Gujarati News

અમદાવાદ, તા. ૮ : મુંબઈમાં તોફાની વરસાદ બાદ સ્થિતિ કપરી થઈ છે, આ પછી ગુજરાતમાં પણ તેની અસર દેખાઈ અને સૌરાષ્ટ્ર, ઉત્તર ગુજરાત, મધ્ય ગુજરાત અને દક્ષિણ ગુજરાતમાં વરસાદ નોંધાયો છે. આજે પણ રાજ્યના દક્ષિણ ગુજરાત, સૌરાષ્ટ્ર તથા મધ્ય ગુજરાતમાં ગાજવીજ સાથે વરસાદ થવાની સંભાવના વ્યક્ત કરવામાં આવી છે. રાજ્યમાં ૧૧ ઓગસ્ટ પછી એટલે કે જન્માષ્ટમીના દિવસથી આગામી ૫ દિવસ સુધી ભારેથી અતિભારે વરસાદ થવાની આગાહી વ્યક્ત કરવામાં આવી છે. રિપોર્ટ્સ મુજબ સાઈક્લોનિક સર્ક્યુલેશનની અસરના કારણે રાજ્યમાં અતિભારે વરસાદ થવાની સંભાવના વ્યક્ત કરવામાં આવી છે. આ સમયગાળા દરમિયાન સારા પ્રમાણમાં વરસાદ થવાની આગાહી વ્યક્ત કરવામાં આવી છે.

            જન્માષ્ટમીથી ૫ દિવસ સુધી ભારે વરસાદની આગાહી વ્યક્ત કરવામાં આવી છે જેમાં અમદાવાદ સહિત વડોદરા, મધ્ય ગુજરાત, ઉત્તર ગુજરાતમાં પણ સારા પ્રમાણમાં વરસાદ થવાની સંભાવના વ્યક્ત કરવામાં આવી છે. મહત્વનું છે કે, પાછલા કેટલાક દિવસથી સૌરાષ્ટ્ર તથા મધ્ય ગુજરાતમાં કેટલાક ઠેકાણે સારા પ્રમાણમાં વરસાદ નોંધાયો છે. મુંબઈમાં થયેલી તોફાની વરસાદના કારણે લોકોએ ભારે મુશ્કેલીનો સામનો કરવો પડ્યો. શહેરના ઘણાં વિસ્તારોમાં લાંબા વર્ષોથી નોંધાયેલા વરસાદના રેકોર્ડ તૂટી ગયા છે. આવામાં વરસાદના પાણી ઘરમાં ફરી વળવાથી અને તોફાની પવન ફૂંકાવાથી નુકસાનનો પણ સામનો કરવો પડ્યો છે.