Gujarati News

Gujarati News

News of Friday, 7th December 2018

સ્ટેચ્યુ ઓફ યુનિટીની ૧પ૩ મીટર ઉંચે વ્યુ ગેલેરી સુધી લઇ જતી લીફ્ટમાં ખોટકોઃ પ્રવાસીઓ હેરાન

વડોદરાઃ કેવડિયા કોલોની ખાતે બનેલી વિશ્વની સૌથી ઉંચી સરદારની પ્રતિમા જોવા માટે મુલાકાતીઓ મોટી સંખ્યામાં પહોંચી રહ્યા છે. પ્રતિમાની વ્યૂ ગેલેરીમાંથી વિંધ્યાચળ અને સાપુતારાની પર્વતમાળા જોવા માટે મુલાકાતીઓ લાઈનમાં ઊભા રહેતા હોય છે. પરંતુ પાછલા થોડા દિવસોથી પ્રવાસીઓને વિલા મોઢે પાછા ફરવું પડે છે. 153 મીટર ઊંચે વ્યૂ ગેલેરી સુધી લઈ જતી બેમાંથી એક લિફ્ટ ઘણા દિવસોથી બરાબર કામ નથી કરી રહી.

મુલાકાતીઓ અને સ્ટાફ વચ્ચે બોલાચાલી

મુલાકાતીઓને પ્રતિમાની સિક્યોરિટી અને એડમિનિસ્ટ્રેશન સ્ટાફ સાથે ઘણી બધી બોલાચાલી કર્યા બાદ કલાકો સુધીની રાહ જોવી પડે છે. સ્ટેચ્યુ ઓફ યુનિટીના ટોચના સત્તાઅધિકારીએ સ્વીકાર્યું કે બેમાંથી એક લિફ્ટમાં કેટલીક ખામી સર્જાઈ રહી છે, જેના કારણે મુલાકાતીઓને હાલાકીનો સામનો કરવો પડી રહ્યો છે.

ટેકનિશિયનોમાં મચી દોડધામ

સ્ટેચ્યુ ઓફ યુનિટીના ચીફ એડમિનિસ્ટ્રેટર આઈ.કે પટેલે જણાવ્યું કે, લિફ્ટમાં ટેલનિકલ પ્રોબ્લેમ છે અને લિફ્ટને ઈન્સ્ટોલ કરનારી કંપનીએ પ્રોબ્લેમને શોધવા માટે ગુરુવારે પોતાનો સ્ટાફ મોકલ્યો છે. તેમણે આગળ જણાવ્યું કે, મેં સ્ટેચ્યુ ઓફ યુનિટીની મુલાકાત લીધી અને કંપનીના અધિકારીઓ સમક્ષ સમસ્યાનું કાયમી નિરાકરણ લાવવા માટે કહ્યું છે. અમે પ્રોબ્લેમ સોલ્વ કરી નાખીશું.

લોકોએ ટિકિટના પૈસા પાછા માગ્યા

મંગળવાર અને બુધવારે SOUના પ્રાંગણમાં ગુસ્સે થયેલા મુલાકાતીઓ અને સ્ટાફ વચ્ચે ભારે ચકમક થઈ હતી. ઘણા લોકો જેમણે વ્યૂ ગેલેરીની ટિકિટ લીધી હતી, તેમણે રીફન્ડની માગણી કરી. સ્ટેચ્યુ ઓફ યુનિટીના સત્તાઅધિકારીઓએ જણાવ્યું કે, સ્ટેચ્યુમાં બે લિફ્ટ છે અને દરેકની કેપેસિટી 25 વ્યક્તિની છે. મુલાકાતીઓએ વ્યૂ ગેલેરીની ટિકિટ ખરીદીને પોતાનો વારો આવે ત્યાં સુધી રાહ જોવી પડશે. પહેલા 30મી ઓક્ટોબરે સ્ટેચ્યુ ઓફ યુનિટીના લોકાર્પણના દિવસે પીએમ મોદીના ત્યાંથી ગયા પછી તરત લિફ્ટમાં ખામી સર્જાઈ હતી, સમયે પણ સત્તાધિકારીઓને શરમજનક સ્થિતિમાં મૂકાવું પડ્યું હતું.

(5:15 pm IST)