Gujarati News

અમદાવાદઃ રાજ્ય સરકાર અને ટ્રાફિક વિભાગે સોમવારે હાઈકોર્ટમાં જણાવ્યું કે શહેરના રસ્તાઓ પર ટ્રાફિકની સમસ્યા હલ કરવાના ભાગરુપે ટ્રાફિક ડ્રાઈવ બાદ હવે તેઓ રિક્ષાની પરમિટ આપવાનું મર્યાદિત કરીને રસ્તાઓ પર ઓટોરિક્ષાની સંખ્યા ઘટાડશે. ઉલ્લેખનીય છે કે થોડા સમય પહેલા જ શહેરમાં ઓટોરિક્ષા ડ્રાઈવરોએ હડતાલ કરીને મર્યાદીત પરિમિટ અને રસ્તાઓ પર ઓટો સ્ટેન્ડ માટે માગણી કરી હતી.

સરકારે શહેરના રસ્તાઓ પર ઓટોરિક્ષાની સંખ્યા ઘટાડવા માટે રિકમન્ડેશન આપવા એક કમિટીની રચના કરી છે જે 15 દિવસની અંદર રિપોર્ટ આપશે કે શહેરનો વિસ્તાર, વસ્તી, રોડ કંડિશન અને હાલ કેટલી ઓટો રસ્તા પર દોડી રહી છે તેના આધારે કેટલી નવી પરમિટ ઇશ્યુ કરવી તે અંગે જણાવશે. સરકારે હાઈકોર્ટને કહ્યું કે રિક્ષા પબ્લિક ટ્રાન્સપોર્ટ કે પ્રાઈવેટ વાહન નહીં પણ કોન્ટ્રાક્ટ કેરેજ વ્હેહિકલ અંતર્ગત ગણાય છે જેથી તેમને પરમિટની જરુર પડે અને આ પરમિટ સરકાર વધારી કે ઘટાડી શકે છે.

જો ટ્રાફિક નિષ્ણાંતોનું માનીએ તો અમદાવાદમાં હાલ 1 લાખ રિક્ષાની જરુર છે તેની સામે શહેરના રસ્તા પર 2 લાખ જેટલી રિક્ષા દોડી રહ્યા છે. સોમવારે RTOએ રિક્ષા ડ્રાઇવર એસોસિએશન સાથે બેઠક કરી હતી અને શહેરના રસ્તા પર રિક્ષાઓ ઓછી કરવા અંગે ચર્ચા કરી હતી. અમદાવાદ RTOના અધિકારી એસ.પી. મુનિયાએ કહ્યું કે ‘અમે રિક્ષા ડ્રાઇવર એસોસિએશન પાસેથી રોડ પર રિક્ષાને રેગ્યુલેટ કરવા માટે સજેશન માગ્યું છે. તેમજ હાલ નવું રજિસ્ટ્રેશન અટકાવી દેવામાં આવ્યું છે.’

ઓટોરિક્ષા ડ્રાઇવર એક્શન કમિટીના ગુજરાત પ્રેસિડેન્ટ અશોક પંજાબીએ કહ્યું કે, ‘ગેરરીતિઓ જેવી કે એક જ ડ્રાઇવિંગ લાઇસન્સ પર એકથી વધુ રિક્ષાઓનું રજિસ્ટ્રેશન, રિક્ષાઓને ભાડે આપવી જેવી સમસ્યાના કારણે રોડ પર રિક્ષાઓ વધી ગઈ છે.’ તેમણે કહ્યું કે, ‘આ કારણે જે જેન્યુઇન રિક્ષા ચાલક છે તે પોતાની રોજીરોટી ન ગૂમાવે તે જોવાની ખાસ જરુર છે.’

ઉપરાંત સોમવારે સરકારે જાહેર કર્યું કે દરેક ઓટોરિક્ષા ડ્રાઇવર માટે ગુજરાત મોટર વેહિકલ રુલ્સ અંતર્ગત ફરજિયાત બેજીસનો નિયમ લાગુ પડશે. આ માટે ગત સપ્તાહે જ ટ્રાન્સપોર્ટ કમિશનર્સને બે સર્ક્યુલર ઇશ્યુ કરવામાં આવ્યા છે. ગુજરાત અનઓર્ગેનાઇ્ઝ્ડ કામદાર સંઘના રાજીવ ઉપાધ્યાયે કહ્યું કે, ‘જુદા જુદા રિક્ષા એસોસિએશન દ્વારા પોતાની હડતાલમાં 3 પોઈન્ટ ડીમાન્ડ મુકવામાં આવી હતી. અમે કહ્યું હતું કે બેજિસ ફરજિયા ન હોવા જોઈએ, યુનિફોર્મ ફરજિયાત હોવો જોઈએ અને ઓટો રિક્ષા માટે શહેરમાં ઓટો સ્ટેન્ડની સંખ્યા વધારવી જોઇએ.’

આ સાથે જ સરકારે હાઈકોર્ટમાં એ પણ કહ્યું કે, ઓલા અને ઉબર જેવી ટેક્સી સર્વિસ માટે પણ ટુંક સમયમાં જ નવા રુલ્સ લાવશે. આ માટે ડ્રાફ્ટ તૈયાર કરી લેવામાં આવ્યો છે. જેને મોટર વેહિકલ રુલ્સ અંતર્ગત લાવવામાં આવશે. જેને ‘ગુજરાત સ્ટેટ ઓન ડિમાન્ડ ટ્રાન્સપોર્ટેશન એગ્રીગેટર રુલ્સ’ નામ આપવામાં આવશે. સરકાર તરફથી મનિષા શાહે હાઈકોર્ટને કહ્યું કે રાજ્ય સરકારે પહેલા 2015માં કેટલા નિયમ બનાવ્યા હતા. બીજા પણ કેટલાક રાજ્યોમાં આવા રેગ્યુલેશન છે.