Gujarati News

ગાંધીનગર:કોર્પોરેશન દ્વારા સે-ર૪ની હાઉસીંગ વસાહતમાં મોટા પાયે દબાણ તોડવામાં આવી રહયા છે ત્યારે આ વોર્ડના કોંગ્રેસના કોર્પોરેટરે મેયરને દરખાસ્ત કરી છે કે વારંવાર સે-ર૪ને જ ટાર્ગેટ કરવામાં આવે છે. દબાણો સમગ્ર શહેરમાં છે ત્યારે સે-૧થી લઈ ૩૦ સુધી ક્રમશ દબાણ હટાવ ઝુંબેશ શરૃ કરવી જોઈએ. કોમર્શિયલ દબાણો પહેલા હટાવવા જોઈએ. વસાહતીઓને હેરાન કરવાનું બંધ કરવું જોઈએ. 

રાજયના પાટનગર ગાંધીનગર શહેરમાં મહાનગરપાલિકા દ્વારા સે-૧૧માં પાર્કીંગના મુદ્દે દબાણો હટાવ્યા બાદ સે-ર૪માં ગુજરાત હાઉસીંગ બોર્ડમાં ઉભા થઈ ગયેલા દબાણો હટાવવાનું શરૃ કરવામાં આવ્યું છે. સે-ર૪ની હાઉસીંગ બોર્ડની આ વસાહતોમાં કોમર્શિયલ દબાણોની સાથે રહેણાંક વિસ્તારમાં પણ મોટા દબાણો હટાવાયા છે. ત્યારે આ વિસ્તારના સ્થાનિકો પણ ફકત સે-ર૪ને જ કેમ તંત્ર ટાર્ગેટ કરી રહયું છે તેવો પ્રશ્ન કર્યો છે. આ વોર્ડના કોંગ્રેસના કોર્પોરેટર અંકિત બારોટે પણ મેયરને દરખાસ્ત કરી છે કે આગામી તા.૧૪મી એ મળનારી સામાન્ય સભામાં તેમના મુદ્દાઓને આવરી લેવામાં આવે. તેમણે રજૂઆત કરી છે કે કોર્પોરેશન દ્વારા જે દબાણ હટાવ ઝુંબેશ શરૃ કરાઈ છે તેમાં સે-ર૪ને જ ટાર્ગેટ કરવામાં આવી રહયું છે. આ કાર્યવાહીમાં નાના અને મધ્યમ વર્ગના પરિવારોને ટાર્ગેટ કરવામાં આવ્યા છે. દબાણ હટાવ ઝુંબેશમાં વહાલા-દવાલાંની નીતિ રાખવામાં આવી રહી છે.