Gujarati News

રાજકોટ, તા., ૮: ગુજરાતના ૧૯૮પ બેચના સિનીયર આઇએએસ અને હાલમાં  વડોદરા ખાતે ગુજરાત આલ્કલીઝ એન્ડ કેમીકલ્સ લી. (જીએસીએલ)નાં એમ.ડી. પ્રેમકુમાર ગેરા સાથે પેટીએમ વોલેટનું કેવાયસી કરાવવાના બહાને સાયબર માફીયાએ ટીમવ્યુઅર કવીસ સપોર્ટ  નામની એપ્લીકેશન ડાઉન કરાવી રૂ.૧૦નું ટ્રાન્ઝેકશન કરાવી સામે છેડે બેઠેલા સાયબર માફીયાએ ૯૪,૯૯૯ના બે ટ્રાન્ઝેકશન કરાવી લીધાની સનસનાટી ભરી ફરીયાદ વડોદરા સાયબર સેલમાં થતા જ વડોદરાના પોલીસ કમિશ્નર અનુપમસિંહ ગેહલોતે તુર્ત જ આ મામલાની તપાસ સાયબર સેલના મદદનીશ પોલીસ કમિશ્નર ભરત રાઠોડને સુપ્રત કર્યાના પગલે-પગલે તપાસનો ધમધમાટ બોલાવી ગણત્રીની કલાકોમાં જ ઓનલાઇન માફીયા ગેંગ ઝારખંડની હોવાનું શોધી કાઢયું છે.

પોલીસ કમિશ્નર અનુપમસિંહ ગેહલોત ટીમની પ્રાથમીક તપાસમાં ઝારખંડથી આ કૌભાંડ થયાનું ખુલવાની સાથે જ પોલીસ કમિશ્નરે એક વિશિષ્ટ ટીમ કે જેમાં ટેકનોલોજીના તજજ્ઞોનો સમાવેશ છે તેમને ઝારખંડ મોકલવા સાથે આ ટોળકી અંગે ઝારખંડના પોલીસ વડા સાથે પણ અનુપમસિંહ ગેહલોતે ટેલીફોનીક ચર્ચા કર્યાનું સુત્રો જણાવે છે.

ઝારખંડની સાઇબર માફીયાની આ ગેંગે સિનીયર આઇએએસ સાથે અન્ય બીજા કેટલા લોકો સાથે છેતરપીંડી કરી છે અને કેટલા એ ફરીયાદ કરી નથી તે વિગતો પણ બહાર આવશે તેવું માનવામાં આવી રહયું છે.

અત્રે એ યાદ રહે કે સિનીયર આઇએએસ પ્રેમકુમાર ગેરાને તેમના મોબાઇલ પર પેટીએમનું કેવાયસી કરાવવા મેસેજ આવેલ. ઉકત મેસેજમાં તેઓ પેટીએમનું કેવાયસી અપડેટ નહી કરે તો તેમનું વોલેટ બંધ થઇ જશે તેવી સાયબર માફીયાએ હિન્દીમાં ચેતવણી આપી હતી.

પેટીએમના કેવાયસી માટે પ્રથમ ચોક્કસ માહીતી પુછી તેમને એપલ વર્ઝનની ટીમવ્યુઅર કવીક સ્પોર્ટ નામની એપ્લીકેશન ડાઉનલોડ કરવા સુચના આપી હતી. કોમ્પ્યુટર સ્ક્રીનના એકસેસ માટે સામાન્ય ગણાતી આ એપ્લીકેશન ડાઉનલોડ કરાવ્યા બાદ તેમનો કબ્જો મેળવી લીધો હતો અને આમ તેમની સાથે મોટી રકમની છેતરપીંડી થઇ હતી.