગ્ર ઘટનાની વિગત એવી છે કે, મૂળ રાજસ્થાનનો વતની મહાવીર સિંહ (નામ બદલ્યું છે) હાલ અમદાવાદ કેન્ટોન્મેન્ટમાં ફરજ બજાવે છે. મહાવીર સિંહના લગ્ન સાત વર્ષ પહેલા શ્વેતા (નામ બદલ્યું છે) સાથે થયા હતા. લગ્નના બે વર્ષના લગ્નજીવન બાદ તેમના ઘેર પુત્ર પણ અવતર્યો હતો. લશ્કરની નોકરી હોવાના કારણે મહાવીર સિંહ મોટાભાગે ઘરની બહાર જ રહેતો હતો. આ દરમિયાન શ્વેતાને પોતાની સાસુ સાથે મતભેદ શરુ થયા હતા. શરુઆતમાં તો શ્વેતાને એમ હતું કે બધું સારું થઈ જશે, પરંતુ સ્થિતિ સુધરવાને બદલે વધુ બગડતી ગઈ.

શ્વેતાએ આ અંગે પતિને વાત કરી ત્યારે તેણે પણ પોતાની માતાનો પક્ષ લીધો. આખરે કંટાળીને શ્વેતા પોતાના દીકરાને લઈ પિયર ચાલી ગઈ, અને પતિ તેમજ સાસરિયા સામે તેણે શારીરિક અને માનસિક ત્રાસ આપવાનો કેસ કરી દીધો. બીજી તરફ, મહાવીરે પણ અમદાવાદની ફેમિલી કોર્ટમાં છૂટાછેડા માટે અરજી કરી.

સમાધાનની કોઈ શક્યતા ન રહેતા આખરે શ્વેતા અમદાવાદ આવી કેન્ટોન્મેન્ટમાં કમાન્ડન્ટને મળી, અને પોતાની આપવિતિ જણાવી. સ્થિતિની ગંભીરતા જોતા કમાન્ડન્ટે દંપતીને બેસાડી આખો દિવસ ફરી એક થઈ જવા માટે સમજાવ્યું. જોકે, કપલ સમાધાન માટે તૈયાર ન થયું. આખરે, કમાન્ડન્ટે પોતાના એક ઓળખિતા આઈપીએસની મદદ લીધી. આ કેસ એડિશનલ ડીસીપી પન્ના મોમાયાને સોંપવામાં આવ્યો.

એડિશનલ ડીસીપી પન્ના મોમાયાએ મહિલા પોલીસ સ્ટેશન (ઈસ્ટ)ના પીઆઈ પી.એમ. ગામિતને સ્થિતિથી વાકેફ કર્યા, અને દંપતીને યોગ્ય કાઉન્સેલિંગ આપવા જણાવ્યું. પીઆઈ ગામિતે પોતાની કેબિનમાં આ દંપતીને બોલાવી દોઢ કલાક સુધી સમજાવ્યું, અને બંનેને એકબીજાની સાથે રહેવા માટે પણ મનાવી લીધા. આર્મી જવાન અને તેની પત્ની વચ્ચે સમાધાન થઈ ગયું હોવાની વાત જાણી સીનિયર અધિકારીઓએ પણ જવાનને એક ક્વાટર ફાળવી દીધું કે જેથી જવાન પોતાની પત્ની અને બાળક સાથે રહી શકે.